បរទេស ៖ អ្នកចាំទី Ebrahim Lutfalla របស់​ក្រុម​ជម្រើសជាតិ​បា​រ៉ែ​ន ទាក់ទាញ​ការ​ចាប់អារម្មណ៍​យ៉ាង​ខ្លាំង សម្រាប់​ការ​ប្រកួត​ជម្រុះ​ពានរង្វាន់ FIFA World Cup ឆ្នាំ ២០២៦ ប្រចាំ​ទ្វីបអាស៊ី តាម​រយៈ​រាង​កាយ​ដ៏​ធំ និង​ទម្ងន់​ជាង​១០០​គីឡូ​របស់​គេ​។

អ្នកចាំទី Lutfalla បាន​បង្ហាញ​វត្តមាន​ក្នុង​ការ​ប្រកួត​ដែល​បា​រ៉ែ​ន​បាន​ចាញ់​ម្ចាស់ផ្ទះ​ជប៉ុន ដោយ​លទ្ធផល ២​ទល់​នឹង​០ កាលពី​ថ្ងៃ​ទី​២០ ខែមីនា ឆ្នាំ​២០២៥​។ ក្រៅ​អំពី​ការ​អបអរ​ជ័យជម្នះ​ក្រុម​សាំ​មូ​រ៉ៃ​ក្លាយជា​ប្រទេស​ដំបូង​គេ​មិនមែន​ជា​ម្ចាស់ផ្ទះ​ព្រឹត្តិការណ៍ (Non-host) កក់​កៅអី​ជុំ​ផ្តាច់ព្រ័ត្រ​ព្រឹត្តិការណ៍ World Cup ឆ្នាំ ២០២៦ ដែល​មាន​សហ​ម្ចាស់ផ្ទះ​កា​ណា​ដា ម៉ិ​ក​ស៊ិ​ក និង​សហរដ្ឋអាមេរិក​រង់ចាំ​ស្រេច​នោះ ប្រព័ន្ធ​ផ្សព្វផ្សាយ​ជប៉ុន​និង​បរទេស​ជា​ច្រើន​ក៏​ចាប់អារម្មណ៍​ខ្លាំង​លើ​អ្នក​ចាំ​បា​រ៉ែ​ន​ផង​ដែរ​។

អ្នកចាំទី Lutfalla វ័យ​៣២​ឆ្នាំ​មាន​កម្ពស់ ១.៨២​ម៉ែត្រ និង​ទម្ងន់​១០៧​គីឡូក្រាម បច្ចុប្បន្ន​កំពុង​លេង​ឱ្យ​ក្លិប Al-Muharraq សមាជិក​លី​គ​កំពូល​បា​រ៉ែ​ន​។ Lutfalla បាន​បង្ហាញខ្លួន ៣០​ប្រកួត​ហើយ​សម្រាប់​បា​រ៉ែ​ន ចាប់តាំងពី​ត្រូវ​បាន​កោះហៅ​ជា​លើក​ដំបូង​នៅ​ក្នុង​ឆ្នាំ ២០១៣​។ អ្នកចាំទី​លេចធ្លោ​ខ្លាំង​ដោយសារ​តែ​កាយសម្បទា​របស់​ខ្លួន​រូប​នេះ បាន​ឈ្នះ​ពានរង្វាន់​អ្នកចាំទី​ល្អ​បំផុត​ប្រចាំ​ព្រឹត្តិការណ៍ ក្រោយ​រួមចំណែក​ជួយ​បា​រ៉ែ​ន​ឈ្នះ​ជើងឯក​ពានរង្វាន់ Arabian Gulf Cup រដូវ​កាល ២០២៤-២៥ កាលពី​ថ្មី​ៗ​នេះ​។

អ្នកគាំទ្រ​ជប៉ុន​ជា​ច្រើន​ដែល​ទស្សនាការ​ប្រកួត​ទល់​នឹង​បា​រ៉ែ​ន កាលពី​ថ្ងៃ​ទី​២០ ខែមីនា ឆ្នាំ​២០២៥ កន្លង​ទៅ បាន​ផ្តោត​ការ​ចាប់អារម្មណ៍​ពួក​គេ​លើ​រាង​កាយ Lutfalla ដោយ​បាន​ប្រៀបធៀប​អ្នកចាំទី​រូប​នេះ ទៅ​នឹង​បណ្តា​តួអង្គ​តុក្កតា​ដែល​មាន​រាង​កាយ​ដ៏​ធំ​ថែម​ទៀត​ផង​។

