ខេត្តស្ទឹងត្រែង ៖ អតីតបវរកញ្ញាតាំងពីឆ្នាំ១៩១៨ មួយរូបពិតជាមិនគួរឱ្យជឿថា មានជីវិតរស់នៅរហូតមកដល់ថ្ងៃនេះបាននិងកំពុងរស់នៅក្នុងខ្ទម កម្សត់ជាមួយកូនស្រីវ័យចំណាស់ និងជាស្ត្រីមេម៉ាយអាយុ៥៩ឆ្នាំ ។ អតីតបវរកញ្ញាដែលពេលនេះមានអាយុ១០៩ឆ្នាំទៅហើយ តែលោកយាយនៅមានកាយសម្បទារឹងមាំនៅឡើយ
ខេត្តស្ទឹងត្រែង ៖ អតីតបវរកញ្ញាតាំងពីឆ្នាំ១៩១៨ មួយរូបពិតជាមិនគួរឱ្យជឿថា មានជីវិតរស់នៅរហូតមកដល់ថ្ងៃនេះបាននិងកំពុងរស់នៅក្នុងខ្ទមកម្សត់ជាមួយកូនស្រីវ័យចំណាស់ និងជាស្ត្រីមេម៉ាយអាយុ៥៩ឆ្នាំ ។ អតីតបវរកញ្ញាដែលពេលនេះមានអាយុ១០៩ឆ្នាំទៅហើយ តែលោកយាយនៅមានកាយសម្បទារឹងមាំនៅឡើយ និងរស់នៅដោយការពឹងផ្អែកលើកូនស្រីចំណាស់លក់នំចំណីបន្តិចបន្តួចសម្រាប់ក្មេង។ បច្ចុប្បន្នលោកយាយអតីតបវរកញ្ញាសម័យអាណានិគមនិយមបារាំងរូបនេះ រស់នៅក្នុងភូមិស្ទឹងត្រែង សង្កាត់ស្ទឹងត្រែង ក្រុងស្ទឹងត្រែង ។
លោកយាយ ជា គឹមហួយ បានរៀបរាប់ពីប្រវត្តិរបស់គាត់ទាំងស្មារតីនៅចងចាំយ៉ាងច្បាស់ថា លោកយាយកើតនៅឆ្នាំ១៩០២ កាលដែលលោកយាយមានអាយុ៨ឆ្នាំ លោកយាយត្រូវបានគេចូលស្តីដណ្តឹង១៥នាក់ តែបានផ្តាច់ពាក្យទៅវិញទាំងអស់ ។ លុះដល់អាយុ១៥ឆ្នាំ ដោយសារតែមានអ្នកមកចូលចែចូវច្រើនពេក ឪពុករបស់លោកយាយបានបញ្ជូនលោកយាយពីភូមិអង្គក្តី ស្រុកសំរោង ខេត្តតាកែវ មកនៅជាមួយឪពុកធំក្នុងទីរួមខេត្តតាកែវ។ ការរស់នៅជាមួយឪពុកធំបានរយៈពេលមួយឆ្នាំឪពុកធំលោកយាយបាននាំមកទីក្រុងភ្នំពេញ ដើម្បីប្រឡងជាបវរកញ្ញា ។ លោកយាយបានជាប់ជាបវរកញ្ញាឯកលេខ១ នៅឆ្នាំ១៩១៨ ក្នុងចំណោមបេក្ខនារីចូលរួម១៣នាក់ ។ លោកយាយមានប្រសាសន៍ថា ការប្រឡងនោះលោកយាយទទួលបានចំណាត់ថ្នាក់លេខ១ចំនួន២ គឺ១-សម្រាប់សម្រស់ ២-សម្រាប់ចរិយាធម៌ ។ ក្រោយពីជាប់ជាបវរកញ្ញាបានមួយឆ្នាំអាយុ១៧ឆ្នាំ លោកយាយបានមកនៅជាមួយឪពុកម្តាយបង្កើតក្នុងភូមិអង្គក្តី ស្រុកសំរោង ខេត្តតាកែវ វិញ ក៏ត្រូវបានបងប្អូនសាច់ឆ្ងាយមកដណ្តឹងរៀបការពេញច្បាប់ តែលោកយាយមិនបានរួមរស់នៅជាមួយស្វាមីជាបងប្អូននោះទេ ព្រោះការផ្សំផ្គុំដោយចាស់ទុំលោកយាយមិនបានស្រឡាញ់ ហើយក៏បានលែងលះគ្នាដោយរក្សាបានជានារីក្រមុំព្រហ្មចារី និងរស់នៅជាស្ត្រីមេមា៉យក្រោយរៀបអាពាហ៍ពិពាហ៍បាន៤ទៅ៥ខែ ។
