ខេត្តព្រៃវែង ៖ កាលពីថ្ងៃទី២៣ សីហា ក្រោមការដឹកនាំរបស់លោកហ៊ុន សាវី នាយសង្កាត់ជលផលស្រុកពាមរក៍ សហការចូលរួមដោយលោកប៉ៃ ម៉េង អភិបាលរងស្រុក ព្រមទាំងលោកមេឃុំ ក្រុមប្រឹក្សាឃុំ និងលោកនាយរងប៉ុសិ៍្តរដ្ឋបាលឃុំអ្នកលឿងបានបង្ក្រាបឧបករណ៍ នេសាទខុសច្បាប់នៅភូមិទទឹងថ្ងៃ ឃុំអ្នកលឿង
ខេត្តព្រៃវែង ៖ កាលពីថ្ងៃទី២៣ សីហា ក្រោមការដឹកនាំរបស់លោកហ៊ុន សាវី នាយសង្កាត់ជលផលស្រុកពាមរក៍ សហការចូលរួមដោយលោកប៉ៃ ម៉េង អភិបាលរងស្រុក ព្រមទាំងលោកមេឃុំ ក្រុមប្រឹក្សាឃុំ និងលោកនាយរងប៉ុសិ៍្តរដ្ឋបាលឃុំអ្នកលឿងបានបង្ក្រាបឧបករណ៍នេសាទខុសច្បាប់នៅភូមិទទឹងថ្ងៃ ឃុំអ្នកលឿង ស្រុកពាមរក៍ ដោយកាប់បំផ្លាញលប២៧ របាំងព្រួល៨៥០ម៉ែត្រ និងប្ញស្សីបង្គោល ២.៨០០ដើម ។
លោកនាយសង្កាត់ជលផលពាមរក៍ឱ្យដឹងថា សេចក្តីប្រកាសរបស់រាជរដ្ឋាភិបាលក៏ដូចជាសមត្ថកិច្ចពាក់ព័ន្ធគ្រប់លំដាប់ថ្នាក់ចាប់តាំងពីភូមិ-ឃុំ និងនាយសង្កាត់នេសាទទូទាំងខេត្តដល់ប្រជានេសាទឱ្យស្វែងយល់ពីមុខរបរនេសាទ និងឧបករណ៍នានាដែលខុសច្បាប់ជលផល គឺកុំឱ្យប្រព្រឹត្ត តែជនខិលខូចមួយចំនួនតូចមិនស្តាប់ ហើយតែងតែលួចនេសាទដោយខុសច្បាប់ប្រើឧបករណ៍ដែលហាមឃាត់ និងនេសាទនៅរដូវបិទនេសាទ ពេលដែលមច្ឆជាតិកំពុងពងកូន ។ ដើម្បីទប់ស្កាត់រាល់បទល្មើសនានា សមត្ថកិច្ចជលផលព្យាយាមចុះល្បាតស្រាវជ្រាវ និងនាំកម្លាំង ចម្រុះប្រតិបត្តិការជានិច្ច ។
លោកអូន ស៊ីណាត នាយខណ្ឌរដ្ឋបាលជលផលខេត្តឱ្យដឹងថា ខេត្តព្រៃវែងឆ្នាំនេះរាល់បទល្មើសនេសាទនានា គឺលោកតែងដាក់បទបញ្ជាឱ្យនាយសង្កាត់នេសាទគ្រប់ស្រុកទាំងអស់ក្នុងខេត្តឱ្យឃ្លាំមើល និងទៅបង្ក្រាបចោលនៅនឹងកន្លែងភ្លាមៗ ព្រមទាំងស្វែងរកចាប់ជនប្រព្រឹត្តបទល្មើសយកទៅឱ្យតុលាការផ្តន្ទាទោសថែមទៀត ។ ឆ្នាំនេះបទល្មើសនេសាទថយ១កម្រិតខុសពីឆ្នាំមុនៗ ។
លោកឱ្យដឹងថា ល្បិចជនខិលខូចមានច្រើនរូបភាពណាស់ ដូចជាការដាក់ខ្សែកាបលើឧបករណ៍របស់ខ្លួន ដើម្បីកុំឱ្យក្រុមជលផល រកឃើញពេលជលផលជិះកាណូតដើរល្បាតពួកគេទម្លាក់ខ្សែកាប និងឧបករណ៍នោះចុះទៅបាតដី។ ពេលណាក្រុមជលផលបើកកាណូត ទៅបាត់ គេលបលួចលើកខ្សែកាបនោះឡើងវិញ ។ ទោះជាមានល្បិចបែបនេះក្តី ក៏លោកធ្លាប់ចាប់បំផ្លាញចោលជាហូរហែដែរ ។
លោកនិយាយទៀតថា រាល់រូបភាព និងកលល្បិចជនខិលខូច ទោះបីឃុបឃិតជាមួយជនណាមួយជាបណ្តាញ ដើម្បីជាដំណឹង ឬការពាររារាំងក៏ដោយក៏លោកមិនខ្លាចដែរ លោកនឹងខិតខំស្រាវជ្រាវចាប់កម្ទេចចោលមិនឱ្យមានតទៅទៀតទេ ៕
ចែករំលែកព័តមាននេះ