ខេត្តព្រះវិហារ ៖ នៅព្រឹកថ្ងៃទី១៥ កញ្ញា ២០១១ នេះ អភិបាលស្រុកចំនួន៣របស់ប្រទេសថៃ ក្នុងនោះមានស្រុកខាន់ថាឡាក់ ខេត្តស៊ីសាកេត, ស្រុកណាំយឺន, ស្រុកណាចាលួយក្នុងខេត្តឧប៊ុនប្រទេសថៃ បានបញ្ជូនប្រជាពលរដ្ឋស្រុកទាំង៣របស់ខ្លួនចំនួន១០០នាក់ ដែលជាកសិករមកកាន់ចំណុចច្រកទ្វារអានសេះ នៅក្នុងទឹកដីរបស់ថៃ ដើម្បីជួបជុំគ្នាជាមួយប្រជាជនខ្មែរស្រុកជាំក្សាន្តចំនួន១០០នាក់ដូចគ្នា ដឹកនាំដោយលោកសុខ ហៃ អភិបាលស្រុកជាំក្សាន្ត ដែលមានការរៀបចំដោយលោកក្រូច សម្បត្តិ អភិបាលរងស្រុកជាំក្សាន្ត ជាប្រធានច្រកទ្វារអានសេះ ។
ក្នុងជំនួបគ្នារវាងប្រជាជនថៃចំនួន៣ស្រុកខាងលើជាមួយប្រជាជនខ្មែរស្រុកជាំក្សាន្តនេះ គឺធ្វើឡើងក្នុងផ្សារមួយក្នុងទឹកដីថៃទល់មុខច្រកទ្វារអានសេះ ជម្រៅ៣០០ម៉ែត្រ ។ ការជំនួបគ្នារបស់ប្រជាជនថៃនិងប្រជាជនខ្មែរដែលជាអ្នកភូមិផងរបងតែមួយខេត្តនិងខេត្តជាប់គ្នានាពេលនេះ គឺជាលើកទី១ហើយ ដែលពុំធ្លាប់មាន ក្នុងគោលបំណងផ្លាស់ប្តូរបទពិសោធន៍ឱ្យគ្នាទៅវិញទៅមក ក្នុងការប្រកបមុខរបររកស៊ី និងមុខរបរផ្នែកកសិកម្មក្នុងរយៈពេលមួយថ្ងៃ ។ បន្ទាប់ពីមានការជួបជុំគ្នានៅច្រកអានសេះពេលនេះហើយ ប្រជាជន៣ស្រុករបស់ថៃខាងលើនឹងបញ្ជូនប្រតិភូចំនួន៦២នាក់នាំយកអំណោយឧបត្ថម្ភជាសម្ភារកីឡាដល់សិស្សានុសិស្សកម្ពុជា ជាពូជដំណាំកសិកម្ម និងកូនត្រីប្រាពូជប្រមាណជាង១០ម៉ឺនក្បាលមកកាន់សាលាស្រុកជាំក្សាន្តផងដែរ ។
គួរបញ្ជាក់ផងដែរថា ការចងសម្ព័ន្ធមេត្រីភាពរវាងប្រជាជនស្រុកជាំក្សាន្តជាមួយប្រជាជនថៃ៣ស្រុក ពេលនេះក៏នឹងមានការហូបបាយសាមគ្គីជាមួយគ្នាផងដែរ ដែលនេះគឺជាលើកទីមួយក្នុងប្រវត្តិសាស្ត្ររបស់ស្រុកដែលមានព្រំប្រទល់ជាប់គ្នា និងជាសញ្ញាភ្លើងខៀវមួយដ៏ល្អសម្រាប់ប្រជាជនទាំងពីរ ៕
ចែករំលែកព័តមាននេះ