រាជធានីភ្នំពេញ ៖ ចៅអធិការវត្តប្រជុំសាគរហៅវត្តថ្មី រួមជាមួយអនុសាខាកាកបាទក្រហមខណ្ឌឫស្សីកែវ និងសាលាសង្កាត់ជ្រោយចង្វា កាលពីព្រឹកថ្ងៃទី២២ កញ្ញា បាននាំយកអំណោយទៅចែកជូនប្រជាពលរដ្ឋចំនួន៣០គ្រួសារ ដែលរងគ្រោះដោយទឹកជំនន់ នៅក្នុងភូមិដើមគ សង្កាត់ជ្រោយចង្វា ខណ្ឌឫស្សីកែវ។ ពិធីនេះបានរៀបចំឡើងនៅក្នុងបរិវេណវត្តប្រជុំសាគរហៅវត្តថ្មីក្រោមអធិបតីភាព លោកនុត ពុធដារ៉ា ប្រធានគណៈកម្មាធិការ អនុសាខាកាកបាទក្រហមកម្ពុជា ខណ្ឌឫស្សីកែវ។
អំណោយដែលនាំយកទៅចែកជូនដល់គ្រួសាររងគ្រោះនាឱកាសនោះក្នុង១គ្រួសារ អង្ករចំនួន១០គីឡូក្រាម ស្ករស៥គីឡូក្រាម មីចំនួន១៥កញ្ចប់ តែ៥កញ្ចប់ ទឹកដោះគោ ១កំប៉ុង ទឹកត្រី១ដប ទឹកស៊ីអីុវ១ដប ទឹកក្រូច១កំប៉ុង ត្រីខ២កំប៉ុង និងថវិកាចំនួន៤២.០០០រៀល។
លោកនុត ពុធដារ៉ា បានឱ្យដឹងថា ការចុះជួយជនរងគ្រោះ ដែលជួបគ្រោះទឹកជំនន់ និងគ្រោះថ្នាក់ផ្សេងៗ គឺជាទិសដៅរបស់កាកបាទក្រហមកម្ពុជា ក្រោមការដឹកនាំរបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន។ លោកនុត ពុធដារ៉ា បានពាំនាំនូវប្រសាសន៍សាកសួរសុខទុក្ខពីសំណាក់លោកជំទាវចំពោះប្រជាពលរដ្ឋ ដែលជានិច្ចកាលតែងតែគិតគូរ និងយកចិត្តទុកដាក់យ៉ាងខ្លាំង ហើយតែងតែណែនាំដល់មន្ត្រីគ្រប់ជាន់ថ្នាក់ចុះជួយដល់ប្រជាពលរដ្ឋក្រីក្រគ្មានទីពឹង ចាស់ជរា គ្រួសារផ្ទុកមេរោគ និងជនរងគ្រោះដោយគ្រោះថ្នាក់ធម្មជាតិផ្សេងៗដល់មូលដ្ឋាន។
លោកនុត ពុធដារ៉ា ក៏បានណែនាំដល់ប្រជាពលរដ្ឋដែលរងគ្រោះដោយទឹកជំនន់ឱ្យមានការប្រុងប្រយ័ត្នកុំឱ្យកូនចៅចុះលេងទឹក ចៀសវាងមានគ្រោះថ្នាក់ដល់អាយុជីវិត។ លោកនុត ពុធដារ៉ា ក្នុងនាមលោកឃ្លាំង ហួត អភិបាលខណ្ឌឫស្សីកែវ និងក្នុងនាមកាកបាទក្រហមខណ្ឌឫស្សីកែវ បានថ្លែងអំណរគុណចំពោះព្រះតេជគុណជាសុខ ស៊ីណាត ព្រះចៅអធិការវត្តប្រជុំសាគរ ហៅវត្តថ្មី និងព្រះសង្ឃ ពុទ្ធបរិស័ទ សប្បុរសជនទាំងអស់តែងតែផ្តល់អំណោយតាមរយៈអនុសាខាកាកាបាទក្រហម ខណ្ឌឫស្សីកែវ ឬចុះចែកដោយផ្ទាល់ដល់ជនរងគ្រោះជាការចូលរួមជួយសម្រួលការលំបាក និងជាមនុស្សធម៌បំផុត៕
ចែករំលែកព័តមាននេះ