ខេត្តមណ្ឌលគិរី ៖ ក្រោយមានការបង្ហោះព័ត៌មានជុំវិញករណីថា មានសកម្មភាពគ្រឿងចក្រជនជាតិវៀតណាមធ្វើផ្លូវរំកិលបង្គោលព្រំដែននៅខេត្តមណ្ឌលគិរី កាលពីល្ងាចថ្ងៃទី៣ ខែកក្កដា ឆ្នាំ២០២៥ ក្រុមប្រតិកម្មរហ័សនៃស្នងការដ្ឋាននគរបាលខេត្តមណ្ឌលគិរីបានចេញសេចក្តីបំភ្លឺជូនសាធារណៈជន អ្នកសារព័ត៌មាន ពិសេសអ្នកនិយមប្រើប្រាស់បណ្តាញទំនាក់ទំនងសង្គម…
ខេត្តមណ្ឌលគិរី ៖ ក្រោយមានការបង្ហោះព័ត៌មានជុំវិញករណីថា មានសកម្មភាពគ្រឿងចក្រជនជាតិវៀតណាមធ្វើផ្លូវរំកិលបង្គោលព្រំដែននៅខេត្តមណ្ឌលគិរី កាលពីល្ងាចថ្ងៃទី៣ ខែកក្កដា ឆ្នាំ២០២៥ ក្រុមប្រតិកម្មរហ័សនៃស្នងការដ្ឋាននគរបាលខេត្តមណ្ឌលគិរីបានចេញសេចក្តីបំភ្លឺជូនសាធារណៈជន អ្នកសារព័ត៌មាន ពិសេសអ្នកនិយមប្រើប្រាស់បណ្តាញទំនាក់ទំនងសង្គម ។
អ្នកនាំពាក្យស្នងការដ្ឋាននគរបាលខេត្តមណ្ឌលគិរីបានឲ្យដឹងថា កាលពីថ្ងៃ០១ ខែកក្កដា ឆ្នាំ២០២៥ ម្ចាស់ផេកឈ្មោះ Tjohn Sam ដែលបានបង្ហោះតាមបណ្ដាញទំនាក់ទំនងសង្គមហ្វេសប៊ុកផេក Tjohn Sam ជាឃ្លីបវីដេអូ ដែលមានខ្លឹមសារថា «បងប្អូនជនរួមជាតិនេះគឺជាសកម្មភាពថ្មីៗ វៀតណាមធ្វើផ្លូវលួចរំកិលព្រំដែនចូលមក ទឹកដីខ្មែររាប់រយម៉ែត្រដែលស្ថិតក្នុងខេត្តមណ្ឌលគិរីរតនគិរី មិនមានអាជ្ញាធរខេត្ត ឬក៏រដ្ឋាភិបាលទៅទប់ស្កាត់ ដូចរដ្ឋាភិបាលទប់ស្កាត់ជាមួយនឹងថៃ
ចឹង» ។
ក្រោយពីទទួលបានព័ត៌មានភ្លាម ក្រោមការដឹកនាំបញ្ហាផ្ទាល់ពីលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានដាក់បទបញ្ជាដល់លោកវរសេនីយ៍ឯក អន ប៊ុនធូ មេបញ្ជាការវរសេនាតូចនគរបាលការពារព្រំដែនគោកលេខ៦២១ ដឹកនាំកម្លាំងវរសេនាតូចនគរបាលការពារព្រំដែនគោកលេខ៦២១ សហការជាមួយកម្លាំងប៉ុស្តិ៍នគរបាលការពារព្រំដែនគោកលំបុកចុះត្រួតពិនិត្យជាក់ស្ដែងនៅចំណុចទីតាំងបង្គោលបំពេញបន្ថែមលេខ៥៤/១(១) មានទីតាំងស្ថិតនៅភូមិពូឡះ ឃុំដាក់ដាំ ស្រុកអូររាំង ខេត្តមណ្ឌលគិរី។
