ប្រទេសដាណឺម៉ាក ៖ សកម្មភាពអបអរគ្រាប់ជ័យជម្នះរបស់ខ្សែប្រយុទ្ធឆ្នើមដាណឺម៉ាក Rasmus Hojlund លើក្រុមជម្រើសជាតិព័រទុយហ្គាល់ កាលពីយប់មិញ កំពុងក្លាយជាប្រធានបទដ៏ក្តៅលើបណ្តាញទំនាក់ទំនងសង្គម។ ដាណឺម៉ាកបានយកឈ្នះព័រទុយហ្គាល់ ដោយលទ្ធផល…
ប្រទេសដាណឺម៉ាក ៖ សកម្មភាពអបអរគ្រាប់ជ័យជម្នះរបស់ខ្សែប្រយុទ្ធឆ្នើមដាណឺម៉ាក Rasmus Hojlund លើក្រុមជម្រើសជាតិព័រទុយហ្គាល់ កាលពីយប់មិញ កំពុងក្លាយជាប្រធានបទដ៏ក្តៅលើបណ្តាញទំនាក់ទំនងសង្គម។
ដាណឺម៉ាកបានយកឈ្នះព័រទុយហ្គាល់ ដោយលទ្ធផល ១ទល់នឹង០ ការប្រកួតជើងទី១ វគ្គ៨ក្រុមចុងក្រោយ ពានរង្វាន់ UEFA Nations League រដូវកាល ២០២៤-២៥ ដែលស៊ុតបញ្ចូលទីដោយខ្សែប្រយុទ្ធវ័យក្មេង Rasmus Hojlund នៅក្នុងនាទី៧៨។ អ្វីដែលកាន់តែចាប់អារម្មណ៍ពីស៊ុតបញ្ចូលទីរបស់ខ្សែប្រយុទ្ធវ័យ២២ឆ្នាំរបស់ក្រុមបិសាចក្រហម Manchester United រូបនេះ នៅពេលរូបគេបានអបអរគ្រាប់បាល់ជ័យជម្នះ ដោយប្រើស្ទាយអបអរ «Siuuu» របស់ប្រធានក្រុមព័រទុយហ្គាល់ គឺខ្សែប្រយុទ្ធឆ្នើម Cristiano Ronaldo ដែលកំពុងស្ថិតលើទីលានជាមួយគ្នានោះ។
ការអបអររបស់ខ្សែប្រយុទ្ធ Rasmus Højlund កំពុងទាក់ទាញប្រតិកម្មពីសំណាក់អ្នកលេងបណ្តាញទំនាក់ទំនងសង្គមជុំវិញពិភពលោក ដោយមកជាមួយទាំងវិជ្ជមាន និងអវិជ្ជមាន។ មតិអវិជ្ជមានភាគច្រើនបានលើកឡើងថា ទង្វើរបស់ Højlund គឺមិនគោរព Ronaldo ទាល់តែសោះ ដែលកំពុងស្ថិតលើទីលាន និងត្រូវក្រុមគូប្រជែងស៊ុតបញ្ចូលទីនាំមុខ។ ចំណែកឯមិតវិជ្ជមានភាគច្រើនក៏បានលើកឡើងថា ដោយសារតែ Ronaldo គឺជានិមិត្តរូបរបស់គេ ទើប Hojlund អបអរដោយប្រើស្ទាយ «Siuuu» របស់ Ronaldo បែបនេះ។
យ៉ាងណាមិញ ក្រោយចប់ការប្រកួត Rasmus Højlund បានធ្វើការបកស្រាយចំពោះការអបអររបស់ខ្លួន ដើម្បីបញ្ចប់ការជជែកដេញដោលគ្នាយ៉ាងដូច្នេះថា «គាត់គឺជាអាយដល (Idol) របស់ខ្ញុំ! ខ្ញុំមិនបានលេងសើចនឹងគាត់នោះទេ។ Cristiano បានជះឥទ្ធិពលយ៉ាងខ្លាំងលើខ្ញុំ និងអាជីពបាល់ទាត់របស់ខ្ញុំ ការស៊ុតបញ្ចូលទីទល់នឹងគាត់ ក៏ដូចជាទល់នឹងព័រទុយហ្គាល់ គឺជារឿងដ៏ធំបំផុតមួយ»។
ជាមួយគ្នានោះ លោក Fabrizio Romano អ្នកកាសែតកីឡាបាល់ទាត់ដ៏ល្បីលើពិភពលោក ក៏បានបង្ហោះសារមួយលើគណនីសង្គមរបស់ខ្លួន អំពីការអត្ថាធិប្បាយកន្លងមករបស់កីឡាករ Rasmus Hojlund ដើម្បីបញ្ជាក់ថា ការលើកឡើងក្រោយចប់ការប្រកួតថ្មីៗរបស់ខ្សែប្រយុទ្ធដាណឺម៉ាករូបនេះ មិនមែនដោះសាយករួចខ្លួនពីការរិះគន់នោះទេ។
ការផ្តល់សម្ភាសន៍កន្លងមក Højlund ធ្លាប់បាននិយាយថា « Cristiano គឺជាអ្វីៗគ្រប់យ៉ាងសម្រាប់ខ្ញុំ។ ខ្ញុំស្រលាញ់បាល់ទាត់ដោយសារតែគាត់ ខ្ញុំបានក្លាយជាអ្នកគាំទ្ររបស់ Man United ដោយសារតែគាត់ ខ្ញុំចាប់ផ្តើមហ្វឹកហាត់ដោយខ្លួនឯងដោយសារតែគាត់ ខ្ញុំចាប់ផ្តើមអាវ៉ង់ (Push-ups & Sit-ups) ជារៀងរាល់ថ្ងៃមុនពេលខ្ញុំចូលគេង ដោយសារតែគាត់ ព្រោះខ្ញុំចង់ក្លាយជា Cristiano»។
គួរបញ្ជាក់ថា ការប្រកួតជើងទី២ ដាណឺម៉ាកតទល់ជាមួយម្ចាស់ផ្ទះព័រទុយហ្គាល់ នៅឯកីឡដ្ឋាន Jose Alvalade ថ្ងៃទី២៣ ខែមីនា ឆ្នាំ២០២៥ ដើម្បីសម្រេចរកមួយក្រុមបន្តឡើងទៅកាន់វគ្គពាក់កណ្តាលផ្តាច់ព្រ័ត្រ។
ការប្រកួតវគ្គ៨ក្រុម ពានរង្វាន់ UEFA Nations League រដូវកាល ២០២៤-២៥ (ជើងទី១) ៖
-ហឡូង់ ២-២ អេស្ប៉ាញ
-ក្រូអាត ២-០ បារាំង
-ដាណឺម៉ាក ១-០ ព័រទុយហ្គាល់
-អ៊ីតាលី ១-២ អាល្លឺម៉ង់៕
ចែករំលែកព័តមាននេះ