របរជាងដំដែក«តត្រកូល»ធ្វើកាំបិតពូថៅជាប្រពៃណី
- សៀមរាប
ខេត្តសៀមរាប ៖ កាំបិត ពូថៅ ចបកាប់ ខ្វែវ ប៉ែល ចបជីក ។ល។ សុទ្ធសឹងជាឧបករណ៍ប្រើប្រាស់ក្នុងការធ្វើចម្ការ…
ខេត្តសៀមរាប ៖ កាំបិត ពូថៅ ចបកាប់ ខ្វែវ ប៉ែល ចបជីក ។ល។ សុទ្ធសឹងជាឧបករណ៍ប្រើប្រាស់ក្នុងការធ្វើចម្ការ ឬប្រើប្រាស់ក្នុងគ្រួសារ ។ បច្ចុប្បន្ន មុខរបរជាងដែកផលិតកាំបិតពូថៅ មានការថយចុះគួរឱ្យកត់សម្គាល់ដោយសារតែការនាំចូលពីប្រទេសក្រៅបានលុកលុយទីផ្សារគ្រប់រូប
ភាព ។
ទោះបីជាបែបណា ទីតាំងមួយនៅខាងត្បូងផ្សារក្រោមចម្ងាយប្រហែល ៣០ម៉ែត្រ ស្ថិតក្នុងភូមិវត្តស្វាយ សង្កាត់សាលាកំរើក ក្រុងសៀមរាប មានការដាក់លក់កាំបិត ពូថៅ ក្នុងតម្លៃសមរម្យ ដែលការផលិតជាច្រើនសុទ្ធតែជាឧបករណ៍ប្រើប្រាស់ដោយដៃសម្រាប់ប្រជាពលរដ្ឋ ។ លោក ព្រុំ អ៊ែល អាយុ៤៤ឆ្នាំ ជាខ្មែរអ៊ិស្លាមមានស្រុកកំណើតនៅខេត្តកំពង់ឆ្នាំង បច្ចុប្បន្នរស់នៅភូមិវត្តស្វាយ សង្កាត់សាលាកំរើក ក្រុងសៀមរាប និងជាជាងដែក បានរៀបរាប់ប្រាប់កោះសន្តិភាព កាលពីថ្ងៃទី១ ខែកក្កដា ឆ្នាំ២០២៥ថា គាត់មានកូនចំនួន៥នាក់(ស្រី៤ ប្រុស១) ចាប់មុខរបរដំដែកនេះរយៈពេលជាង២០ឆ្នាំមកហើយ ដោយធ្វើកាំបិត ពូថៅ ចបកាប់ ប៉ែល ចបជីក កាំបិតបន្ទោះ ។ល។ ដោយចេះបន្តមកពីឪពុក បើនិយាយឱ្យចំទៅគឺចេះតគ្នាពីដូនតាមក ។
ចំពោះដែកគឺគាត់ទិញពីអ្នកលក់អេតចាយតម្លៃ ៣ ០០០រៀល ទៅ ៥ ០០០រៀល តាមដែកល្អមិនល្អ ។ ចំណែកការធ្វើកាំបិត ពូថៅ ចបកាប់ ខ្វែវ ប៉ែល ចបជីក ។ល។ ក្នុង១ថ្ងៃធ្វើបានចាប់ពី៥ ទៅ១០ ទើបទាន់ម៉ូយ គេទិញយកទៅលក់បន្តបោះដុំតាមស្រុកនានា ។ លោក ព្រុំ អ៊ែល មានកូនជាងម្នាក់់ ឈ្មោះ ផា ហៅ អ៊ូក ភេទប្រុស អាយុ៤០ឆ្នាំ មានទីលំនៅនៅតំបន់អង្គរ ក្នុងភូមិនគរក្រៅ សង្កាត់នគរធំ ក្រុងសៀមរាប បានមករៀនធ្វើកាំបិត ពូថៅ ជាមួយគាត់រយៈពេលជាង ៥ឆ្នាំមកហើយដែរ ។
ក្នុងកិច្ចសម្ភាសន៍ជាមួយជាងដែកលក់កាំបិតពូថៅ នេះដែរ ក៏មានវត្តមានលោក ភិរម្យ មុខរបររត់ម៉ូតូកង់បី រស់នៅក្នុងក្រុងសៀមរាប បានដឹកភ្ញៀវជាបុរសជនជាតិបារាំង២នាក់ មកទិញកាំបិតបន្ទោះ១ថ្លៃ ៤០ ០០០រៀល ដើម្បីយកទៅប្រើប្រាស់ ។ ជាងដែករូបនេះ បានប្រាប់ពីរបៀបធ្វើកាំបិត ពូថៅ ប៉ែល ចបជីក គឺត្រូវយកដែកចន្ទាសឬដែកផ្សេងៗទៀត មកកាត់ជាកង់ៗ ហើយយកមកដុតឱ្យទន់ រួចដំ ហើយយកទៅដាក់ក្នុងទឹកដែលហៅថាលត់ ។