លោកយាយបន្តថា ការរស់នៅជាស្ត្រីមេមា៉យរហូតដល់អាយុ២០ឆ្នាំ លោកយាយបានរៀបការជាមួយស្វាមីម្នាក់ទៀតមករស់នៅភ្នំពេញ ក្នុងឆ្នាំ១៩២១ រហូតបានកូនប្រុសស្រីចំនួន៩នាក់ ប្រុស៣នាក់ ស្រី៦នាក់ ។ ស្វាមីរបស់លោកយាយក៏បានស្លាប់នៅជំនាន់ប៉ុល ពត និងកូនប្រុសពីរនាក់ ស្រីពីរក៏បានស្លាប់ក្នុងសម័យយង់ឃ្នងនេះដែរ ។ លោកយាយបានបន្តថា ការតស៊ូរស់នៅរបស់លោកយាយដោយការពឹងផ្អែកលើមុខរបររៀបបាយសីឱ្យគេនៅអាយុ៦៣ឆ្នាំ ក៏មានអ្នកមកសុំចែចូវទៀត តែលោកយាយបានបដិសេធ ហើយបន្តរស់នៅជាមួយកូន និងបានផ្សំផ្គុំកូនប្រុសស្រីឱ្យមានប្តីប្រពន្ធរៀងៗខ្លួន ហើយកូនៗក៏បានសុំបែកគ្រួសារ ។ បន្ទាប់មកកូនស្រីម្នាក់បានស្លាប់ទៀត នៅសល់តែកូន៤នាក់ ប្រុសម្នាក់ និងស្រី៣នាក់ បានមករស់នៅខេត្តស្ទឹងត្រែង ទាំងអស់គ្នា ។ ចំណែកលោកយាយត្រូវបានកូនស្រីម្នាក់ក្នុងចំណោម៤នាក់ យកមករស់នៅជាមួយរហូតទល់នឹងបច្ចុប្បន្ន ។
សព្វថ្ងៃលោកយាយ ជា គឹមហួយ មានអាយុ១០៩ឆ្នាំ រស់នៅក្នុងបន្ទុកកូនស្រីចំណាស់ដែលជាស្ត្រីមេមា៉យមានតែកូនប្រុសម្នាក់ធ្វើជាយោធាខេត្ត ។ គួរឱ្យកោតសរសើរចំពោះលោកយាយដែលមានអាយុរហូត១០៩ឆ្នាំទៅហើយ លោកយាយមានជំងឺត្រូវបញ្ជូនទៅកាន់មន្ទីរ ពេទ្យបានតែពីរដងប៉ុណ្ណោះ ដល់ថ្នាក់លោកគ្រូពេទ្យទាំងខ្មែរ និងបរទេសនាំគ្នាជួយសង្គ្រោះយ៉ាងញាប់ដៃញាប់ជើង និងលាន់មាត់គ្រប់គ្នាថា ពុំដែលជួបប្រទះអ្នកជំងឺដែលមានអាយុវែងបែបនេះទេ ពីមុនមក ។ រហូតមកទល់នឹងបច្ចុប្បន្នលោកយាយនៅមានកាយសម្បទារឹងមាំអាចដើរបានតិចតួច អាចដេរប៉ាក់ និងអង្គុយជជែកលេងជាមួយអ្នកដទៃបានក្នុងខ្ទមកម្សត់ជាមួយនឹងកូនស្រីចំណាស់ដែលពឹងផ្អែកលើមុខរបរលក់នំសម្រាប់ក្មេងៗក្នុងភូមិបន្តិចបន្តួចដើម្បីចិញ្ចឹមជីវិត ៕
ចែករំលែកព័តមាននេះ