សូម​ជម្រាប​ជូន​ថា ជប៉ុន​ក្រោម​ការ​ដឹកនាំ​របស់​លោកគ្រូ​បង្វឹក Hajime Moriyasu បាន​បញ្ចប់​នៅ​កំពូល​តារាង​ពូ​ល B ការ​ប្រកួត​ជម្រុះ​ជុំ​ទី​២ World Cup ឆ្នាំ ២០២៦ ប្រចាំ​ទ្វីបអាស៊ី ជាមួយ​កំណត់​ត្រា​ឈ្នះ​ទាំង​៦​ប្រកួត (​លេង​ចំនួន​២​ជើង​) លើ​កូរ៉េ​ខាងជើង ស៊ី​រី និង​មី​យ៉ា​ន់​ម៉ា ដោយ​ស៊ុត​បញ្ចូល​ទី​បាន​២៤​គ្រាប់ និង​មិន​របូត​សូ​ម្បី​តែ​១​គ្រាប់​។

ឈាន​ដល់​ការ​ប្រកួត​ជម្រុះ​ជុំ​ទី​៣ ជប៉ុន​ដែល​ឈ្នះ​កៅអី World Cup ឆ្នាំ ២០២៦ ដោយ​ស្វ័យប្រវត្តិ​នោះ ក៏​កំពុង​បន្ត​ឈរ​នៅ​កំពូល​តារាង​ពូ​ល C ក្រោយ​ឆ្លងកាត់​៧​ប្រកួត ឈ្នះ ៦ និង​ស្មើ ១ មាន​១៩​ពិន្ទុ តាម​ពីក្រោយ​ដោយ​អូស្ត្រាលី​មាន​១០​ពិន្ទុ អា​រ៉ា​ប៊ី​សា​អូឌីត​មាន​៩​ពិន្ទុ និង​ឥណ្ឌូ​ណេ​ស៊ី បា​រ៉ែ​ន និង​ចិន ដែល​មាន​៦​ពិន្ទុ​ស្មើគ្នា ដ្បិត​សល់​៣​ប្រកួត​ទៀត ទើប​បញ្ចប់​ការ​ប្រកួត​។ ការ​ប្រកួត​បន្ទាប់ នៅ​ថ្ងៃ​ទី​២៥ ខែមីនា ជប៉ុន​ត្រូវ​ទទួល​អា​រ៉ា​បី​សា​អូឌីត រីឯ​អូស្ត្រាលី​ទៅ​សួរសុខទុក្ខ​ចិន ខណៈ​ដែល​ឥណ្ឌូ​ណេ​ស៊ី​ត្រូវ​ស៊ីសង​គ​ញ​នា​ជាមួយនឹង​បា​រ៉ែ​ន​លើ​ទឹកដី​ខ្លួន​។

គួរ​បញ្ជាក់​ថា ព្រឹត្តិការណ៍ FIFA World Cup ឆ្នាំ ២០២៦ ចាប់ផ្តើម​អនុវត្ត​ទម្រង់​ថ្មី​របស់​ខ្លួន ដោយ​បាន​បង្កើន​ក្រុម​ពី​៣២​ក្រុម​រហូត​ដល់ ៤៨​ក្រុម​ជា​លើក​ដំបូង​ក្នុង​ប្រវត្តិសាស្ត្រ​។ ទម្រង់​ថ្មី​នេះ ទ្វីបអាស៊ី​ទទួល​បាន​៨​កៅអី​កន្លះ ដោយ​កៅអី​ស្វ័យប្រវត្តិ​ចំនួន ៨ និង​កន្លះ​កៅអី​ឆ្លងកាត់​ការ​ប្រកួត​អន្តរទ្វីប ដើម្បី​ប្រជែង​យក​១​កៅអី ដែល​ខុស​ពី​ការ​ប្រកួត​មុន ទ្វីបអាស៊ី​បាន​ត្រឹមតែ​៤​កៅអី​កន្លះ​ប៉ុណ្ណោះ​៕ ដកស្រង់ ៖ Znews