ទីក្រុងកៀវ៖ ប្រធានាធិបតីអ៊ុយក្រែន លោកហ្សេឡិនស្គី ប្រកាសថានឹងសងសឹកវិញចំពោះរុស្ស៊ីដែលវាយប្រហារទីក្រុងកៀវសម្លាប់មនុស្ស២៤នាក់។ លោកថ្លែងថាអ៊ុយក្រែនដាក់ផែនការវាយប្រហារទីតាំងប្រេង និងរោងចក្រផលិតគ្រឿងបរិក្ខារយោធារបស់រុស្ស៊ី។ លោកថានេះជារឿងសមហេតុផលបំផុត។ ហ្សេឡិនស្គីព្រមានថាលោកមិនអាចអនុគ្រោះចំពោះការវាយប្រហាររបស់រុស្ស៊ីមកលើអ៊ុយក្រែនជាដាច់ខាត។
លោកថ្លែងបន្តទៀតថាលោកបានពិភាក្សាអំពីការវាយប្រហារឆ្ងាយៗចូលទៅក្នុងទឹកដីរុស្ស៊ីដោយដាក់គោលដៅវាយទៅលើមន្ត្រីយោធាកំពូលៗ មន្ត្រីសន្តិសុខ និងមន្ត្រីស៊ើបការណ៍សម្ងាត់។ លោកថ្លែងដូច្នេះក្រោយពេលរុស្ស៊ីវាយប្រហារអគារមួយខ្នងកម្ពស់៩ជាន់។ យោធាអ៊ុយក្រែនថ្លែងថាការវាយប្រហារនោះជាផ្នែកមួយនៃយុទ្ធនាការវាយប្រហារដែនអាកាសដ៏ធំបំផុតមិនធ្លាប់មានចាប់តាំងពីសង្គ្រាមនេះផ្ទុះឡើងដំបូង។
លោកហ្សេឡិនស្គីថ្លែងថាលោកបានពិគ្រោះគ្នាអំពីអ្វីដែលលោកចាត់ទុកថាជាការប៉ុនប៉ងរបស់រុស្ស៊ីដើម្បីអូសទាញប្រទេសបេឡារូសឱ្យចូលពាក់ព័ន្ធនៅក្នុងសង្គ្រាមនេះកាន់តែខ្លាំង។ មានសេចក្ដីរាយការណ៍ថារុស្ស៊ីកំពុងរៀបផែនការវាយប្រហារមជ្ឈមណ្ឌលរដ្ឋាភិបាលជាងម្ភៃកន្លែងនៅអ៊ុយក្រែន។ ហ្សេឡិនស្គីអះអាងថានិវាសនដ្ឋានជាផ្លូវការរបស់លោក រួមទាំងវិមានរដ្ឋាភិបាល និងបញ្ជាការដ្ឋានកងទ័ពសុទ្ធតែជាគោលដៅដែលរុស្ស៊ីចង់វាយប្រហារ។
អ៊ុយក្រែនចាប់ផ្ដើមវាយបកវិញទៅលើរុស្ស៊ីជាបណ្ដើរៗហើយតាំងពីយប់មិញដោយបញ្ជូនដ្រូនដែលអាចហោះបានចម្ងាយឆ្ងាយដើម្បីវាយប្រហារទីតាំងស្តុកទុកថាមពល និងទីតាំងយោធានៅក្នុងតំបន់ជាច្រើន។ នៅតំបន់រីយ៉ាហ្សាន (Ryazan) ដ្រូនរបស់អ៊ុយក្រែនវាយប្រហារស្លាប់មនុស្ស៤នាក់។ នេះបើយោងតាមការបញ្ជាក់របស់អភិបាលនៃគណៈអភិបាលតំបន់។ ដ្រូនរបស់អ៊ុយក្រែនក៏បានវាយប្រហារទីតាំងចម្រាញ់ប្រេងថ្នាក់មូលដ្ឋានមួយកន្លែងផងដែរ៕ ប្រភព៖ Al Jazeera
ចែករំលែកព័តមាននេះ