រាជធានីភ្នំពេញ ៖ លោក Jacques Pellet ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំនៅកម្ពុជា បានអះអាងជំនួសមុខឲ្យប្រមុខរដ្ឋាភិបាលរបស់ខ្លួនថា បារាំងបានត្រៀមលក្ខណៈរួចរាល់ហើយក្នុងការផ្តល់ឯកសារពាក់ព័ន្ធនានាទាក់ទងទៅជម្លោះព្រំដែនកម្ពុជា-ថៃ មកកម្ពុជា…
រាជធានីភ្នំពេញ ៖ លោក Jacques Pellet ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំនៅកម្ពុជា បានអះអាងជំនួសមុខឲ្យប្រមុខរដ្ឋាភិបាលរបស់ខ្លួនថា បារាំងបានត្រៀមលក្ខណៈរួចរាល់ហើយក្នុងការផ្តល់ឯកសារពាក់ព័ន្ធនានាទាក់ទងទៅជម្លោះព្រំដែនកម្ពុជា-ថៃ មកកម្ពុជា ដើម្បីបញ្ចប់ជម្លោះជាមួយថៃ ។
ការលើកឡើងរបស់ឯកអគ្គរដ្ឋទូតបារាំង ខណៈចូលជួបពិភាក្សាការងារជាមួយសម្តេចតេជោ ហ៊ុន សែន ប្រធានព្រឹទ្ធសភា នាព្រឹកថ្ងៃទី១០ ខែកក្កដា ឆ្នាំ២០២៥ នាវិមានព្រឹទ្ធសភា ។
សូមជម្រាបថា ប្រទេសបារាំង គឺជាអ្នកដែលគូសផែនទីព្រំដែន កម្ពុជា-ថៃ ក្នុងអំឡុងពេលចូលមកដាក់អាណានិគមលើប្រទេស នៅតំបន់អាស៊ី-អាគ្នេយ៍ កាលពីឆ្នាំ១៩០៧ ដូច្នេះបារាំងដឹងសព្វបែបយ៉ាងអំពីព្រំដែនទឹក និងគោក រវាងកម្ពុជា-ថៃ ។
ឯកឧត្តម ជា ធីរិទ្ធ អ្នកនាំពាក្យប្រធានព្រឹទ្ធសភា បានឲ្យដឹងក្រោយបញ្ចប់កិច្ចជំនួបរវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងឯកអគ្គរដ្ឋទូតបារាំង សម្តេចតេជោបង្ហាញក្តីសង្ឃឹមយ៉ាងមុតមាំថា ភាគីបារាំងនឹងអនុវត្តនូវការផ្តល់ឯកសារពាក់ព័ន្ធវិវាទកម្ពុជា-ថៃ ដូចអ្វីដែលលោកម៉ាក្រុង ប្រធានាធិបតីបារាំង បានសន្យាជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាក្នុងឱកាសសម្តេច បានចូលរួមកិច្ចប្រជុំនៅបារាំង និងមានជំនួបជាមួយប្រធានាធិបតីបារាំង កាលពីពេលថ្មីៗនេះ ។
សម្តេចតេជោ បន្តថា នេះហើយជាអ្វីដែលកម្ពុជាចង់បានពីភាគីបារាំងទាំងឯកសារ និងផែនទីគូសវៀសដោយបារាំង ។
ជាមួយគ្នានេះ សម្តេចប្រធានព្រឹទ្ធសភា ក៏បានមានប្រសាសន៍ទៅកាន់ឯកអគ្គរដ្ឋទូតបារាំងទៀតថា កម្ពុជាមិនចង់បានអ្វីក្រៅពីឲ្យប្រទេសថៃគោរពទៅតាមយន្តការអន្តរជាតិ ដែលជាច្បាប់សំខាន់ក្នុងការដោះស្រាយបញ្ហាដោយសន្តិវិធី ។
ក្នុងជំនួបលោក Jacques Pellet ឯកអគ្គរដ្ឋទូតបារាំងបានឆ្លើយតបថា បារាំងស្វាគមន៍ និងត្រៀមខ្លួនសម្រាប់ការផ្តល់ឯកសារមកឲ្យប្រទេសទាំងពីរ ជាពិសេសកម្ពុជា ។
បើតាមឯកឧត្តម ជា ធីរិទ្ធ បានបញ្ជាក់ថា ៖«ឯកឧត្តមគូសបញ្ជាក់ថា បារាំងនឹងត្រៀមខ្លួនជានិច្ចក្នុងការផ្តល់ឯកសារពាក់ព័ន្ធទៅនឹងបញ្ហាព្រំដែនរវាងកម្ពុជា និងថៃ តាំងពីផែនទីក៏ដូចគ្នាដែរ ដើម្បីប្រគល់ជូននៅក្នុងការដោះស្រាយបញ្ហានេះដោយសន្តិវិធីក្នុងទិដ្ឋភាពជំហរលើច្បាប់អន្តរជាតិ»។
បន្ថែមពីលើនេះទៀត ឯកអគ្គរដ្ឋទូតបារាំង បង្ហាញការគាំទ្រជាខ្លាំងដែលកម្ពុជាបាន ជ្រើសរើសយកដំណោះស្រាយតាមរយៈយន្តការតុលាការយុត្តិធម៌អន្តរជាតិ(ICJ) ៕
ចែករំលែកព័តមាននេះ