កីឡាករស្វ៊ីសរ៉ូជើ ហ្វេដឺរ័រនិងកីឡាការិនីដាណឺម៉ាកការ៉ូលីន វ៉ូនីអាកគីទទួលជោគជ័យ១ជំហាននៅក្នុងយុទ្ធនាការដណ្តើមយកពានជើងឯកក្របខណ្ឌធំបញ្ចប់រដូវកាលប្រកួតUS Openខណៈដែលពួកគេទាំង២នាក់បានយកឈ្នះគូប្រកួតរៀងៗខ្លួនក្នុងជុំទី១កាលពីថ្ងៃអង្គារទី៣០សីហាកន្លងមក។ ការប្រកួតនេះត្រូវបានរៀបចំធ្វើនៅក្រុងញូវយ៉កសហរដ្ឋអាមេរិក។
នៅលើទីលានប្រកួតUSTA Billie Jean King National Tennis Centerហ្វេដឺរ័របានយកឈ្នះកីឡាករកូឡុំប៊ីសាន់ទីយ៉ាហ្គោ ហ្ស៊ីរ៉ាល់ដូក្នុងលទ្ធផល៦-៤,៦-៣និង៦-២។ ទោះជាយ៉ាងនេះក្តី គេសង្កេតឃើញថា ការប្រកួតរបស់ម្ចាស់ជើងឯក US Open៥ជំនាន់រូបនេះហាក់មិនសូវជាមុតស្រួចប៉ុន្មានទេ។ គេបានធ្វើឲ្យខូចការវាយសឺវីសចំនួន៣លើកនិងធ្វើឲ្យមានកំហុសunforces errorចំនួន៣៥លើក។
សម្រាប់ហ្វេដឺរ័រយល់ថា ប្រកួតយ៉ាងម៉េចមិនសំខាន់ទេ កត្តាចំបងគឺទីបំផុតទទួលបានជ័យជម្នះ។ គេថាជ័យជម្នះគឺជារឿងសំខាន់តែមួយគត់។ គេបន្ថែមថា៖«ខ្ញុំមិនយកចិត្តទុកដាក់ថាតើការប្រកួតវាយ៉ាងម៉េចទេ។ មិនចាំបាច់ឲ្យស្អាតឬល្អណាស់ណាទេ។ ទម្លាប់ខ្ញុំកន្លងមកគឺមិនដែលប្រកួតបានល្អឥតខ្ចោះក្នុងជុំដំបូងទេ»។
នៅជុំបន្ទាប់(ជុំទី២)ហ្វេដឺរ័រនឹងជួបប្រកួតជាមួយកីឡាករអុីស្រាអែលឌូឌី សេឡាដែលបានយកឈ្នះកីឡាករប្រេស៊ីលតូម៉ាស់ បេលលូស៊ីក្នុងលទ្ធផល៤-៦,២-៦៦-៤និង៦-៣ ។ សូមបញ្ជាក់ថា ហ្វេដឺរ័រនៅឆ្នាំ២០១១នេះពុំទាន់បានយកឈ្នះពានជើងឯកក្របខណ្ឌធំណាមួយនៅឡើយទេ ពោលគឺចាប់តាំងពីពេលដែលរូបគេបានយកឈ្នះពានជើងឯក Australian Openកាលពីឆ្នាំ២០១០មក។
ចំណែកលទ្ធផលនៃការប្រកួតរបស់បណ្តាកីឡាករផ្សេងទៀតដែលបានឆ្លងផុតជុំទី១កាលពីថ្ងៃចន្ទមានដូចជា កីឡាករម្ចាស់ផ្ទះម៉ាឌី ហ្វ៊ីសបានយកឈ្នះកីឡាករអាល្លឺម៉ង់តូប៊ីអាស កាំកេក្នុងលទ្ធផល៦-២,៦-២និង៦-១ ។ កីឡាករក្រូអាស៊ីម៉ារីន ស៊ីលិចយកឈ្នះកីឡាករអាមេរិករីយ៉ាន ហារីសុនក្នុងលទ្ធផល៦-២,៧-៥និង៧-៦។ ឯកីឡាករតូម៉ាស់ បឺឌី ហ្សង់កូ ទីបសារេវិច ម៉ាសែល ហ្គ្រាណូលឡេ អាឡិចសាន់ឌ័រ ដូលហ្គោប៉ូឡូវនិងកីឡាកររីឆាដ ហ្គាសហ្គេតក៏សុទ្ធតែស្ថិតក្នុងចំណោមអ្នកឆ្លងផុតជុំទី១កាលពីថ្ងៃចន្ទផងដែរ។ លទ្ធផលនៃការប្រកួតផ្នែកនារីវិញ ក្នុងថ្ងៃទី២នេះកីឡាការិនីលំដាប់ទី១ពិភពលោកការ៉ូលីន វ៉ូនីអាកគីបានបំបាក់កីឡាការិនីអេស្ប៉ាញនូរីយ៉ា ឡាហ្គោស្តេរ៉ា វីវេសក្នុងលទ្ធផល៦-៣និង៦-១។
