កីឡាការិនីវ័យក្មេងអាមេរិកឡិចស៊ី ថំសុនបានសម្តែងនូវក្តីសប្បាយរីករាយជាខ្លាំងបន្ទាប់ពីនាងបំបែកបាននូវកញ្ចប់ទឹកប្រាក់រង្វាន់សរុប១លាននិង៣សែនដុល្លារអាមេរិកយកឈ្នះពានជើងឯកកម្មវិធី Navistar LPGA Classicនៅ Prattville រដ្ឋអាឡាបាម៉ាសហរដ្ឋអាមេរិកកាលពីថ្ងៃអាទិត្យទី១៨កញ្ញាកន្លងមកនេះ។
កីឡាការិនីវ័យក្មេងអាមេរិកឡិចស៊ី ថំសុនបានសម្តែងនូវក្តីសប្បាយរីករាយជាខ្លាំងបន្ទាប់ពីនាងបំបែកបាននូវកញ្ចប់ទឹកប្រាក់រង្វាន់សរុប១លាននិង៣សែនដុល្លារអាមេរិកយកឈ្នះពានជើងឯកកម្មវិធី Navistar LPGA Classicនៅ Prattville រដ្ឋអាឡាបាម៉ាសហរដ្ឋអាមេរិកកាលពីថ្ងៃអាទិត្យទី១៨កញ្ញាកន្លងមកនេះ។
ជាមួយនឹងពិន្ទុ២អាន់ឌ័រប៉ា ៧០នៅជុំផ្តាច់ព្រ័ត្រនាំឲ្យនាងថំសុនវ័យ១៦ឆ្នាំអាចបំបាក់បានកីឡាការិនីមិត្តរួមជាតិទីហ្វានី ចូ យកឈ្នះពានជើងឯកជាលើកទី១នៅក្នុងរដូវកាលប្រកួតឆ្នាំ២០១១នេះជាស្ថាពរ។ សរុបលទ្ធផលប្រកួត៤នាងឡិចស៊ី ថំសុនធ្វើបាន១៧អាន់ឌ័រ ២៧១និងទទួលបានទឹកប្រាក់រង្វាន់១៩ម៉ឺននិង៥ពាន់ដុល្លារអាមេរិក ។
ថ្លែងបន្ទាប់ពីទទួលបានពានជើងឯកនាងថំសុនបានបញ្ជាក់ថា៖«នេះជាការប្រកួតយ៉ាងល្អមួយ តែយ៉ាងណាអ្នកឈ្នះគឺមានតែ១ប៉ុណ្ណោះហើយខ្ញុំសប្បាយចិត្តដែលជននោះគឺជារូបខ្ញុំ ។ ការប្រកួតរបស់ខ្ញុំពិតជាល្អខ្លាំងណាស់ក្នុងថ្ងៃនេះ។ ខ្ញុំសប្បាយចិត្តខ្លាំងមែនទែន។ ការប្រកួតនៅកម្មវិធីបន្ទាប់ទៀត ខ្ញុំនឹងធ្វើឲ្យបានល្អជាងនេះ។ ចាប់ផ្តើមប្រកួតដំបូងខ្ញុំដូចជាភ័យបន្តិចបន្តួចដែរ» ។ កាលពីឆ្នាំ២០០៩នៅពេលដែលនាងមានអាយុទើប១៤ឆ្នាំ នាងថំសុនធ្លាប់បានយកឈ្នះជុំទី២កម្មវិធី Navistar LPGA Classicនេះ។ ប៉ុន្តែបន្ទាប់ពីបញ្ចប់ការប្រកួតអស់៤ជុំនាងដណ្តើមបានចំណាត់ថ្នាក់ត្រឹមលេខ២៧ប៉ុណ្ណោះ។ ដោយឡែកឆ្នាំកន្លងទៅនេះនាងធ្វើបានល្អគួរសមដោយបានបញ្ចប់ការប្រកួតក្នុងលំដាប់ទី១៦។