អ្នកនាំពាក្យបន្តថា ជាលទ្ធផល គឺពិនិត្យឃើញថា បង្គោលព្រំដែនបំពេញបន្ថែមលេខ៥៤/១(១)នេះ ស្ថិតនៅទីតាំងដដែលមានលក្ខណៈធម្មតា មិនមានការប្រែប្រួល ឬក៏លើកផ្លាស់ប្តូររំកិលខុសពីទីតាំងដើម ដូចការចុះផ្សាយ ព័ត៌មានរបស់ម្ចាស់ផេកឈ្មោះ Tjohn Sam ថា៖ មានភាគីវៀតណាមបានជីក និងរំកិលផ្លាស់ប្តូរបង្គោលព្រំដែន លេខ ៥៤/១(១) ទៅទីតាំងថ្មីដូចការចុះផ្សាយនោះទេ។
សូមបញ្ជាក់ជូនថា ការត្រួសត្រាយធ្វើផ្លូវចូលមកបង្គោលលេខ៥៤/១(១)នេះ ជាកងវិស្វកម្មស្ថាបនាផ្លូវក្រវ៉ាត់ព្រំដែនរបស់កម្ពុជាយើង ក្នុងការជួយសម្រួលផ្លូវទៅកាន់ទីតាំងបង្គោលព្រំដែន ដើម្បីងាយស្រួលដល់ កម្លាំងការពារព្រំដែនចូលទៅត្រួតពិនិត្យ សម្អាត និងថែទាំបង្គោលនៅទីតាំងនោះ កងកម្លាំងនគរបាលដែល ឈរជើងនៅតាមខ្សែបន្ទាត់ព្រំដែនខេត្តមណ្ឌលគិរីទាំង១៤ប៉ុស្តិ៍ ចំណុះឲ្យវរសេនាតូចនគរបាលការពារព្រំដែនគោកលេខ៦២១ និងលេខ៣០៣បានដើរល្បាត និងសម្អាតបង្គោលព្រំដែនក្នុងភូមិសាស្ត្រគ្រប់គ្រង ព្រមទាំងចូលរួមសហការការពារដល់ក្រុមការងារកងវិស្វកម្មស្ថាបនាផ្លូវក្រវ៉ាត់ព្រំដែនជាប្រចាំ ។
ដូច្នេះ ក្នុងនាមថ្នាក់ដឹកនាំ និងកម្លាំងវរសេនាតូចនគរបាលការពារព្រំដែនគោកខេត្តមណ្ឌលគិរីសូមអះអាងនិងបញ្ជាក់ថា បង្គោលបំពេញបន្ថែមលេខ ៥៤/១(១)នេះ គឺមិនមានការប្រែប្រួលរំកិល ឬផ្លាស់ប្តូរទីតាំងខុសពីលក្ខណៈដើមនោះទ ចំពោះការចុះផ្សាយរបស់ផេកឈ្មោះ Tjohn Sam គឺជាការចុះផ្សាយខុសពីការពិតទាំងស្រុង និងគ្មានមូលដ្ឋានច្បាស់លាស់ ។
យើងខ្ញុំសូមលើកទឹកចិត្តមហាជនបណ្ដាញទំនាក់ទំនងសង្គមផ្សេងៗ ធ្វើការរិះគន់ក្នុងន័យស្ថាបនា ចៀសវាងមានការចុះផ្សាយតាមបណ្ដាញទំនាក់ទំនងសង្គមផ្សេងៗដោយភាន់ច្រឡំ ដែលធ្វើឲ្យប៉ះពាល់ដល់ កិត្តិយស និងសេចក្តីថ្លៃថ្នូររបស់ថ្នាក់ដឹកនាំគ្រប់លំដាប់ថ្នាក់ ។ អាស្រ័យហេតុនេះ សូមសាធារណជន និងបណ្តាញទំនាក់ទំនងសង្គម មេត្តាជ្រាបជាព័ត៌មាន ៕
ចែករំលែកព័តមាននេះ