សហរដ្ឋអាមេរិក ៖ សហព័ន្ធ​បាល់ទាត់​ពិភពលោក ហៅ​កាត់​ថា FIFA កំពុង​ប្រឈម​មុខ​នឹង​ការ​រិះគន់​យ៉ាង​ខ្លាំង​ជុំវិញ​ការ​ប្រកួត​ពានរង្វាន់​ក្លិប​លំដាប់​ពិភពលោក Club World Cup ឆ្នាំ​២០២៥ នៅ​សហរដ្ឋអាមេរិក បន្ទាប់​ពី​ការ​ប្រកួត​រវាង​ក្រុម​តំណាង​កូរ៉េ​ខាងត្បូង Ulsan Hyundai ទល់​នឹង​ក្រុម​មក​ពី​អាហ្វ្រិក​ខាងត្បូង Mamelodi Sundowns កាលពី​ថ្ងៃ​ទី​១៨ ខែមិថុនា កន្លង​ទៅ មាន​អ្នក​ទស្សនា​ផ្ទាល់​ប្រហែល​៦០០​នាក់​ប៉ុណ្ណោះ ។

អំឡុង​ពេល​ក្រុម​ទាំង​ពីរ​កំពុង​កម្តៅ​សាច់ដុំ មុន​ការ​ប្រកួត​ផ្លូវការ​នៅ​កីឡដ្ឋាន Inter&Co ដែល​មាន​សមត្ថភាព​ផ្ទុក​អ្នក​ទស្សនា ២៥ ៥០០​នាក់ នៅ​ទីក្រុង​អ័​រ​ឡែ​ន​ដូ (Orlando) រដ្ឋ​ផ្ល​រី​ដា (Florida) មាន​តែ​អ្នក​ទស្សនា​មក​ដល់​ត្រឹម​៩៧ នាក់​ប៉ុណ្ណោះ ហើយ​ចំនួន​នោះ​បាន​កើនឡើង​ប្រហែល​៦០០​នាក់ ប៉ុន្តែ​ចំនួន​នេះ​នៅ​តែ​ជា​ចំនួន​តិច​បំផុត​មួយ សម្រាប់​ការ​ប្រកួត​ពានរង្វាន់​លំដាប់​ពិភពលោក​។

អ្នក​និយម​បណ្តាញ​សង្គម​ម្នាក់​បាន​សរសេរ​លើ​បណ្តាញ​សង្គម X ថា FIFA Club World Cup គឺជា​គ្រោះ​មហន្តរាយ​ពិតប្រាកដ​សម្រាប់​ក្រុម​តូច​ៗ​។ រីឯ​ម្នាក់​ទៀត​ក៏​បាន​សរសេរ​ថា តើ​មាន​អ្នក​ទស្សនា​ប៉ុន្មាន​នាក់​នៅ​អ័​រ​ឡែ​ន​ដូ​? ម្នាក់​ទៀត​ថា សូ​ម្បី​ការ​ប្រកួត​លី​គ​លំដាប់​ទាប​ក៏​ទាក់ទាញ​ហ្វូង​ទស្សនា​ច្រើន​ជាង​នេះ​ដែរ​។ ទន្ទឹម​ជាមួយ​គ្នា​នោះ អ្នក​សង្កេតការណ៍​ជា​ច្រើន​បាន​សម្តែង​ការ​ព្រួយបារម្ភ​ថា ប្រសិនបើ​អ្នកគាំទ្រ​បន្ត​ស្ថិត​នៅ​កម្រិត​ទាប​បែប​នេះ វា​អាច​ប៉ះពាល់​ដល់​ភាព​ទំនុកចិត្ត និង​ភាព​ជឿជាក់​នៃ​ការ​ប្រកួត​។ អ្នកខ្លះ​បាន​ព្រមាន​ថា លោក Gianni Infantino ប្រធាន FIFA អាច​នឹង​ប្រឈម​មុខ​នឹង​សម្ពាធ​កាន់តែ​ខ្លាំង​ឡើង​លើ​ស្ថានភាព​បែប​នេះ​។

សូម​ជ​ម្រ​ប​ថា ជំនួប​នៅ​ក្នុង​ពូ​ល F ដែល​ក្រុម Mamelodi Sundowns បាន​យកឈ្នះ​លើ​ក្រុម Ulsan Hyundai លទ្ធផល ១-០ ត្រូវ​បាន​កត់ត្រា​មាន​អ្នក​ទស្សនា​ផ្ទាល់​តិច​បំផុត​នៅ​ព្រឹត្តិការណ៍ Club World Cup ឆ្នាំ​២០២៥ រហូត​មក​ដល់​ពេល​នេះ ទោះបីជា​ការ​ប្រកួត​ជា​ច្រើន​ផ្សេង​ទៀត​ក៏​សង្កេត​ឃើញ​អំពី​ចំនួន​អ្នក​ទស្សនា​តិច​ដូច​គ្នា​ផង​ដែរ​។

