កីឡាករហ្វាំងឡង់មីកកូ ហ៊ីវ៉ូណឹនបានក្លាយជាអ្នកគ្រប់គ្រងពានជើងឯកនៃការប្រណាំងរថយន្តប្រភេទរែលលីកម្មវិធី Rally Australia បន្ទាប់ពីបានយកឈ្នះការប្រណាំងនៅដំណាក់ផ្តាច់ព្រ័ត្រកាលថៃ្ងអាទិត្យ ទី១១ ខែកញ្ញា កន្លងមកនេះ។ ការប្រណាំងនេះត្រូវបានបញ្ចប់នៅក្រុង Coffs Harbour ប្រទេសអូស្ត្រាលី។
ហ៊ីវ៉ូណឹនដែលបើកបរឱ្យក្រុមហ្វដបានចូលដល់ទីព្រ័ត្រយកឈ្នះជើងឯកការប្រណាំងដែលមានចម្ងាយផ្លូវ៣៦៩គីឡូម៉ែត្រក្នុងថិរវេលា៣ម៉ោង៣៥នាទីនិង៥៩វិនាទីយកឈ្នះកីឡាករមិត្តរួមជាតិនិងជាមិត្តរួមក្រុមហ្សារី ម៉ាត់ទី ឡាតវ៉ាឡា។ ម៉ាត់ទី ឡាតវ៉ាឡាដែលជាជើងឯកកាលពីឆ្នាំទៅនោះបានបញ្ចប់ការប្រណាំងក្នុងលំដាប់ទី២បន្ទាប់ពីបានប្រើពេលច្រើនជាងហ៊ីវ៉ូណឹន១៤.៧វិនាទី។ កីឡាករស៊ុយអែតភីធ័រ ស៊ុលបឺកបើកបរឱ្យក្រុមសូលបឺកស៊ីត្រូអង់បានបញ្ចប់ការប្រណាំងក្នុងលំដាប់ទី៣បន្ទាប់ពីបានប្រើពេលច្រើនជាង៤៤.៨វិនាទី។
កីឡាករអង់គ្លេសម៉ាតទូ វីលសុនបើកបរឱ្យក្រុមស្តូបាដហ្វដបញ្ចប់ការប្រណាំងក្នុងលំដាប់ទី៤ខណៈកីឡាករខាលីដ អាល់កាសស៊ីមីបញ្ចប់ការប្រណាំងក្នុងលំដាប់ទី៥។ ឯកីឡាករគីមី រកកូណិនបើកបរឱ្យក្រុមស៊ីត្រូអង់អាយស៍វ័នបញ្ចប់ការប្រណាំងស្ថិតនៅក្រៅចំណាត់ថ្នាក់លេខ១០។ ចំណែកកីឡាករបារាំងសេបាស្ទៀន ឡូអែបដែលដណ្តើមពានជើងឯកកាលពីខែកក្កដានៅប្រទេសហ្វាំងឡង់បញ្ចប់ការប្រណាំង ស្ថិតនៅចំណាត់ថ្នាក់លេខ១០។ ឡូអែបដែលបើកបរឱ្យក្រុមស៊ីត្រូអង់ប្រើពេលច្រើនជាងកីឡាករហ៊ីវ៉ូណឹនដល់ទៅ៣០នាទីនិង២.៩វិនាទី។
ហ៊ីវ៉ូណឹនបន្ទាប់ពីឈ្នះពានជើងឯកបាននិយាយក្នុងក្តីរីករាយថា៖ «ខ្ញុំបើកបរបានល្អក្នុងថ្ងៃនេះ។ ការឈ្នះការប្រណាំងលើកនេះខ្ញុំមានអារម្មណ៍ល្អខ្លាំងណាស់។ នេះជាការប្រណាំងដ៏ពិបាកបំផុត។ ការប្រណាំង៤ថ្ងៃខ្ញុំបានយកឈ្នះគ្រប់ថ្ងៃទាំងអស់ »។ កីឡាករបារាំងសេបាស្ទៀន អូហ្ស៊ីយ៉េបញ្ចប់ការប្រណាំងក្នុងចំណាត់ថ្នាក់លេខ១១។
សូមបញ្ជាក់ថា ការប្រណាំងរថយន្តប្រភេទរែលលីសម្រាប់ឆ្នាំ២០១១នេះមាន១៣ជុំ។ ជុំទី១ចាប់ផ្តើមកាលពីថ្ងៃទី១០ ខែកុម្ភៈ ដើមឆ្នាំនេះនៅប្រទេសស៊ុយអែត និងជុំចុងក្រោយបំផុតនឹងធ្វើនៅថ្ងៃទី១០ដល់១៣ខែវិច្ឆិកាខាងមុខនៅក្រុងហ្គាឌីហ្វចក្រភពអង់គ្លេស ។ ដោយឡែកការប្រណាំងនៅប្រទេសអូស្ត្រាលីនេះគឺស្ថិតនៅក្នុងជុំទី១០ ។
ឆ្លងកាត់ការប្រណាំងអស់១០ជុំមកនេះ ឡូអែបសន្សំបានពិន្ទុ១៩៦នាំមុខកីឡាករហ៊ីវ៉ូណឹនដែលមាន១៨១ពិន្ទុ។ ឯកីឡាករសេបាស្ទៀន អូហ្ស៊ីយ៉េស្ថិតនៅលំដាប់ទី៣មាន១៦៧ពិន្ទុ ៕
ចែករំលែកព័តមាននេះ