Usyk ចង់ឱ្យលោក ត្រាំ ទៅរស់នៅផ្ទះខ្លួននៅអ៊ុយក្រែន១សប្តាហ៍ ដើម្បីស្វែងយល់ពីសង្គ្រាមនៅទីនោះ
បរទេស ៖ កំពូលអ្នកប្រដាល់សកលអ៊ុយក្រែន ម្ចាស់ខ្សែក្រវាត់ទម្ងន់ធ្ងន់ពិភពលោក Oleksandr Usyk ស្នើឱ្យលោក ដូណាល់ ត្រាំ (Donald…
0:00
0:00
បរទេស ៖ កំពូលអ្នកប្រដាល់សកលអ៊ុយក្រែន ម្ចាស់ខ្សែក្រវាត់ទម្ងន់ធ្ងន់ពិភពលោក Oleksandr Usyk ស្នើឱ្យលោក ដូណាល់ ត្រាំ (Donald Trump) ទៅរស់នៅក្នុងផ្ទះរបស់គេនៅប្រទេសអ៊ុយក្រែន ក្នុងគោលបំណងឱ្យប្រធានាធិបតីអាមេរិករូបនេះ ស្វែងយល់អំពីសង្គ្រាមនៅទីនោះ។ នេះបើយោងតាមប្រភពពី BBC ចេញផ្សាយកាលពីថ្ងៃទី៨ ខែមិថុនា ឆ្នាំ២០២៥។
លោក ត្រាំ ធ្លាប់បានប្តេជ្ញាចិត្តថានឹងដោះស្រាយជម្លោះរវាងរុស្ស៊ីនិងអ៊ុយក្រែនក្នុងរយៈពេល២៤ម៉ោង ប្រសិនបើលោកជាប់ឆ្នោតជាប្រធានាធិបតីអាមេរិក។ ប៉ុន្តែរហូតមកទល់ពេលនេះ ការឈ្លានពានរបស់រុស្ស៊ីមិនទាន់ចប់នៅឡើយ ចាប់តាំងពីលោកបានត្រឡប់មកកាន់សេតវិមានវិញនៅដើមឆ្នាំនេះ។
យ៉ាងណាមិញ កាលពីពេលថ្មីៗនេះ កំពូលអ្នកប្រដាល់សកលអ៊ុយក្រែន Usyk ដែលធ្លាប់ចូលសមរភូមិប្រយុទ្ធដោយផ្ទាល់ប្រឆាំងនឹងកម្លាំងឈ្លានពានរុស្ស៊ី ដើម្បីសន្តិភាពប្រទេសកំណើតខ្លួន ជឿថា លោក ត្រាំ ចាំបាច់ត្រូវដឹងកាន់តែច្បាស់ពីស្ថានភាពដ៏អាក្រក់ ប្រសិនបើគាត់ចង់ស្វែងរកដំណោះស្រាយចំពោះវិបត្តិនោះ។ កំពូលអ្នកប្រដាល់វ័យ៣៨ឆ្នាំរូបនេះ បានជំរុញឱ្យប្រធានាធិបតីអាមេរិកទី៤៧ ទៅរស់នៅផ្ទះរបស់គេជាមួយគ្នាក្នុងប្រទេសអ៊ុយក្រែន ដើម្បីមើលឱ្យឃើញច្បាស់ពីការខូចខាត ដែលបានកើតឡើងដោយសារសង្គ្រាម។
អ្នកប្រដាល់មិនទាន់ស្គាល់ចាញ់ Usyk ដែលទើបតែបានផ្តួលកំពូលអ្នកប្រដាល់ចក្រភពអង់គ្លេស Tyson Fury កាលពីចុងឆ្នាំ២០២៤ បានប្រាប់សារព័ត៌មាន BBC កាលពីថ្ងៃអាទិត្យថា «ខ្ញុំណែនាំប្រធានាធិបតីអាមេរិក លោក ដូណាល់ ត្រាំ ឱ្យមកអ៊ុយក្រែនហើយរស់នៅក្នុងផ្ទះរបស់ខ្ញុំរយៈពេល១សប្តាហ៍។ ត្រឹម១សប្តាហ៍ប៉ុណ្ណោះ ខ្ញុំនឹងប្រគល់ផ្ទះខ្ញុំឱ្យគាត់។ សូមរស់នៅអ៊ុយក្រែន ហើយមើលអ្វីដែលកំពុងកើតឡើងរាល់យប់។ រាល់យប់មានគ្រាប់បែក គ្រាប់រ៉ុក្កែត និងយន្តហោះហើរ ហើរពីលើផ្ទះខ្ញុំ»។
