រាជធានីភ្នំពេញ ៖ នៅព្រឹកថ្ងៃទី១៥ កញ្ញា ឆ្នាំ ២០១១ កម្មករចំនួន៣៥០នាក់ ដែលធ្វើការនៅការដ្ឋានស្ថាបនាបុរីវិមានភ្នំពេញត្រូវលោក ឧកញ៉ាលី ហួរ ជាម្ចាស់នៃបុរីនេះរៀបចំធ្វើពិធីសំណេះសំណាល និងចែកអំណោយលើកទឹកចិត្តនារដូវបុណ្យភ្ជុំបិណ្ឌ ។ ពិធីនោះធ្វើឡើងនៅក្នុងបុរីវិមានភ្នំពេញស្ថិតក្នុងសង្កាត់ ច្រាំងចំរេះទី២ ខណ្ឌប្ញស្សីកែវ ស្ថិតក្រោមអធិបតីភាពលោកកែប ជុតិមា
រាជធានីភ្នំពេញ ៖ នៅព្រឹកថ្ងៃទី១៥ កញ្ញា ឆ្នាំ ២០១១ កម្មករចំនួន៣៥០នាក់ ដែលធ្វើការនៅការដ្ឋានស្ថាបនាបុរីវិមានភ្នំពេញត្រូវលោកឧកញ៉ាលី ហួរ ជាម្ចាស់នៃបុរីនេះរៀបចំធ្វើពិធីសំណេះសំណាល និងចែកអំណោយលើកទឹកចិត្តនារដូវបុណ្យភ្ជុំបិណ្ឌ ។ ពិធីនោះធ្វើឡើងនៅក្នុងបុរីវិមានភ្នំពេញស្ថិតក្នុងសង្កាត់ច្រាំងចំរេះទី២ ខណ្ឌប្ញស្សីកែវ ស្ថិតក្រោមអធិបតីភាពលោកកែប ជុតិមា អភិបាលរាជធានីភ្នំពេញ ។
លោកឧកញ៉ាលី ហួរ ថ្លែងថា បុរីវិមានភ្នំពេញមានកិត្តិយសយ៉ាងថ្លៃថ្លា និងថ្លែងអំណរគុណយ៉ាងជ្រាលជ្រៅចំពោះការអញ្ជើញចូលរួមរបស់លោកកែប ជុតិមា អភិបាលរាជធានីភ្នំពេញ ដើម្បីចែកអំណោយដល់កម្មករចំនួន៣៥០នាក់ ដែលកំពុងសាងសង់សំណង់នានានៅក្នុងបុរីវិមានភ្នំពេញ ។ អំណោយដែលចែកជូនកម្មកររួមមានមី៣៥០កេស ទឹកស៊ីអ៊ីវ
៣៥០យួរ ទឹកបរិសុទ្ធ៣៥០យួរ អង្ករ៥០បាវ និងអាវដៃវែងចំនួន៣៥០ ។ តាមរយៈអំណោយនេះបញ្ជាក់ឱ្យឃើញអំពីការយកចិត្តទុកដាក់ចំពោះប្រជាជនក្រីក្រ ហើយក៏ជាការលើកទឹកចិត្តប្រកបដោយភាពកកក់ក្តៅដល់កម្មករឱ្យខិតខំបំពេញការងារឱ្យបានជោគជ័យ និងសុវត្ថិភាព។
លោកឧកញ៉ាលី ហួរ ថ្លែងថា គម្រោងបុរីវិមានភ្នំពេញបង្កើតឡើងស្របតាមផែនការយុទ្ធសាស្ត្រពង្រីកទីក្រុង របស់សាលារាជធានីភ្នំពេញហើយនឹងក្លាយជាតំបន់លំនៅឋានថ្មីមួយទៀតស្ថិតក្នុងតំបន់ទីក្រុងរណបដែលមានរុក្ខជាតិស្ថិតនៅផ្នែកឧត្តរនៃរាជធានីភ្នំពេញ ជាតំបន់មានប្រជាជនរស់នៅអ៊ូអរ និងប្រកបដោយសន្តិសុខ ។
នៅក្នុងឱកាសនោះលោកកែប ជុតិមា អភិបាលរាជធានីភ្នំពេញបានថ្លែងកោតសរសើរដល់លោកឧកញ៉ាលី ហួរ ដែលមានភាពប៉ិនប្រសប់ក្នុងការប្រកបមុខរបររកស៊ីដោយផ្តើម
ចេញពីអ្នករកស៊ីដូរលុយតូចតាចពង្រីកឱ្យបានធំហើយរហូតដល់ពេលនេះ លោកឧកញ៉ាបានពង្រីក និងស្ថាបនាសំណង់បុរីដ៏ទំនើប ដែលជាមុខរបរសុចរិតបំផុតក្នុងការចូលរួមអភិវឌ្ឍរាជធានីភ្នំពេញ ។ បុរីនេះ នឹងទទួលបានជោគជ័យនៅថ្ងៃខាងមុខ ដែលអាចទាក់ទាញអតិថិជនបានច្រើន ហើយម្យ៉ាងទៀតតំបន់នេះលែងលិចទឹកទៀតហើយ ព្រមទាំងជាតំបន់មានសុវត្ថិភាពទៀតផង ។
លោកអភិបាលរាជធានីបញ្ជាក់ដល់កម្មករ ថា «នេះជាអំណោយគណបក្សប្រជាជនសម្រាប់ជូនដល់ប្អូនៗ និងក្មួយៗជាកម្មករជាធនធានមួយផ្នែកសម្រាប់ធ្វើបុណ្យទាននារដូវបុណ្យភ្ជុំបិណ្ឌ»។ លោកបានផ្តាំផ្ញើដល់កម្មករឱ្យយកចិត្តទុកដាក់ក្នុងការងារ និងធ្វើឱ្យមានសុវត្ថិភាពល្អ ៕
ចែករំលែកព័តមាននេះ