ខេត្តកំពង់ចាម ៖ ស្នូរគ្រាប់កាំភ្លើងបានផ្ទុះឡើងមិនតិចជាង៥គ្រាប់នៅវេលាម៉ោងជិត១០ យប់ថ្ងៃទី២៩ សីហា នៅចំណុចខាងជើងវិទ្យាល័យព្រះសីហនុ ក្រុងកំពង់ចាម បង្កឱ្យមានការភ្ញាក់ផ្អើល ហើយនគរបាលព្រហ្មទណ្ឌខេត្ត និងកងរាជអាវុធហត្ថខេត្តបានទៅកាន់ចំណុចនោះភ្លាម ។
ខេត្តកំពង់ចាម ៖ ស្នូរគ្រាប់កាំភ្លើងបានផ្ទុះឡើងមិនតិចជាង៥គ្រាប់នៅវេលាម៉ោងជិត១០យប់ថ្ងៃទី២៩ សីហា នៅចំណុចខាងជើងវិទ្យាល័យព្រះសីហនុ ក្រុងកំពង់ចាម បង្កឱ្យមានការភ្ញាក់ផ្អើល ហើយនគរបាលព្រហ្មទណ្ឌខេត្ត និងកងរាជអាវុធហត្ថខេត្តបានទៅកាន់ចំណុចនោះភ្លាម ។
តាមការពិតស្នូរកាំភ្លើងនោះគឺទាហានបាញ់ឡើងលើ ដើម្បីបំបែកក្រុមស្រវឹងដែលដើរស្រែកបង្កភាពអនាធិបតេយ្យនៅលើផ្លូវសាធារណៈ។ លោកវរសេនីយ៍ត្រីសុក សំបូរ នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តប្រាប់កោះសន្តិភាពថា បន្ទាប់ពីមានស្នូរផ្ទុះមួយសន្ទុះលោកវរសេនីយ៍ឯកជឹម សេងហុង ស្នងការរងនគរបាលខេត្តទទួលផែនកណ្តាលយុត្តិធម៌បញ្ជារូបលោកដឹកនាំកម្លាំងក្រោមឱវាទទៅស្រាវជ្រាវដល់កន្លែងកើតហេតុ ។
មិនឃើញមានវត្ថុតាងណាមួយបន្សល់ទុកនៅកន្លែងកើតហេតុនោះទេ ខណៈជនបង្កគេចខ្លួនបាត់ទៅហើយ។គេសង្ស័យថា ការបាញ់នោះដោយកាំភ្លើង AK ម្យ៉ាងទៀតការផ្ទុះអាវុធនោះសង្ស័យមានជម្លោះផ្ទៃក្នុងណាមួយដោយទប់កំហឹងមិនបាន ។
លោកវរសេនីយ៍ត្រីសំ ផាត អធិការនគរបាលក្រុងកំពង់ចាមប្រាប់ឱ្យដឹងថា ក្រុមស្រវឹងប្រមាណ៥នាក់ចេញពីហាងផឹកស៊ី១នៅក្នុងក្រុងកំពង់ចាមពេលដល់ត្រង់មុខវិទ្យាល័យព្រះសីហនុក្បែរបន្ទាយទាហានឮសូរប្រកែកគ្នាបង្កភាពអនាធិបតេយ្យនៅលើផ្លូវសាធារណៈ ។ រំពេចនោះទាហានម្នាក់ដែលយាមប្រចាំការឃើញក៏ហៅឱ្យឈប់តែមិនព្រមឈប់ទើបបាញ់បង្ហើរឡើងលើមិនតិចជាង៥គ្រាប់ដើម្បីបំបែកក្រុមស្រវឹងនោះធ្វើឱ្យម្នាក់ៗរត់គេចខ្លួនអស់ទៅ ។ គេមិនស្គាល់អត្តសញ្ញាណជនស្រវឹងទាំងនោះទេ គ្រាន់តែដឹងថារស់នៅស្រុកកំពង់សៀម ។
លោកទុំ លឹមយុន នាយកវិទ្យាល័យព្រះសីហនុ ក្រុងកំពង់ចាមមានប្រសាសន៍តាមទូរស័ព្ទថា មានបុរសចំនួន៣នាក់ជិះម៉ូតូ១គ្រឿងទាំងស្រវឹងដោយនៅក្នុងដៃមានកាន់ដែកបំពង់ទីបអូសតាមផ្លូវថ្នល់បែកផ្កាភ្លើង និងស្រែកឡូឡាទៀតផង ។ ឃើញបែបនេះទាហានដែលយាមប្រចាំការស្រែកសួរ ហើយត្រូវជនទាំងនោះតបវិញថា «ស្អី! តាមផ្លូវអូសមិនបាន?» ។ ពេលជិះម៉ូតូទៅដល់ត្រង់ផ្លូវបំបែកខាងក្រោយសាលាក្បែរស្ថានីយលក់ប្រេង ជន២នាក់ក្នុងចំណោម៣នាក់នោះបានដើរត្រឡប់មកវិញទាំងក្នុងដៃមានកាន់ដែកបំពង់ទីប ដូច្នេះដើម្បីបញ្ចៀសបញ្ហា ទើបទាហានបាញ់បង្ហើរឡើងលើបំបែកក្រុមនោះ ។ ក្នុងចំណោមជនស្រវឹង៣នាក់នោះមាន២នាក់ទើបចេញពីគុកជាកម្មករលាងរថយន្តនៅទន្លេអុំ។ ក្រោយពេលកើតហេតុថៅកែលាងរថយន្តបណ្តេញពួកគេចេញ ហើយពេលនេះ គេចខ្លួនបាត់ហើយ ៕
ចែករំលែកព័តមាននេះ