អន្តរជាតិ ៖ ចក្រភពអង់គ្លេស និងប្រទេសបារាំងបានបញ្ជូននាវាផ្ទុកយន្តហោះ និងនាវាចម្បាំង និងប្រព័ន្ធការពារដែនអាកាសទៅកាន់ប្រទេសស៊ីប បន្ទាប់ពីកោះនេះរងការវាយប្រហារដោយដ្រូនផលិតដោយអ៊ីរ៉ង់។ យោងតាមប្រភពពីសារព័ត៌មាន Al Jazeera…
អន្តរជាតិ ៖ ចក្រភពអង់គ្លេស និងប្រទេសបារាំងបានបញ្ជូននាវាផ្ទុកយន្តហោះ និងនាវាចម្បាំង និងប្រព័ន្ធការពារដែនអាកាសទៅកាន់ប្រទេសស៊ីប បន្ទាប់ពីកោះនេះរងការវាយប្រហារដោយដ្រូនផលិតដោយអ៊ីរ៉ង់។
យោងតាមប្រភពពីសារព័ត៌មាន Al Jazeera នៅថ្ងៃទី៣ ខែមីនា ឆ្នាំ២០២៦ បានរាយការណ៍ថា រដ្ឋាភិបាលអង់គ្លេសបានប្រកាសថា ខ្លួនកំពុងដាក់ពង្រាយនាវាចម្បាំង និងឧទ្ធម្ភាគចក្រទៅកាន់ប្រទេសស៊ីប ខណៈការបារម្ភទូទាំងពិភពលោកនៅបន្តលើផលវិបាកពីការវាយប្រហារដ៏សាហាវរបស់សហរដ្ឋអាមេរិក និងប្រទេសអ៊ីស្រាអែលលើប្រទេសអ៊ីរ៉ង់ និងការវាយប្រហារសងសឹករបស់អ៊ីរ៉ង់នៅទូទាំងតំបន់។
ក្រសួងការពារជាតិអង់គ្លេសកាលពីថ្ងៃអង្គារបានឱ្យដឹងថា ខ្លួនកំពុងបញ្ជូននាវាចម្បាំង HMS Dragon ទៅភាគខាងកើតសមុទ្រមេឌីទែរ៉ាណេ រួមជាមួយឧទ្ធម្ភាគចក្រ Wildcat ចំនួន ២ គ្រឿង ដើម្បីជំរុញការការពារប្រទេសស៊ីបដែលជាសម្ព័ន្ធមិត្តពីការវាយប្រហារដោយដ្រូន។ ស្របពេលនាវាចម្បាំងការពារដែនអាកាស Type-45 ចំនួន ៦ គ្រឿងរបស់កងទ័ពជើងទឹកអង់គ្លេស គឺនាវាចម្បាំង HMS Dragon ដែលបំពាក់ដោយប្រព័ន្ធមីស៊ីល Sea Viper អាចបាញ់មីស៊ីល ៨ គ្រាប់ក្នុងរយៈពេលតិចជាង ១០ វិនាទី និងផ្ទុកមីស៊ីលរហូតដល់ ១៦ គ្រាប់ក្នុងពេលដំណាលគ្នា។
ក្នុងថ្ងៃជាមួយគ្នានោះ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ក៏បានបញ្ជាឱ្យនាវាផ្ទុកយន្តហោះដើរដោយថាមពលនុយក្លេអ៊ែរបារាំង គឺនាវា Charles de Gaulle ផ្លាស់ទីពីសមុទ្របាល់ទិកទៅកាន់សមុទ្រមេឌីទែរ៉ាណេផងដែរ។ លោកបានថ្លែងថា Charles de Gaulle នឹងត្រូវបានអមដំណើរដោយកងទ័ពអាកាស និងនាវាចម្បាំងផងដែរ។
នៅក្នុងសុន្ទរកថាដែលបានថតទុកជាមុននៅលើទូរទស្សន៍បារាំង លោក ម៉ាក្រុង បានបន្ថែមថា បណ្តាយន្តហោះចម្បាំង Rafale រួមទាំងប្រព័ន្ធការពារដែនអាកាស និងប្រព័ន្ធរ៉ាដាអាកាសត្រូវបានដាក់ពង្រាយក្នុងរយៈពេលប៉ុន្មានម៉ោងកន្លងមកនេះនៅមជ្ឈិមបូព៌ា។ លោកនិយាយថា បារាំងនឹងបន្តកិច្ចខិតខំប្រឹងប្រែងតាមការចាំបាច់ ឆ្លើយតបនឹងការវាយប្រហារកាលពីថ្ងៃទី២ ខែមីនា កន្លងទៅ លើមូលដ្ឋានទ័ពអាកាសអង់គ្លេសលើកោះស៊ីប ដោយបន្ថែមថា ស៊ីប និងបារាំងទើបតែបានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ។
ការប្រកាសទាំងនេះ កើតឡើងមួយថ្ងៃបន្ទាប់ពីរដ្ឋាភិបាលស៊ីប និងក្រសួងការពារជាតិអង់គ្លេស បានប្រកាសថា ការវាយប្រហារដោយដ្រូនផលិតដោយអ៊ីរ៉ង់ដ៏មិននឹកស្មានដល់មួយ បានកំណត់គោលដៅមូលដ្ឋានទ័ពអាកាស Akrotiri ភាគនិរតីនៃទីក្រុងឆ្នេរសមុទ្រ Limassol របស់ប្រទេសស៊ីប៕
ចែករំលែកព័តមាននេះ