កាលពីខែកុម្ភៈកន្លងទៅ លោក ត្រាំ បានប៉ះទង្គិចពាក្យសម្តីជាមួយមេដឹកនាំអ៊ុយក្រែន លោក Volodymyr Zelensky អំឡុងពេលជំនួបក្នុងការិយាល័យ Oval Office ដោយនៅពេលនោះ លោក ត្រាំ បានព្រមានលោក Zelensky ឱ្យបង្ហាញការដឹងគុណបន្ថែមទៀតសម្រាប់ជំនួយអាមេរិកក្នុងកិច្ចចរចាសន្តិភាព មុនពេលប្រាប់មេដឹកនាំអ៊ុយក្រែនឱ្យចាកចេញពីសេតវិមាន។
នៅពេលសួរថាតើ លោក ត្រាំ អាចត្រូវបានគេបញ្ចុះបញ្ចូលឱ្យមានការផ្លាស់ប្តូរគំនិតលើបញ្ហាអ៊ុយក្រែន ឬអត់នោះ Usyk បាននិយាយថា «ខ្ញុំមិនដឹងទេ។ ប្រហែលជាគាត់នឹងយល់ ហើយក៏ប្រហែលជាគាត់នឹងមិនយល់។ ប្រជាជនអ៊ុយក្រែនកំពុងស្លាប់ វាមិនត្រឹមតែជាកម្លាំងយោធាប៉ុណ្ណោះទេ ប៉ុន្តែកុមារ ស្ត្រី មនុស្សចាស់។ សម្រាប់ខ្ញុំពិបាកណាស់។ វាជាប្រទេសរបស់ខ្ញុំ។ ខ្ញុំបារម្ភអំពីអ្វីដែលកើតឡើងនៅក្នុងប្រទេសរបស់ខ្ញុំ»។
Usyk បានធ្វើយុទ្ធនាការដើម្បីសន្តិភាពក្នុងប្រទេសអ៊ុយក្រែន ចាប់តាំងពីការប្រកួតលើកទី២ជាមួយអ្នកប្រដាល់អង់គ្លេស Anthony Joshua កាលពីបីឆ្នាំមុន។ សង្គ្រាមបានផ្ទុះឡើងក្នុងប៉ុន្មានខែមុនការប្រកួតនោះ ហើយ Usyk នៅតែជាផ្នែកសំខាន់នៃកិច្ចខិតខំប្រឹងប្រែងដើម្បីសន្តិភាពរបស់អ៊ុយក្រែនបង្ហាញទៅកាន់ពិភពលោក រួមជាមួយអតីតកំពូលអ្នកប្រដាល់ទម្ងន់ធ្ងន់អ៊ុយក្រែន លោក Wladimir និង Vitali Klitschko ។
គួរបញ្ជាក់ថា Usyk ដែលជាម្ចាស់ជើងឯកខ្សែក្រវាត់ WBA (super) WBO និង WBC នឹងត្រូវតទល់ជាមួយអ្នកប្រដាល់អង់គ្លេស Daniel Dubois នៅថ្ងៃទី១៩ ខែកក្កដា ខាងមុខនេះ នៅកីឡដ្ឋានជាតិ Wembley ចក្រភពអង់គ្លេស។ ជំនួបនេះ គឺជាការប្រកួតសឹងសឹករវាងអ្នកទាំងពីរ ខណៈដែលកាលពីខែសីហា ឆ្នាំ២០២៣ Usyk បានយកឈ្នះនៅទឹកទី៩៕
ចែករំលែកព័តមាននេះ