បន្ទាប់មក យកទៅដំបន្តទៀតតម្រង់មើលឱ្យត្រង់ទៅតាមលំដាប់លំដោយតាមខ្នាតរហូតចប់សព្វគ្រប់ ។អ្នកស្រី សាលី ណា កូនស្រីរបស់លោក ព្រុំ អ៊ែល គឺជាអ្នកលក់កាំបិត រស់នៅភូមិវត្តស្វាយ សង្កាត់សាលាកំរើក ក្រុងសៀមរាប ។ កាំបិតដែលលក់ចេញ មានប្រភេទលេខ១ និងលេខ២ និងបោះដុំមានដូចជា ៖
-កាំបិតហាន់សាច់លេខ២ កាំបិត១លក់ចេញថ្លៃ ៨ពាន់រៀល ។
-កាំបិតហាន់សាច់លេខ១ កាំបិត១លក់ចេញថ្លៃ ២ម៉ឺនរៀល ទៅ ២៥ ០០០រៀល ។
-កាំបិតកាប់ឆ្អឹង ១ថ្លៃ៦ម៉ឺនរៀល ។
-កាំបិតខ្វែវធ្វើពីដែកចន្ទាស លក់ចេញ១ថ្លៃ៦ម៉ឺនរៀល ។
-ចបកាប់សញ្ញាត្រាមាន់ ១ថ្លៃ៣ម៉ឺនរៀល ។
-ចបកាប់ធម្មតា ១ថ្លៃ១ម៉ឺន៥ពាន់រៀល ។
-ចបជីកដងឈើ ១ថ្លៃ២ម៉ឺនរៀល ។
-ចបជីកដងដែក ១ថ្លៃ១ម៉ឺន៥ពាន់រៀល ។
-ចបកាប់តូច ១ថ្លៃ១ម៉ឺនរៀល ។
-ចបជីកសម្រាប់អង្គុយជីកស្មៅតាមរងត្រកួន ១ថ្លៃ១ម៉ឺនរៀល ។
-ខ្នោសកោសដូង ១ថ្លៃ១ម៉ឺនរៀល ។
-ប៉ែល ១ថ្លៃ៣ម៉ឺនរៀល ។
-ដែកគាស់តូច ១ថ្លៃ១ម៉ឺន៥ពាន់រៀល ។
-ដែកគាស់ធំ ១ថ្លៃ៤ម៉ឺនរៀល ។
-កាំបិតបន្ទោះ ១ថ្លៃ២ម៉ឺន៥ពាន់រៀល ។
-កាំបិតចិតត្នោត ១ថ្លៃ៤ម៉ឺនរៀល ។
-កាំបិតចែត ១ថ្លៃ៤ម៉ឺនរៀល ។
-រនាស់ ១ថ្លៃ២ម៉ឺនរៀល ។
លោក សុទ្ធ វិសាល អាយុ៥៨ឆ្នាំ រស់នៅស្រុកវ៉ារិន ជាអ្នកដឹកលក់តាមភូមិស្រុក បានប្រាប់កោះសន្តិភាពថា គាត់ដឹកលក់ តាមម៉ូតូរ៉ឺម៉កតាមផ្លូវជាតិ និងតាមភូមិ ឃុំ ស្រុក ដែលមានកាំបិត ពូថៅ ចប ប៉ែល និងសម្ភារៈផ្សេងៗទៀត ។ល។ ជាមួយក្រុមគ្រួសារយកពីរោងដំដែកក្នុងក្រុងសៀមរាប ។
ជួនកាលទៀត យកពីតាមស្រុកដូចជា ស្រុកដំដែក ស្រុកសូទ្រនិគម យកទៅលក់បន្តក្នុងតម្លៃបោះដុំ និងលក់បន្តទៅឱ្យអ្នកទិញរាយបានចំណេញតិចតួច ក្នុង កាំបិត១ ចំណេញបាន៥០០រៀល ទៅ១០០០រៀល គ្រប់សម្ភារៈទាំងអស់ ។
បើតាមលោក ព្រុំ អ៊ែល និយាយថា នៅភូមិដែលគាត់ប្រកបរបរនេះក៏មានបងប្អូនគាត់២នាក់ទៀតចាប់យកមុខរបរដំដែកធ្វើកាំបិត ពូថៅដែរ ។ គាត់ថា កន្លងមក មានក្រុមក្មេងទំនើងមកកុម្មង់ឱ្យគាត់ធ្វើដាវសាមូរ៉ៃដែរ តែគាត់បានបដិសេធមិនធ្វើឡើយ ។
គាត់បន្តថា ក្នុង១ខែសមត្ថកិច្ចចុះមកត្រួតពិនិត្យម្តង ខ្លាចក្រែងមានការលួចធ្វើកាំបិត ឬដាវលក់ តែអំពើខុសច្បាប់គាត់មិនធ្វើឡើយ ។ ឧបករណ៍លក់ដាច់ជាងគេគឺ កាំបិតផ្គាក់ កាំបិតខ្វែវ ចបកាប់ និងចបជីក ៕
ចែករំលែកព័តមាននេះ