នាងចូដែលធ្វើបានលទ្ធផល១២អាន់ឌ័រ ២៧៦នោះទទួលបានទឹកប្រាក់រង្វាន់ជាង១២ម៉ឺនដុល្លារអាមេរិកខណៈនាងអ៊ែនជេឡា ស្ទែនហ្វតបញ្ចប់ការប្រកួតក្នុងចំណាត់ថ្នាក់លេខ៣ទទួលបានទឹកប្រាក់រង្វាន់៨ម៉ឺននិង៧ពាន់ដុល្លារ។ ឆ្លងកាត់ការប្រកួត៤ជុំនាងធ្វើបានលទ្ធផល១១អាន់ឌ័រ ២៧៧។ ចំណែកនាងប្រ៊ីតាលី ឡាងដែលបញ្ចប់ការប្រកួតស្ថិតនៅចំណាត់ថ្នាក់ទី៤ស្ទួនជាមួយនឹងនាងការ៉ឹន ស្តាប់ផលក្នុងលទ្ធផលសរុប១០អាន់ឌ័រ២៧៨ទទួលបានទឹកប្រាក់រង្វាន់ក្នុងម្នាក់ៗ ជាង៦ម៉ឺនដុល្លារអាមេរិក ។
ដោយឡែកការប្រកួតក្នុងក្របខណ្ឌទេសចរណ៍អាស៊ីកម្មវិធី Macau Open នៅកោះម៉ាកាវប្រទេសចិនក្នុងថ្ងៃជាមួយគ្នានេះដែរ កីឡាករចិនតៃវ៉ាន់ចាន់ យីស៊ីនបានយកឈ្នះពានជើងឯកបន្ទាប់ពីធ្វើបានលទ្ធផលសរុប១៤អាន់ឌ័រ២៧០និងទទួលបានទឹកប្រាក់រង្វាន់ជាង១១៨ពាន់ដុល្លារអាមេរិក។
ថ្លែងបន្ទាប់ពីទទួលបានជ័យជម្នះ កីឡាករចាន់ យីស៊ីនដែលមានវ័យទើប៣៤ឆ្នាំបានថ្លែងថា៖ «ខ្ញុំស្ទើរតែមិនជឿថា អាចយកឈ្នះការប្រកួតលើកនេះ។ ការប្រកួតនៅ៩ឡូដំបូងគឺពិតជាពិបាកបន្តិច។ ប៉ុន្តែខ្ញុំធ្វើបានល្អលើការវាយចំណិតត្រសក់យកពិន្ទុបឺឌី។ ពេញមួយសប្តាហ៍នេះការវាយកូនបាល់បញ្ចូលឡូរបស់ខ្ញុំពិតជាបានល្អគួរសម។ ហើយខ្ញុំពិតជាសប្បាយចិត្តរកអ្វីផ្ទឹមគ្មាននៅពេលដែលបានយកឈ្នះពានកម្មវិធីនេះសាជាថ្មី»។
ក្នុងពេលជាមួយគ្នានេះដែរនៅទីលានប្រកួតក្រុងឡេម៉ុន រដ្ឋអ៊ីលីណយសហរដ្ឋអាមេរិក កីឡាករអង់គ្លេសយ៉ាស្ទីន រ៉ូសបានយកឈ្នះជើងឯកនៃកម្មវិធីប្រកួត BMW Championship ដែលមានទឹកប្រាក់រង្វាន់មហាសាលដល់ទៅ៨លានដុល្លារអាមេរិក។ ឆ្លងកាត់៤ជុំប្រកួតកីឡាកររ៉ូសធ្វើបានលទ្ធផលសរុប១៣អាន់ឌ័រប៉ា២៧១នាំមុខ២ស្រ្តូកលើកីឡាករអូស្ត្រាលីចន សេនដេនដែលធ្វើបាន ១១អាន់ឌ័រប៉ា ២៧៣។
កីឡាករអូស្ត្រាលីជីអហ្វ អូហ្គីលវីឆ្លងកាត់៤ជុំប្រកួតធ្វើបាន១០អាន់ឌ័រ ប៉ា ២៧៤ស្ថិតនៅចំណាត់ថ្នាក់លេខ៣នាំមុខកីឡាករអង់គ្លេសលុក ដូណាល់ដែលបញ្ចប់ការប្រកួតដណ្តើមបានត្រឹមចំណាត់ថ្នាក់លេខ៤។ ចំពោះទឹកប្រាក់រង្វាន់វិញ រ៉ូសដែលជាជើងឯកទទួលបាន១លាននិង៤៤ម៉ឺនដុល្លារ ខណៈកីឡាករសេនដេនទទួលបាន៨៦ម៉ឺននិង៤ពាន់។ ចំណែកជ័យលាភីលេខ៣កីឡាករអូហ្គីលវីទទួលបាន៥៤ម៉ឺននិង៤ពាន់ដុល្លារ ៕
ចែករំលែកព័តមាននេះ