នៅថ្ងៃទី២៣ កញ្ញា ឆ្នាំ២០១១ វេទិកាអ្នកពាក់ព័ន្ធពហុភាគីប្រចាំឆ្នាំ និងពិធីផ្តល់វិញ្ញាបនបត្រនឹងត្រូវរៀបចំឡើងដោយអភិបាលកិច្ច និងការប្រតិបត្តិការប្រកបដោយវិជ្ជាជីវៈនៃអង្គការមិនមែនរដ្ឋាភិបាលនៃគណៈកម្មាធិការសហប្រតិបត្តិការដើម្បីកម្ពុជា (CCC) នៅអង្គការសមាគមកូរ៉េសម្រាប់បម្រើការនៅអាស៊ីផ្ទះលេខ១៩-២១ ផ្លូវ៣៣០ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ (នៅជិតសារមន្ទីរប្រល័យពូជសាសន៍ទួលស្លែង)ចាប់ពីម៉ោង៨ព្រឹករហូតដល់ម៉ោង៥ល្ងាច ។
គោលបំណងនៃវេទិកានេះគឺផ្សព្វផ្សាយដល់អ្នកចូលរួម និងពិភាក្សាគ្នារវាងអ្នកពាក់ព័ន្ធនានារួមមានតំណាងរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានាស្តីអំពីគោលការណ៍គណនេយ្យភាព និងអភិបាលកិច្ចល្អ ដើម្បីបង្កើនការយល់ដឹងដល់អង្គការជាតិ អង្គការអន្តរជាតិក្នុងថ្នាក់តំបន់ និងអន្តរជាតិអំពីអភិបាលកិច្ច និងការប្រតិបត្តិការប្រកបដោយ វិជ្ជាជីវៈ និងប្រព័ន្ធវិញ្ញាបនបត្រដែលមាន
លក្ខណៈស្ម័គ្រចិត្តសម្រាប់អង្គការមិនមែនរដ្ឋាភិបាល និងរួមបញ្ចូលទាំងការផ្តល់ជូននូវវិញ្ញាបនបត្រទៅដល់អង្គការមិនមែនរដ្ឋាភិបាលមួយចំនួនដែលបានកំណត់ដោយប្រព័ន្ធវិញ្ញាបនបត្រ ដែលមានលក្ខណៈស្ម័គ្រចិត្ត ។
ប្រព័ន្ធវិញ្ញាបនបត្រដែលមានលក្ខណៈស្ម័គ្រចិត្តនេះ គឺផ្អែកទៅលើក្រមនៃគោលការណ៍ជាសីលធម៌ និងបទដ្ឋានអប្បបរមាសម្រាប់អង្គការមិនមែនរដ្ឋាភិបាលនៅក្នុងប្រទេសកម្ពុជា និងការផ្សព្វផ្សាយនូវគោលការណ៍គណនេយ្យភាព និងអភិបាលកិច្ចល្អសម្រាប់អង្គការសង្គមស៊ីវិល។ តាមរយៈប្រព័ន្ធនៃការកំណត់នូវគោលការណ៍សម្រាប់ខ្លួនឯងនេះ អង្គការមិនមែនរដ្ឋាភិបាលមានឧបករណ៍មួយដែលអាចធ្វើឱ្យពួកគេដើរទៅរកគណនេយ្យភាព បង្ហាញពីវិជ្ជាជីវៈ និងការអនុវត្តប្រកបដោយបទដ្ឋានខ្ពស់ និងកសាងនូវសេចក្តីទុកចិត្តពីអ្នកទទួលផល ម្ចាស់ជំនួយ រដ្ឋាភិបាល និងសាធារណជន ក៏ដូចជាបានទទួលនូវជ័យលាភីគំរូក្នុងអភិបាលកិច្ចល្អនៅក្នុងប្រទេសកម្ពុជា ។ អង្គការមិនមែនរដ្ឋាភិបាលចំនួន៨រួមមាន អង្គការនារីខ្មែរ អង្គការជនពិការកម្ពុជា (CDPO) ក្រុមអភិវឌ្ឍន៍ភូមិ (KWAP) ក្រុមអភិវឌ្ឍន៍ជនបទកម្ពុជា (CRDT) អង្គការយេនឌ័រ និងអភិវឌ្ឍន៍ដើម្បីកម្ពុជា (GADC) សមាគមអភិវឌ្ឍន៍កុមារ (CDA) អង្គការអភិវឌ្ឍន៍ភូមិយើង (ODOV) និងភ្នាក់ងារអភិវឌ្ឍន៍សេដ្ឋកិច្ច និងកសិកម្មជនបទ (READA) ត្រូវបានផ្តល់ជូននូវវិញ្ញាបនបត្រ ហើយមានអង្គការចំនួន៣ទៀតបានផ្តល់នូវវិញ្ញាបនបត្រជាថ្មីឡើងវិញគឺវិទ្យាស្ថានបម្រើអ្នក សម្របសម្រួលការងារអភិវឌ្ឍន៍ (VBNK) អង្គការមិត្តសំឡាញ់ និងមជ្ឈមណ្ឌលសហសង្គ្រោះកម្ពុជា (SCC) ។ អង្គការទាំងនេះនឹងផ្សព្វផ្សាយជាសាធារណៈនូវគោលជំហររបស់ពួក គេចំពោះអភិបាលកិច្ចល្អ និងការប្រតិបត្តិការប្រកបដោយវិជ្ជាជីវៈ ។
អភិបាលកិច្ច និងការប្រតិបត្តិការប្រកបដោយវិជ្ជាជីវៈស្ថិតក្រោមការសម្របសម្រួលរបស់គណៈកម្មាធិការសហប្រតិបត្តិការ ដើម្បីកម្ពុជា (CCC) ដែលរហូតមកដល់ពេលនេះ អង្គការមិនមែនរដ្ឋាភិបាលចំនួន១០២បានដាក់ពាក្យស្នើសុំវិញ្ញាបនបត្រដែលមានតែអង្គការចំនួន៣១ ត្រូវបានផ្តល់ជូននូវវិញ្ញាបនបត្រនេះ។
វេទិកាអ្នកពាក់ព័ន្ធពហុភាគីប្រចាំឆ្នាំ និងពិធីផ្តល់វិញ្ញាបនបត្រនឹងត្រូវរៀបចំក្រោមអធិបតីភាពដ៏ខ្ពង់ខ្ពស់របស់លោកងី ច័ន្ទ្រផល រដ្ឋេលខាធិការក្រសួងមហាផ្ទៃ ជាប្រធានសម្របសម្រួលគម្រោងអភិបាលកិច្ចល្អមូលដ្ឋានក្រសួងមហាផ្ទៃ និងជាអនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្មជនបទ និងមានការចូលរួមជាវាគ្មិនកិត្តិយសផងដែរពីសំណាក់លោកស្រី Felicidad I. Soledad ជាអតីតនាយិកាប្រតិបត្តិការរបស់ក្រុមប្រឹក្សាវិញ្ញាបនបត្រសម្រាប់អង្គការមិនមែនរដ្ឋាភិបាលប្រទេសហ្វ៊ីលីពីន និងមានការចូលរួមពីអ្នកឯកទេសផ្នែកវិញ្ញាបនបត្រជាច្រើនទៀត ៕
ចែករំលែកព័តមាននេះ