ប្រទេសអារ៉ាប៊ីសាអូឌីត ៖ កំពូលកីឡាករបាល់ទាត់ Cristiano Ronaldo និងមិត្តស្រី Georgina Rodríguez បានជួលអង្គរក្សការពារបន្ថែម ហើយក៏បានផ្លាស់ទៅនៅផ្ទះថ្មី…
ប្រទេសអារ៉ាប៊ីសាអូឌីត ៖ កំពូលកីឡាករបាល់ទាត់ Cristiano Ronaldo និងមិត្តស្រី Georgina Rodríguez បានជួលអង្គរក្សការពារបន្ថែម ហើយក៏បានផ្លាស់ទៅនៅផ្ទះថ្មី បន្ទាប់ពីទទួលបានសារគំរាមកំហែងជាបន្តបន្ទាប់ ដែលជំរុញឱ្យមានការអន្តរាគមន៍ពីប៉ូលិស ដើម្បីធានាសុវត្ថិភាពដល់ក្រុមគ្រួសារកីឡាកររូបនេះ។
ចាប់តាំងពីផ្លាស់ទៅរស់នៅទីក្រុងរីយ៉ាដ ប្រទេសអារ៉ាប៊ីសាអូឌីត ដើម្បីក្របអាជីពជាមួយក្លិប Al-Nassr នៃលីគកំពូលប្រទេសស្តេចប្រេងមួយនេះ ជីវីតឯកជនរបស់ Ronaldo និង Georgina ទទួលបានភាពរីករាយ និងបទពិសោធន៍ថ្មីមួយទៀត។ ប៉ុន្តែទោះយ៉ាងណាក៏ដោយ ប្រព័ន្ធផ្សព្វផ្សាយព័រទុយហ្គាល់ និងអេស្ប៉ាញ បានរាយការណ៍ថា កាលពីពេលថ្មីៗនេះ គ្រួសារសមាជិក៧នាក់របស់ប្រធានក្រុមជម្រើសជាតិព័រទុយហ្គាល់វ័យ៤០ឆ្នាំរូបនេះ ទទួលបានសារប្រកាសការគំរាមកំហែងជាញឹកញាប់ ដែលរំខានដល់ជីវិតឯកជនរបស់ពួកគេ។
ប្រភពពី EDATV បានរាយការណ៍ថា ឥឡូវនេះ គ្រួសារ Ronaldo បានបន្ថែមអង្គរក្ស និងសន្តិសុខការពារផ្ទះ ដោយជួលអង្គរក្សថ្មី៤នាក់ និងសន្តិសុខ២នាក់បន្ថែមទៀត។ គ្រួសារអតីតខ្សែប្រយុទ្ធឆ្នើមក្រុម Sporting Lisbon, Manchester United, Real Madrid និង Juventus រូបនេះ ក៏បានផ្លាស់ទីលំនៅទៅកាន់ផ្ទះមានសុវត្ថិភាពជាងមុនក្នុងទីក្រុងរីយ៉ាដ ដែលបំពាក់ដោយប្រព័ន្ធការពារ និងឃ្លាំមើលដ៏ទំនើបបំផុត។
ជីវិតឯកជនប្រចាំថ្ងៃរបស់ Georgina ក៏ផ្លាស់ប្តូរទាំងស្រុង ព្រោះឥឡូវនេះ នាងមានដែនកំណត់បង្ហាញខ្លួននៅទីសាធារណៈ ហើយតែងតែត្រូវអមដោយក្រុមអង្គរក្សជាប់ជានិច្ច។ ចំណែក Ronaldo ក៏មានការប្រុងប្រយ័ត្នខ្ពស់ពេលចេញទៅក្រៅផងដែរ ដោយតែងមានក្រុមអង្គរក្សនៅជាមួយគ្រប់ទីកន្លែង។
ប្រភពពី E-Notícies បានរាយការណ៍ថា ប៉ូលិសអារ៉ាប៊ីសាអូឌីតកំពុងស៊ើបអង្កេតប្រភពដើមនៃសារគំរាមកំហែងទាំងអស់។ ក្រឡេកទៅក្លិប Al Nassr ក៏កំពុងផ្តល់ផ្នែកធនធានដើម្បីការពារ Ronaldo និងគ្រួសាររបស់គេ។ Ronaldo និង Georgina ក៏បានបដិសេធមិនចែករំលែករូបភាពកូនៗពួកគេលើប្រព័ន្ធបណ្តាញសង្គម ដោយសារការភ័យខ្លាចថា ពួកគេអាចជាគោលដៅរបស់ក្រុមឧក្រិដ្ឋជន។
ជាក់ស្តែង អំឡុងពេលប្រារព្ធខួបកំណើត Ronaldo កាលពីដើមខែកុម្ភៈ Georgina បានដាក់សញ្ញាបេះដូង (Emoji) បិទរូបមុខកូនៗ លើកលែងតែកូនប្រុសច្បង Cristiano Jr.។ មិនតែប៉ុណ្ណោះ Georgina ដែលជាតារាម៉ូដែល នៅតែបន្តការងារនាង ប៉ុន្តែជៀសវាងការអត្ថាធិប្បាយណាមួយជាសាធារណៈពីបញ្ហានេះ។ គូស្នេហ៍មួយគូនេះ មិនចង់ចេញសេចក្តីថ្លែងការណ៍ពីបញ្ហានេះទេ ព្រោះអាទិភាពចម្បងគឺការពារកូនៗរបស់ពួកគេ៕
ចែករំលែកព័តមាននេះ