ប្រទេស​អេ​ស្ប៉ា​ញ ៖ ក្រោយ​ទម្លាក់​ក្រុម Atlético Madrid បន្ត​ឡើង​ទៅ​កាន់​វគ្គ​៨​ក្រុម​ចុង​ក្រោយ​ពានរង្វាន់ UEFA Champions League រដូវ​កាល ២០២៤-២៥ កីឡាករ​ទាំងអស់​របស់​ក្រុម Real Madrid ត្រូវ​បាន​ទម្លាយ​មក​ថា​ទទួល​បាន​ប្រាក់​រង្វាន់​ម្នាក់ ២៥​ម៉ឺន​អឺ​រ៉ូ​ពី​ប្រធាន​ក្លិប​។

ក្រុម​ស្តេច​ស Real Madrid យកឈ្នះ​ក្រុម Atlético Madrid នៅ​វគ្គ​១៦​ក្រុម​ចុង​ក្រោយ តាម​រយៈ​ការ​ទាត់​បាល់​១១​ម៉ែត្រ​កាត់សេចក្តី​ដោយ​លទ្ធផល ៤​ទល់​នឹង​២ ក្រោយ​សរុប​លទ្ធផល​ទាំង​ពីរ​ស្នើ​គ្នា ២​ទល់​នឹង​២ ដោយ​ជើង​ទី​១ លទ្ធផល ២​ទល់​នឹង​១ និង​ជើង​ទី​២ លទ្ធផល ១-០​។ ក្រុម​របស់​លោក Carlo Ancelotti បន្ត​ឡើង​ទៅ​វគ្គ​៨​ក្រុម​ចុង​ក្រោយ ដោយ​ត្រូវ​ប៉ះ​ក្រុម​កាំភ្លើង​ធំ Arsenal ដោយ​ជើង​ទី​១ នៅ​ថ្ងៃ​ទី​៨ ខែមេសា និង​ជើង​ទី​២ នៅ​ថ្ងៃ​ទី​១៦ ខែមេសា​។

យ៉ាងណាមិញ បើ​យោង​តាម​ប្រភព​ពី​ប្រព័ន្ធ​ផ្សព្វផ្សាយ​អេ​ស្ប៉ា​ញ និង លោក Fabrizio Romano អ្នកកាសែត​កីឡា​ជនជាតិ​អ៊ី​តា​លី​ដ៏​ល្បី​ទូ​ទាំង​ពិភពលោក កាលពី​ថ្ងៃ​ទី​២៦ ខែមីនា ឆ្នាំ​២០២៥ បាន​ចេញផ្សាយ ក៏​ដូច​ជា​បង្ហោះ​លើ​គណនី​បណ្តាញ​ទំនាក់ទំនង​សង្គម​ផ្លូវការ​របស់​ខ្លួន ដោយ​ទម្លាយ​ថា ប្រធាន​ក្លិប លោក Florentino Pérez បាន​ផ្តល់​ជូន​កីឡាករ Real Madrid ទាំងអស់​ជាមួយ​ប្រាក់​រង្វាន់​ម្នាក់​២៥​ម៉ឺន​អឺ​រ៉ូ ឬ​ស្មើ ២៧​ម៉ឺន​ដុល្លារ​អា​មេ​រិ​ក ក្រោយ​ទម្លាក់​ក្រុម Atlético Madrid ឡើង​ទៅ​វគ្គ​៨​ក្រុម​ចុង​ក្រោយ ពានរង្វាន់ UEFA Champions League រដូវ​កាល ២០២៤-២៥​។ នេះ​ជា​រឿង​ពិសេស​មិនធម្មតា​សម្រាប់​ប្រធាន​ក្លិប Real Madrid ដែល​ជា​ធម្មតា​ការ​ផ្តល់​ប្រាក់​រង្វាន់​លុះត្រាតែ​ក្រុម​ឈ្នះ​ពានរង្វាន់​ណាមួយ​តែ​ប៉ុណ្ណោះ​។

ទោះ​យ៉ាងណា​ក៏​ដោយនៅ​ពេល​នេះ កត្តា​ជា​ច្រើន​បាន​ជំរុញ​ឱ្យ​លោក Florentino Perez បន្ថែម​កញ្ចប់​ថវិកា​លើ​ប្រាក់​រង្វាន់​បន្ថែម​ទៀត​។ បើ​តាម​ប្រភព​ពី​គេហទំព័រ All Football បានឱ្យ​ដឹង​ថា កត្តា​ទី​១ លោក​បានដឹង​អំពី​ការ​ប្រឈម​របស់​ក្រុម​រដូវ​កាល​នេះ ដោយ​មានការ​ប្រកួត​ចំនួន​៧២​ប្រកួត ប្រសិនបើ​ពួក​គេ​ឈាន​ដល់​វគ្គ​ផ្តាច់ព្រ័ត្រ​ពានរង្វាន់ Copa del Rey, Champions League និង FIFA Club World Cup ។ Real Madrid បាន​ឈ្នះ​ពានរង្វាន់ Champions League កាលពី​រដូវ​កាល​មុន ដោយ​ឆ្លងកាត់​១៣​ប្រកួត ប៉ុន្តែ​ជាមួយ​ទម្រង់​ថ្មី ពួក​គេ​បាន​ឆ្លងកាត់​១២​ប្រកួត​រួច​ហើយ​នៅ​រដូវ​កាល​នេះ ហើយ​ដើម្បី​ឈ្នះ​ជើងឯក​រដូវ​កាល​នេះ នៅ​ថ្ងៃ​ទី​៣១ ខែឧសភា ឆ្នាំ​២០២៥ កីឡាករ Real Madrid ត្រូវ​លេង​សរុប​១៧​ប្រកួត​។

កត្តា​ទី​២ ដោយសារ​ទម្រង់​ថ្មី​របស់​សហព័ន្ធ​បាល់ទាត់​អឺរ៉ុប UEFA បាន​បង្កើន​ប្រាក់​រង្វាន់​ដែល​បាន​បែងចែក​ដល់​ក្រុម​ចូលរួម​ចំនួន ២១% ខណៈ​ដែល Real Madrid រកបាន ១២,៥​លាន​អឺ​រ៉ូ ឬ​ជាង ១៣​លាន​ដុល្លារ​ដាក់​ហោប៉ៅ​រួច​ស្រេច ក្រោយ​ឡើង​ដល់​វគ្គ​៨​ក្រុម​ចុង​ក្រោយ ឬ ១/៤ ផ្តាច់ព្រ័ត្រ ហើយ​ប្រសិនបើ​ឈ្នះ​ជើងឯក​រដូវ​កាល​នេះ ពួក​គេ​អាច​រកបាន​លើស​ពី ១០០​លាន​អឺ​រ៉ូ ឬ​លើស​ពី ១០៨​លាន​ដុល្លារ​។

គួរ​ឱ្យ​ដឹង​ថា នៅ​ក្នុង​ការ​ប្រកួត​ពានរង្វាន់ UEFA Champions League ស្តេច​ស Real Madrid គឺជា​ក្រុម​កំពុង​តែ​កាន់​កំណត់​ត្រា​ឈ្នះ​ជើងឯក​ច្រើន​ជាងគេ​ក្នុង​ប្រវត្តិសាស្ត្រ ពោល​ចំនួន​១៥​ដង តាម​ពីក្រោយ​ដោយ​ក្រុម AC Milan ដែល​ឈ្នះ​ចំនួន​៧​ដង​៕