អន្តរជាតិ ៖ លោក Louis Saha អតីតខ្សែប្រយុទ្ធឆ្នើម Manchester United បានបង្កើនទ្រព្យសម្បត្តិរបស់ខ្លួនច្រើនជាងរហូតដល់ទៅ៧ដង បើធៀបនឹងអតីតមិត្តរួមក្រុមរបស់លោក…
អន្តរជាតិ ៖ លោក Louis Saha អតីតខ្សែប្រយុទ្ធឆ្នើម Manchester United បានបង្កើនទ្រព្យសម្បត្តិរបស់ខ្លួនច្រើនជាងរហូតដល់ទៅ៧ដង បើធៀបនឹងអតីតមិត្តរួមក្រុមរបស់លោក គឺខ្សែប្រយុទ្ធ Cristiano Ronaldo ដោយសារតែភាពជោគជ័យជំនួញនៅក្នុងដៃ។
បន្ទាប់ពីចូលនិវត្តននៅឆ្នាំ ២០១៣ លោក Louis Saha បានបង្កើតក្រុមហ៊ុន AxisStars ដែលជាវេទិកាកម្សាន្ត និងមុខជំនួញ សម្រាប់អតីតអត្តពលិកអាជីព ព្រមទាំងអត្តពលិក ដោយផ្តល់ឱ្យអត្តពលិកចែករំលែកបទពិសោធន៍ និងទំនាក់ទំនងជាមួយអ្នកជំនាញមកពីឧស្សាហកម្មផ្សេងៗគ្នា។
ហើយរហូតមកទល់នឹងពេលនេះ មានអតីតអត្តពលិកប្រមាណ ៥៥០នាក់ហើយដែលបានចូលរួម។
បុរសវ័យ៤៦ឆ្នាំរូបនេះ បានថ្លែងប្រាប់កាសែត The Guardian យ៉ាងដូច្នេះថា «ខ្ញុំនៅតែត្រូវបានស្នើសុំឱ្យផ្តល់ដំបូន្មានពីមនុស្សផ្សេង»គ្នាជារៀងរាល់ថ្ងៃ។ ឧទាហរណ៍ ភ្នាក់ងាររបស់ខ្ញុំបានទូរស័ព្ទមកខ្ញុំ ដើម្បីនិយាយថាពួកគេមានកីឡាករបាល់ទាត់បារាំងពោរពេញដោយទេពកោសល្យ ដែលពួកគេចង់នាំកីឡាកររូបនោះទៅប្រទេសអង់គ្លេស ហើយបានសុំដំបូន្មានពីខ្ញុំអំពីរបៀបបង្កើតកម្មវិធីហ្វឹកហាត់។ ដូច្នេះហើយខ្ញុំបានឱ្យពួកគេទាក់ទងទៅមនុស្សដែលខ្ញុំធ្លាប់ធ្វើការជាមួយ»។
លោកបានបន្ថែមថា «កីឡាករទេពកោសល្យបែបនេះ អាចចូលរួមជាមួយ Axis ប្រៀបដូចជាគេអាចស្វែងរកគ្រូបង្វឹកផ្ទាល់ខ្លួននៅក្នុងតំបន់របស់គេរស់នៅអ៊ីចឹង។ វាជាដំណើរការដ៏លំបាកមួយ ប៉ុន្តែវាពិតជាផ្តល់លទ្ធផលខ្លាំងណាស់ត្រឡប់មកវិញ ព្រោះប្រសិនបើខ្ញុំអាចជួយមនុស្សបាន ១០ម៉ឺននាក់ នោះវាជារឿងល្អបំផុតដែលខ្ញុំបានធ្វើ»។
កាសែត Daily Mail បានរាយការណ៍ថា ឥឡូវនេះ តម្លៃក្រុមហ៊ុនរបស់ Louis Saha បានកើនឡើងរហូតដល់ ៥,៦ពាន់លានដុល្លារអាមេរិក ហើយតម្លៃនេះបានវ៉ាដាច់ទ្រព្យសម្បត្តិរបស់អតីតមិត្តរួមក្រុម Cristiano Ronaldo ដែលត្រូវបានប៉ាន់ប្រមាណមានចំនួន ៧៨០លានដុល្លារ និងកំពុងឈរជាអត្តពលិករកចំណូលបានខ្ពស់ជាងគេបំផុតក្នុងរយៈពេលពីរឆ្នាំចុងក្រោយនេះ។
Saha និង Ronaldo ធ្លាប់ជាមិត្តរួមក្រុម Man Utd ចាប់ពីឆ្នាំ ២០០៤ ដល់ ២០០៨ ដោយបានឈ្នះពានរង្វាន់ Champions League, English Premier League ២ដង និង League Cup ជាមួយគ្នា។ មិនត្រឹមតែប៉ុណ្ណោះ ទ្រព្យសម្បត្តិរបស់ Saha ក៏បានវ៉ាដាច់កញ្ចប់ថវិកាចំនួន ២,៦ពាន់លានដុល្លារអាមេរិក ដែលក្លិប Man Utd កំណត់សម្រាប់ការសាងសង់កីឡដ្ឋានថ្មីរបស់ខ្លួន។
ទោះជាយ៉ាងណាក៏ដោយ Louis Saha មិនមែនជាអតីតកីឡាករបាល់ទាត់តែម្នាក់គត់ ដែលក្លាយជាមហាសេដ្ឋី ក្រោយចូលនិវត្តន៍នោះទេ។ ជាក់ស្តែង អតីតខ្សែបម្រើបារាំង លោក Mathieu Flamini សហស្ថាបនិកក្រុមហ៊ុន GF Biochemicals ដែលជាក្រុមហ៊ុន ផលិតអាស៊ីត Levulinic ដ៏ធំជាងគេនៅលើពិភពលោក ហើយបច្ចុប្បន្នក្រុមហ៊ុននេះមានតម្លៃជាង ២៧ពាន់លានដុល្លារអាមេរិក។
អតីតខ្សែបម្រើឆ្នើមវ័យ៤១ឆ្នាំរូបនេះ ធ្លាប់លេងឱ្យក្រុម Marseille, Arsenal, AC Milan និង Crystal Palace មុនពេលចូលនិវត្តន៍នៅក្រុម Getafe ក្នុងឆ្នាំ ២០១៩។ ពេញមួយអាជីពរបស់ Mathieu Flamini បានឈ្នះពានរង្វាន់ FA Cup ៣ដង និង Serie A ១ដង ក៏ដូចជាឈានដល់វគ្គផ្តាច់ព្រ័ត្រពានរង្វាន់ Champions League ឆ្នាំ ២០០៦ ជាមួយកាំភ្លើងធំ Arsenal ផងដែរ៕ ប្រភព ៖ VnExpress
ចែករំលែកព័តមាននេះ