សម្រាប់នាងវ៉ូនីអាកគីនេះគឺជាលើកទី១ហើយដែលនាងទទួលជោគជ័យបានឆ្លងផុតជុំទី១ក្របខណ្ឌធំ។ ក្នុងឆ្នាំនេះនាងធ្លាប់បរាជ័យធ្លាក់ចេញពីជុំទី១ប្រកួតក្របខណ្ឌធំចំនួន២លើកដែលការបរាជ័យនោះគឺក្រោមថ្វីដៃកីឡាការិនីអាមេរិកខាងជើងទាំងអស់។ នាងបាននិយាយថា៖ «ពិតមែនហើយ ខ្ញុំបានបំភ្លេចចោលអស់ហើយនូវការបរាជ័យទាំង២លើកនោះ។ ពេលនេះខ្ញុំគឺជាកីឡាការិនីលំដាប់ទី១ពិភពលោក ។ ខ្ញុំទើបតែបានយកឈ្នះជើងឯកបានតែ១កម្មវិធីប្រកួតប៉ុណ្ណោះ។ពេលនេះខ្ញុំមានអារម្មណ៍ល្អខ្លាំងណាស់»។
នៅមុននេះបន្តិចនាងម៉ារីយ៉ា សារ៉ាប៉ូវ៉ាបានប្រឹងប្រែង រហូតឆ្លងផុតជុំទី១ បន្ទាប់ពីបានយកឈ្នះកីឡាការិនីលំដាប់ទី១០២របស់អង់គ្លេសហេឌ័រ វ៉តសុនទាំងលំបាកកាលពីថ្ងៃចន្ទទី២៩សីហា។ សារ៉ាប៉ូវ៉ាដែលធ្លាប់ឈ្នះពានជើងឯកក្របខណ្ឌធំចំនួន៣លើកបានយកឈ្នះនាងវ៉តសុនក្នុងលទ្ធផល៣-៦,៧-៥និង៦-៣ឈានចូលទៅជុំបន្ត។
នៅជុំបន្ទាប់សារ៉ាប៉ូវ៉ានឹងជួបប្រកួតជាមួយកីឡាការិនីបេឡារូសអាណាស្តាស៊ីយ៉ា យ៉ាកីម៉ូវ៉ាដែលបានយកឈ្នះកីឡាការិនីថៃណុបប៉ាវ៉ាន់ ឡឺតឈីវ៉ាកនក្នុងលទ្ធផល៦-០,៤-៦និង៦-៣ ។
នាងវេរ៉ា ហ្សូណារេវ៉ាដែលដណ្តើមបានលេខ២ក្របខណ្ឌនេះកាលពីឆ្នាំទៅមិញក៏បានឈានចូលដល់ជុំទី២ផងដែរបន្ទាប់ពីបានយកឈ្នះកីឡាការិនីបារាំងស្ទេហ្វានី ហ្វូរេតហ្គាកុងក្នុងលទ្ធផល៦-៣និង៦-០ ។ ឯកីឡាការិនីដែលបានឆ្លងផុតជុំទី១ដទៃទៀតមានដូចជា កីឡាការិនីចិនប៉េង ស៊ូអាយ កីឡាការិនីអាល្លឺម៉ង់ជូលៀ ចច កីឡាការិនីអាមេរិកវេនីស វីលៀមនិងកីឡាការិនីឆែកលូស៊ី សាហ្វារ៉ូវ៉ាជាដើម ។ ប៉ុន្តែទន្ទឹមនឹងនេះ រឿងមួយដ៏រន្ធត់ក៏បានកើតឡើងនៅទីលានប្រកួតLouis Armstrong Stadiumខណៈម្ចាស់ជើងឯកក្របខណ្ឌធំFrench Openឆ្នាំ២០១១នាងលីណាត្រូវបានធ្លាក់ចេញពីការប្រកួតទាំងជុំដំបូង។ កីឡាការិនីចិនរូបនេះបានបរាជ័យក្រោមថ្វីដៃកីឡាការិនីរ៉ូម៉ានី ស៊ីម៉ូណា ហាឡេបក្នុងលទ្ធផល៦-២និង៧-៥។ ថ្លែងបន្ទាប់ពីបរាជ័យលីណាបញ្ជាក់ថា៖«សម្រាប់ខ្ញុំគឺពិតជាចង់ធ្វើឲ្យបានល្អដូចជានៅបារាំងដែរ។ ប៉ុន្តែធ្វើមិនងាយស្រួលដូចថាទេ។ អ្វីដែលស្រួលថា វាមិនប្រាកដស្រួលធ្វើទេ »៕
ចែករំលែកព័តមាននេះ