ខេត្ដស្វាយរៀង ៖ អំណោយជាថវិការបស់សប្បុរសជនឯនាយសមុទ្រ ចំនួន១៥០ដុល្លារអាមេរិក ស្មើនឹង ៦២៦.៧០០រៀល ត្រូវបានភ្នាក់ងារកោះសន្ដិភាពប្រចាំខេត្ដស្វាយរៀង នាំយកទៅជូនលោកយាយញ៉ឹម ហ៊ុន អាយុ៨៤ឆ្នាំ នៅភូមិស្វាយតាយាន ឃុំស្វាយតាយាន ស្រុកកំពង់រោទិ៍ ដែលរងគ្រោះដោយសារកូនប្រុសអប្រិយឈ្មោះជ័យ សឿន អាយុ៤៤ឆ្នាំ ចាប់រំលោភយ៉ាងអមនុស្សធម៌ ធ្វើឱ្យលោកយាយសន្លប់ បាត់បង់ស្មារតី។
ការប្រគល់អំណោយនេះបានប្រព្រឹត្ដទៅ កាលពីថ្ងៃទី៣ មករា ឆ្នាំ២០១០ ដោយថវិកា ចំនួន៦២៦.៧០០រៀលនោះ យើងបានយកទៅទិញជាគ្រឿងឧបភោគបរិភោគ និង សំភារប្រើប្រាស់មួយចំនួនទៅតាមការស្នើសុំរបស់ម្ចាស់អំណោយ ដែលក្នុងនោះមានអង្ករចំនួន៥០គីឡូក្រាម ត្រីងៀតធុនល្អ ២គីឡូ ក្រាម ត្រីឆ្អើរ១ដុំ (មាន១០ក្រាស់) ទឹកត្រី១យួរ ទឹកស៊ីអ៊ីវ១កេស ឆ្នាំង២ ចាន២ ស្លាបព្រានិងសម ២គូ កំសៀវទឹក១ កាទឹក១ សំពត់ព្រែ១ អាវប៉ាក់១ និងនៅសល់ប្រាក់ចំនួន៣០ម៉ឺនរៀលទៀត បានប្រគល់ជូនលោកយាយសំរាប់ទុកទិញថ្នាំព្យាបាលជម្ងឺ ។
អំណោយជាទឹកប្រាក់១៥០ដុល្លារអាមេរិកនេះ ការិយាល័យកោះសន្ដិភាពទទួលបានពីសប្បុរសជន នៅសហ រដ្ឋអាមេរិក ក្នុងនោះមាន
-លោកស្រី នួន ភឿង ចំនួន៥០ដុល្លារ
-លោកស្រីចេក ហ៊ាន ចំនួន៥០ដុល្លារ
-និងអ្នកស្រី ហ៊ាន សុខលី ចំនួន៥០ដុល្លារ ។
ចំពោះទឹកប្រាក់ដែលអ្នកស្រីហ៊ាន សុខលី បានធ្វើអំណោយទានជូនដល់លោកយាយញ៉ឹម ហ៊ុន អាយុ៨៤ឆ្នាំ នោះ គឺដើម្បីឧទ្ទិសកុសលជូនដល់វិញាណក្ខន្ធអ្នកស្រី ខាំ ណន ជាម្ដាយដែលបានទទួលមរណភាព កាលពីពេលថ្មីៗកន្លងមកនេះ ដោយសូមឱ្យវិញាណក្ខន្ធអ្នកស្រីខាំ ណន បានទៅកើតនៅក្នុងសុគតិភព ។
សូមបញ្ជាក់ជូនផងដែរថា ពេលភ្នាក់ងារកោះសន្ដិភាពនាំអំណោយ យកទៅប្រគល់ជូន ដល់លោកយាយ ញ៉ឹម ហ៊ុន នោះ ក៏បានដកប្រាក់អំណោយនេះខ្លះ ទិញគុយទាវឆ្ងាញ់១ចានជូនលោកយាយពិសាផងដែរ ដែល ពេលបានទទួលអំណោយទាំងអស់នេះ លោកយាយបានលើកដៃប្រណម្យគោរពជូនពរ ចំពោះសប្បុរសជន ទាំងអស់សូមបានជួបតែ នឹងពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ ជានិច្ចនិរន្ដរ៍តរៀងទៅ ។
ចែករំលែកព័តមាននេះ