ជាក់ស្តែង ជំនួប​ដែល​ក្រុម​តោ​ខៀវ Chelsea យកឈ្នះ​ក្រុម​ម្ចាស់ផ្ទះ Los Angeles FC លទ្ធផល ២-០ កាលពី​ថ្ងៃ​ទី​១៦ ខែមិថុនា កន្លង​ទៅ បាន​ទាក់ទាញ​អ្នក​ទស្សនា​ចំនួន ២២ ១៣៧​នាក់ នៅ​ក្នុង​កីឡដ្ឋាន Mercedes-Benz ដែល​មាន​សមត្ថភាព​ផ្ទុក​ដល់ ៧៥ ០០០​នាក់​។ ការ​ប្រកួត​រវាង​ក្រុម​ប្រេ​ស៊ី​ល Botafogo ទល់​នឹង​ក្រុម​ម្ចាស់ផ្ទះ Seattle Sounders មាន​ទស្សនា ៣០ ១៥១​នាក់​ក្នុង​កីឡដ្ឋាន​មាន​កៅអី ៧២ ០០០​។ ប្រកួត​រវាង​ក្រុម​យក្ស​អា​ល្លឺ​ម៉​ង់ Bayern Munich ទល់​នឹង​ក្រុម​នូ​វែ​ល​សេ​ឡង់ Auckland City មាន​ទស្សនា ២១ ១៥២​នាក់​ក្នុង​កីឡដ្ឋាន​ដែល​មាន​កៅអី ២៦ ០០០​នាក់​។ ការ​ប្រកួត​ផ្សេង​ទៀត ក៏​ត្រូវ​បាន​សង្កេត​ឃើញ​អ្នក​ទស្សនា​នៅ​ក្នុង​កម្រិត​ទាប​ផង​ដែរ​។ មាន​តែ​ការ​ប្រកួត​ចំនួន​៣​ប៉ុណ្ណោះ មាន​អ្នក​ទស្សនា​លើស​ពី​៥​ម៉ឺន​នាក់ គឺ​ជំនួប​រវាង​ក្រុម​យក្ស​អ៊ី​តា​លី Inter Miami ទល់​នឹង​ក្រុម​អេ​ហ្ស៊ី​ប Al Ahly ជំនួប​រវាង PSG ទល់​នឹង​ក្រុម Atletico Madrid ព្រមទាំង​ជំនួប​រវាង Boca Juniors ទល់​នឹង Benfica​។

ការ​ប្រកួត​ឆ្នាំ​នេះ ក្រោម​ទម្រង់​ថ្មី ដោយ​បង្កើន​ចំនួន​ក្រុម​ដល់​៣២ ខុស​ពី​ការ​ប្រកួត​មុន​ៗ ដែល​មាន​តិច​ជាង​១០​ក្រុម ប៉ុន្តែ​មិន​ទទួល​បាន​ភាព​ទាក់ទាញ​ខ្លាំង​។ អ្នក​រិះគន់​បាន​លើក​ឡើង​ថា ទម្រង់​ថ្មី​នៅ​ឆ្នាំ​នេះ បាន​ធ្វើ​ឱ្យ​គុណភាព​ការ​ប្រកួតប្រជែង​ធ្លាក់​ចុះ​ខ្លាំង​។ តួយ៉ាង​ការ​ប្រកួត Bayern បំបាក់ Auckland City ដែល​កីឡាករ​ភាគច្រើន​ពាក់កណ្តាល​អាជីព ដោយ​លទ្ធផល ១០-០ គឺជា​ឧទាហរណ៍​ស្រាប់​។

យ៉ាងណាមិញ បើ​ទោះបីជា​មានការ​រិះគន់​ដូច​ទឹកបាក់​ទំនប់​ក៏​ដោយ ប៉ុន្តែ FIFA អះអាង​ថា សំបុត្រ​ទស្សនា​ជិត ១,៥​លាន​ត្រូវ​បាន​លក់​អស់​។ ការ​ប្រកួត​ដែល​ចាប់ផ្តើម​ពី​ថ្ងៃ​ទី​១៤ ខែមិថុនា ដល់​ថ្ងៃ​ទី​១៣ ខែកក្កដា ត្រូវ​បាន​ព្យាករណ៍​ថា​នឹង​បង្កើត​ប្រាក់​ចំណូល​រាប់​ពាន់​លាន​ដុល្លារ ដែល​ភាគច្រើន​តាម​រយៈ​ការ​លក់​សិទ្ធិ​ផ្សាយ និង​សិទ្ធិ​ពាណិជ្ជកម្ម​។ ជាមួយ​គ្នា​នោះ FIFA នឹង​ចែក​ប្រាក់​រង្វាន់​រហូត​ដល់ ១,១​ពាន់​លាន​ដុល្លារ​អា​មេ​រិ​ក ដោយ​ម្ចាស់​ជើងឯក​រំពឹង​ថា​នឹង​ទទួល​បាន​ប្រហែល ១២៥​លាន​ដុល្លារ​៕ ដកស្រង់ ៖ VnExpress