ប្រទេសម៉ាសេដ្វានខាងជើង ៖ ប្រភពពីសារព័ត៌មាន People បានរាយការណ៍ថា កីឡាករបាល់ទាត់អាជីព Andrej Lazarov គឺមនុស្សម្នាក់ស្ថិតក្នុងចំណោមអ្នកស្លាប់ក្នុងហេតុការណ៍អគ្គីភ័យឆេះក្លិបកម្សាន្តរាត្រីមួយកន្លែងក្នុងប្រទេសម៉ាសេដ្វានខាងជើង (North…
ប្រទេសម៉ាសេដ្វានខាងជើង ៖ ប្រភពពីសារព័ត៌មាន People បានរាយការណ៍ថា កីឡាករបាល់ទាត់អាជីព Andrej Lazarov គឺមនុស្សម្នាក់ស្ថិតក្នុងចំណោមអ្នកស្លាប់ក្នុងហេតុការណ៍អគ្គីភ័យឆេះក្លិបកម្សាន្តរាត្រីមួយកន្លែងក្នុងប្រទេសម៉ាសេដ្វានខាងជើង (North Macedonia) បន្ទាប់ពីរូបគេបានព្យាយាមជួយសង្គ្រោះជីវិតអ្នកផ្សេងទៀតពីអណ្តាតភ្លើងដ៏សន្ធោសន្ធៅ កាលពីថ្ងៃទី១៦ ខែមីនា ឆ្នាំ២០២៥។
នៅក្នុងការបង្ហោះសារលើបណ្តាញសង្គមហ្វេសប៊ុក ក្លិបបាល់ទាត់ FC Shkupi នៃលីគកំពូលម៉ាសេដ្វានខាងជើង (Prva Liga) បានចែករំលែកដំណឹងដ៏រន្ធត់ និងទុក្ខសោកយ៉ាងខ្លាំង បន្ទាប់ពីខ្សែបម្រើ Andrej Lazarov វ័យ២៥ឆ្នាំ ត្រូវបានបញ្ជាក់ថាស្ថិតក្នុងចំណោមអ្នកស្លាប់ក្នុងហេតុការណ៍អគ្គិភ័យឆេះក្លិបកម្សាន្ត Pulse ស្ថិតនៅទីក្រុង Kocani ភាគខាងកើត ប្រទេសម៉ាសេដ្វានខាងជើង ។
ក្លិបបានអះអាងថា «Andrej Lazarov បានស្លាប់ដោយសារស្រូបផ្សែង អំឡុងពេលរូបគេព្យាយាមជួយសង្គ្រោះជីវិតអ្នកផ្សេងទៀតនៅក្នុងក្លិប។ Lazarov បានបង្ហាញការលះបង់ និងភាពអង់អាចក្លាហានរបស់គេរហូតដល់វិនាទីចុងក្រោយ ខណៈសកម្មភាព និងវីរភាពដ៏អង់អាចនេះ នឹងនៅតែស្ថិតក្នុងការចងចាំរបស់យើងជានិច្ច ហើយនេះគឺជាការបាត់បង់ដ៏ធំមួយសម្រាប់ក្លិប មិត្តរួមក្រុម និងសហគមន៍បាល់ទាត់ទាំងមូល»។
ខ្សែបម្រើដែលបង្ហាញខ្លួនឱ្យក្រុមជម្រើសជាតិម៉ាសេដ្វានខាងជើងអាយុក្រោម២១ឆ្នាំរូបនេះ ចូលរួមជាមួយក្លិប FC Shkupi បានរយៈពេល៦ខែហើយ ចាប់តាំងផ្លាស់មកពីក្លិប HNK Gorica នៃលីគកំពូលក្រូអាត ដោយបង្ហាញខ្លួនបាន៨ប្រកួត។
នៅក្នុងសន្និសីទសារព័ត៌មានមួយដែលត្រូវបានចែករំលែកដោយសារព័ត៌មានក្នុងស្រុក MIA News បានឱ្យដឹងថា រដ្ឋមន្ត្រីក្រសួងមហាផ្ទៃប្រទេសមម៉ាសេដ្វានខាងជើ លោក Panche Toshkovskithe បានថ្លែងថា អគ្គីភ័យបានឆាបឆេះនៅក្លិប Pulse ក្នុងទីក្រុង Kocani នៅម៉ោងប្រហែល៣ទៀបភ្លឺ ឈានចូលកាលពីថ្ងៃទី១៦ ខែមីនា ឆ្នាំ២០២៥ ដែលមានមនុស្សចូលរួមប្រមាណ៥០០នាក់។ យ៉ាងហោចណាស់មនុស្ស៥៩នាក់បានស្លាប់ និង១៥៥នាក់ផ្សេងទៀតរងរបួស។ សេចក្តីរាយការណ៍បានឱ្យដឹងថា អគ្គិភ័យបង្កឡើងដោយសារកាំជ្រួចភ្លើង ដែលបានប្រើក្នុងពេលប្រគំតន្ត្រី ហើយបណ្តាលឱ្យឆាបឆេះរាលដាលជាបន្ត។
ហេតុការណ៍កើតឡើងនៅទីក្រុង Kocani គឺជាឧបទ្ទវហេតុភ្លើងឆេះក្លិបកម្សាន្តដ៏អាក្រក់បំផុតក្នុងប្រវត្តិសាស្ត្រម៉ាសេដ្វានខាងជើង និងអាក្រក់បំផុតនៅអឺរ៉ុប ចាប់តាំងពីហេតុការណ៍ភ្លើងឆេះក្លិបកម្សាន្ត Bucharest ប្រទេសរូម៉ានី កាលពីឆ្នាំ ២០១៥៕ ប្រភព ៖ People
ចែករំលែកព័តមាននេះ