ខេត្តស្ទឹងត្រែង ៖ មន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែង នាថ្ងៃទី០៨ ខែកក្កដា ឆ្នាំ២០២៥ បានបើកយុទ្ធនាការចាក់វ៉ាក់សាំងគោ-ក្របី ជូនដល់ប្រជាពលរដ្ឋនៅឃុំភ្លុក ស្រុកសេសាន…
ខេត្តស្ទឹងត្រែង ៖ មន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែង នាថ្ងៃទី០៨ ខែ
កក្កដា ឆ្នាំ២០២៥ បានបើកយុទ្ធនាការចាក់វ៉ាក់សាំងគោ-ក្របី ជូនដល់ប្រជាពលរដ្ឋនៅឃុំភ្លុក ស្រុកសេសាន ខេត្តស្ទឹងត្រែង ។
ក្នុងពិធីយុទ្ធនាការ ចាក់វ៉ាក់សាំងសត្វគោ-ក្របីជូនប្រជាពលរដ្ឋនេះរៀបចំឡើង ដោយមន្ទីរកសិកម្ម រុក្ខាប្រមាញ់និងនេសាទខេត្ត សហការជាមួយរដ្ឋបាលស្រុក ដោយមានការចូលរួមពីលោកអភិបាលខេត្ត រដ្ឋបាលស្រុក ប្រធាន អនុប្រធានមន្ទីរពាក់ព័ន្ធ អាជ្ញាធរភូមិឃុំ និងប្រជាពលរដ្ឋជាច្រើនផងដែរ។
ប្រធានមន្ទីរកសិកម្មរុក្ខាប្រមាញ់ និងនេសាទខេត្តស្ទឹងត្រែង លោកទុំ នីរ៉ូ បានលើកឡើងថា យុទ្ធនាការចាក់វ៉ាក់សាំងសត្វគោ-ក្របីនេះ គឺធ្វើឡើងក្នុងគោលបំណងដើម្បីចូលរួមទប់ស្កាត់នូវការរីករាលដាលនៃជម្ងឺឆ្លងសត្វគោ-ក្របី កាត់បន្ថយអត្រា សត្វស្លាប់និងហានិភ័យពីការបរិភោគសាច់សត្វជាដើម។
នៅក្នុងរដូវវស្សានេះ ជំងឺដែលតែងតែជួបប្រទះ ជាញឹកញាប់ទៅលើគោ-ក្របី មានជំងឺសារទឹក និងអុតក្តាម។ លោកប្រធានបន្តថា៖យោងតាមស្ថិតិសត្វគោ-ក្របីទូទាំងខេត្តស្ទឹងត្រែងគោ ៣៨. ០៧២ ក្បាល ស្រុកសេសាន មានចំនួន៩.៣២៦ ក្បាល សត្វក្របី ១៦.៧៤២ ក្បាល ស្រុកសេសានមានចំនួន ២.៦៣១ ក្បាល។
ក្នុងចំនួនសត្វគោ-ក្របីទាំងនេះ មន្ត្រីការិយាល័យផលិតកម្មនិងបសុពេទ្យបានចុះចាក់វ៉ាក់សាំងការពារជម្ងឺសារទឹកលើសត្វគោបានចំនួន៧.៥២៨ ក្បាល ក្របី ៣.៥១៨ ក្បាល។ ចាក់វ៉ាក់សាំងការពារជម្ងឺអុតក្តាមទៅលើសត្វគោបានចំនួន១.០៥០ក្បាល ក្របី៤៥០ ក្បាល។ និងចាក់ថ្នាំព្យាបាលគោ២៧៩ក្បាលក្របី ១៤០ក្បាល។ ដោយឡែកសត្វគោ-ក្របីស្លាប់ដោយសារជម្ងឺគោ ២០ ក្បាលក្របី ១០ ក្បាល ។
ជាមួយគ្នានេះ លោកប្រធានមន្ទីរក៏បានលើកឡើងដែរថា សព្វថ្ងៃនេះ ការចិញ្ចឹមគោ-ក្របីនៅក្នុងខេត្តស្ទឹងត្រែងយើងនៅមានកម្រិត ពោលគឺនៅមិនទាន់បាន អនុវត្តតាមវិធានបច្ចេកទេសឲ្យបានត្រឹមត្រូវនៅឡើយទេ ក្នុងនោះរួមមាន៖ ការថែទាំ និងអនាម័យ ការ ជ្រើសរើសពូជ និងការបង្កាត់ពូជ ចំណីអាហារ និងវិធានការការពារជម្ងឺជាដើម។
ដោយឡែក ការចិញ្ចឹមរបស់ពួកគាត់ គឺនៅតែបន្តការចិញ្ចឹមតាមបែបប្រពៃណី ចិញ្ចឹមដោយព្រលែង គ្មានការថែទាំត្រឹមត្រូវ និងគ្មានចំណីត្រឹមត្រូវគ្រប់គ្រាន់ បានធ្វើឲ្យសត្វគោ-ក្របី មួយចំនួនជួបប្រទះបញ្ហាសុខភាពងាយទទួលរងនូវជំងឺ និងអាចស្លាប់ជាដើម។ យ៉ាងណាមិញ មន្ទីរបានចូលរួមយ៉ាងសកម្ម ដើម្បីជម្រុញនូវការចិញ្ចឹមគោ-ក្របីនេះ ឲ្យមានសក្តានុពលបន្ថែមទៀត ។
លោកអភិបាលខេត្តស្ទឹងត្រែង បានថ្លែងណែនាំដល់ប្រជាពលរដ្ឋ ហើយបោះបង់ទម្លាប់ពីការចិញ្ចឹមសត្វពាហនៈដែលការព្រលែងពាសវាលពាសកាលបង្ករលក្ខណៈគ្មានសណ្ដាប់ធ្នាប់និងហានិភ័យបង្កគ្រោះថ្នាក់ដល់អ្នកដទៃផងដែរ មកចិញ្ចឹមដោយការដាក់ទ្រុងត្រឹមត្រូវដែលមានសុវត្ថិភាព៕
ចែករំលែកព័តមាននេះ