បន្ទាប់ពីបានយកឈ្នះកីឡាករអូបេគីស្ថានឆាហ្គាអេវដោយពិន្ទុជាឯកច្ឆន្ទក្លាយជាម្ចាស់ជើងឯកថ្មីស្ថាប័ន WBAរួចមក កីឡាករអាឡិចសាន់ឌ័រ ប៉ូវេតគីនត្រូវបានគេរៀបចំឲ្យឡើងប្រកួតការពារខ្សែក្រវាត់របស់ខ្លួនជាលើកដំបូងនាថ្ងៃទី១៧ខែធ្នូខាងមុខនេះនៅសង្វៀនក្រុងហ្ស៊ូរិចប្រទេសស្វ៊ីស។
យោងតាមប្រភពព័ត៌មានដែលគួរឲ្យទុកចិត្តបានឲ្យដឹងថា ប៉ូវេតគីននឹងជួបប្រកួតជាមួយខ្លាចាស់វ័យ៤៩ឆ្នាំអេវែនឌ័រ ហូលីហ្វៀល។ សម្រាប់ប៉ូវេតគីនដែលមានវ័យ៣១ឆ្នាំ ជម្រើសនៃគូប្រកួតលើកនេះនឹងមិនធ្វើឲ្យគេជួបគ្រោះថ្នាក់នោះឡើយដ្បិតហូលីហ្វៀលបច្ចុប្បន្នគឺវាហាក់ដូចជារបស់ដែលគេហៅថាហ្វូស៊ីលទៅហើយ។ តាមអាយុរបស់គេដែលក្បែរ៥០ឆ្នាំហើយនោះ ហូលីហ្វៀលពិបាកនឹងយកឈ្នះការប្រកួតបានណាស់។
និយាយពីឯតទគ្គកម្មប្រកួតវិញ ប៉ូវេតគីនធ្លាប់ប្រកួតឈ្នះ២២លើកមិនដែលចាញ់និងផ្តួលដៃគូឲ្យសន្លប់បានចំនួន១៥លើក។ ចំណែកហូលីហ្វៀលធ្លាប់ប្រកួតឈ្នះ៤៤លើក ចាញ់១០ ស្មើ២ និងធ្លាប់ផ្តួលដៃគូឲ្យសន្លប់ចំនួន២៩លើក ។
ដូច្នេះតាមបទពិសោធន៍ហូលីហ្វៀលពិតជាមានច្រើនលើសលប់។ ប៉ូវេតគីនថ្វីដ្បិតតែចំនួនឡើងសង្វៀនប្រកួតតិចក្តី តែ២២លើកគេមិនដែលចាញ់ម្តងណាឡើយ។ ការប្រកួតលើកនេះសម្រាប់ប៉ូវេតគីនគឺហាក់បីដូចជាការទទួលបានប្រាក់ដោយមិនបាច់ប្រឹងអស់កម្លាំងដ្បិតហូលីហ្វៀលពិតជាគ្មានអ្វីដែលជាការគំរាមកំហែងឡើយ។ ប៉ូវេតគីននឹងឈ្នះការប្រកួតការពារខ្សែក្រវាត់លើកដំបូងរបស់ខ្លួននៅខែធ្នូខាងមុខនេះជាមិនខាន។ ដូចនេះឱកាសនៃការទទួលបានខ្សែក្រវាត់ពិភពលោកសម្រាប់ហូលីហ្វៀលពិតជាស្តួចស្តើងស្ទើរតែគ្មាន។
ហូលីហ្វៀលធ្លាប់បាននិយាយថា ខ្លួនប្រាថ្នាចង់ប្រកួតឯកភាពខ្សែក្រវាត់ទម្ងន់ធ្ងន់ពិភពលោកមុននឹងចូលនិវត្ត។ ក្នុងអតីតកាលគេធ្លាប់បានបាត់បង់ខ្សែក្រវាត់ស្ថាប័ន WBOនិងស្ថាប័ន WBA។ ខែធ្នូខាងមុខនេះគេអាចនឹងជួបសំណាងអាក្រក់ជាលើកទី៣ទៀត។ ភាពស្រមើលស្រមៃក្នុងការដណ្តើមបានខ្សែក្រវាត់ពិភពលោកមុននឹងចូលនិវត្តរបស់ហូលីហ្វៀលគឺមានតែលើក្រដាសប៉ុណ្ណោះ ៕
ចែករំលែកព័តមាននេះ