ខេត្តកណ្តាល ៖ មិនដឹងជាស្ថានភាពគាត់ទៅជាយ៉ាងណាទេ មានតែបួងសួងសូមឲ្យគាត់រួចផុតពីគ្រោះថ្នាក់ដល់អាយុជីវិតផងចុះ ដែលមន្ត្រីនគរបាលនៃអធិការដ្ឋានស្រុកកៀនស្វាយម្នាក់ផ្នែកប្រឆាំងគ្រឿងញៀន ធ្វើដំណើរទៅបំពេញបេសកម្ម ដើម្បីការពារក្បួន ក៏ជួបគ្រោះថ្នាក់ចរាចរណ៍ត្រូវរថយន្តកុងតឺន័រមួយគ្រឿង រេចង្កូតបុកចូលផ្ទះប្រជាពលរដ្ឋតាមដងផ្លូវ កិនម៉ូតូ១គ្រឿង និងបុក ម៉ូតូមួយគ្រឿងទៀតរបស់មន្ត្រីនគរបាល ផ្លោងទាំងមនុស្សទាំងម៉ូតូចូលព្រៃ របួសយ៉ាងធ្ងន់ធ្ងរ បាក់ជើងទាំង២ និងបាក់ដៃខាងឆ្វេង និងបែកក្បាលយ៉ាងសង្វេគបំផុត រួចហើយតៃកុងរថយន្តបង្កនោះក៏ចុះពីក្នុងកាប៊ីនរត់គេចខ្លួនបាត់ស្រមោល សល់តែរថយន្តតែប៉ុណ្ណោះ ។
ចំណែកលោកនាយរងផ្នែកគ្រឿងញៀន ដែលរបួសធ្ងន់ធ្ងរខ្លាំង ត្រូវបានកម្លាំងសមត្ថកិច្ចចម្រុះ ចុះជួយសង្គ្រោះទាញចេញ រួចសែងដាក់ប្រង់ការ បញ្ជូនទៅសង្គ្រោះបន្ទាន់នៅមន្ទីរពេទ្យខ្មែរមិត្តសូវៀត ។
ហេតុការណ៍នេះ បានកើតឡើងកាលពីវេលាម៉ោង៣ និង១០នាទីព្រឹកថ្ងៃទី១៦ ខែឧសភា ឆ្នាំ២០២៦ នៅចំណុចផ្លូវជាតិលេខ១ ក្នុងចន្លោះគីឡូម៉ែត្រលេខ ៣៣-៣៤ ចំណុចភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល ។
សមត្ថកិច្ចបានឲ្យដឹងថា លោកនាយរងផ្នែកគ្រឿងញៀន ដែលរបួសយ៉ាងធ្ងន់ធ្ងរក្នុងករណីនេះមានឈ្មោះ ជិន លីណា ភេទប្រុស អាយុ៤៥ឆ្នាំ មុខរបរនគរបាលជាតិ មានទីលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល ។
សមត្ថកិច្ចបានឲ្យដឹងទៀតថា ករណីគ្រោះថ្នាក់ចរាចរណ៍នេះ បង្កឡើងដោយរថយន្ត១គ្រឿង ម៉ាកINTERNATIONAL ពណ៌.ស ប្រភេទដឹកទំនិញពាក់ស្លាកលេខភ្នំពេញ 3B 7209 និងសឺមីរឺម៉ក់ ពាក់ផ្លាក់លេខព្រះសីហនុ 4A 0286 មានទិសដៅអ្នកលឿងទៅភ្នំពេញ បើកបរដោយជនមិនស្គាល់អត្តសញ្ញាណ (រត់គេចខ្លួនបាត់) ។
ពេលបើកមកដល់កន្លែងកើតហេតុខាងលើ ត្រូវបានរេចង្កូតចូលផ្ទះប្រជាពលរដ្ឋ ដែលម្ចាស់ផ្ទះឈ្មោះ ឡេង ឈុន ភេទប្រុស អាយុ៥៥ឆ្នាំ មានទីលំនៅភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល និងកិនម៉ូតូចំនួន២គ្រឿង៖ ១-ម៉ាកHONDA CLICK ពណ៌ស ពាក់ផ្លាកលេខភ្នំពេញ 1G 4993 (ជាម៉ូតូម្ចាស់ផ្ទះ) ។ ២-ម៉ូតូម៉ាកHONDA DREAM C125 ស៊េរី២០១៩ ពណ៌ក្រហម ពាក់ផ្លាកលេខភ្នំពេញ 1DG 3892 រួចបន្តមកបុកជនរងគ្រោះឈ្មោះ ជិន លីណា ភេទប្រុស អាយុ៤៥ឆ្នាំ មុខរបរជានគរបាលជាតិ មានទីលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល ដែលអង្គុយបំពេញបេសកម្ម បណ្តាលអោយរងរបួសបាក់ជើងទាំង២ និងបាក់ដៃខាងឆ្វេង និងបុករោងលក់ដូរចំនួន០១ រួមនិងសម្ភារខួចខាតមួយចំនួន ជនរងគ្រោះត្រូវបានសាច់ញាតិបញ្ជូនទៅមណ្ឌលសុខភាពបន្ទាយដែក រួចបញ្ជូនបន្តទៅកាន់មន្ទីរពេទ្យមិត្តភាពខ្មែរសូវៀត។
ចំណែកម៉ូតូ២គ្រឿង និងរថយន្ត១គ្រឿង ត្រូវបានកម្លាំងប៉ុស្តិ៍នគរបាលរដ្ឋបាលដែកការពារនៅកន្លែងកើតហេតុ និងបានបញ្ជាក់ទៀតថា ករណីនេះ បណ្តាលមកពីអ្នកបើកបរថយន្តធ្វេសប្រហែសមិនប្រុងប្រយ័ត្ន មិនមើលគ្រប់ជ្រុងជ្រោយ បើករេចង្កូតមកបុកម៉ូតូចំនួន២គ្រឿង ផ្ទះលក់ដូរ០១ខ្នង និងរោងលក់ដូរ០១ បែបនេះតែម្តង ៕
ចែករំលែកព័តមាននេះ