ខេត្តកំពង់ធំ ៖ រឿងរត់ពន្ធឈើគ្រញូងដែលមានតម្លៃប្រៀបដូចជាមាសនោះកំពុង បង្កភាពអនាធិបតេយ្យដល់សង្គមជាតិ និងបានក្លាយជារឿងចាប់អារម្មណ៍ធម្មតាទៅហើយ។ ប៉ុន្តែអ្វីដែលមិនធម្មតានោះនិងធ្វើឱ្យមានការចាប់ អារម្មណ៍ខ្លាំងបំផុតពីសំណាក់អ្នកតាមដាន ពិសេសសមត្ថកិច្ចដោយសារតែការប្រើរូបភាពមធ្យោបាយ
ខេត្តកំពង់ធំ ៖ រឿងរត់ពន្ធឈើគ្រញូងដែលមានតម្លៃប្រៀបដូចជាមាសនោះកំពុងបង្កភាពអនាធិបតេយ្យដល់សង្គមជាតិ និងបានក្លាយជារឿងចាប់អារម្មណ៍ធម្មតាទៅហើយ។ ប៉ុន្តែអ្វីដែលមិនធម្មតានោះនិងធ្វើឱ្យមានការចាប់អារម្មណ៍ខ្លាំងបំផុតពីសំណាក់អ្នកតាមដាន ពិសេសសមត្ថកិច្ចដោយសារតែការប្រើរូបភាពមធ្យោបាយប្លែកៗរបស់ពួកជនល្មើសក្នុងការដឹកជញ្ជូនឈើ ។ ជាក់ស្តែងឈើគ្រញូងមូលនិងជ្រុងចំនួន២០ដុំធំៗ ត្រូវឈ្មួញឆ្លៀតឱកាសប្រើប្រាស់មធ្យោបាយដឹកជញ្ជូនតាមរយៈរថយន្តសង្គ្រោះបន្ទាន់ដឹកអ្នកជំងឺតាមផ្លូវជាតិលេខ៦ កាលពីវេលាម៉ោង១១និង១៥នាទីយប់ថ្ងៃទី២៦ សីហា និងត្រូវបានកម្លាំងសមត្ថកិច្ចចម្រុះខេត្តឈរជើងនៅគោលដៅភូមិតាញ៉ោក ស្រុកសន្ទុក ស្ទាក់ចាប់បានប្រគល់ឱ្យមេព្រៃខណៈដែលរថយន្តខាងលើបន្លំដឹកឆ្លងកាត់ទឹកដីខេត្តកំពង់ធំ ។
ពាក់ព័ន្ធការប្រើប្រាស់រថយន្តពេទ្យដឹកគ្រញូងនេះ ព័ត៌មានពីសមត្ថកិច្ចចម្រុះនៅគោលដៅខាងលើបានឱ្យដឹងថា នៅវេលាម៉ោងជិត១២យប់មានរថយន្តសង្គ្រោះមួយគ្រឿង ពាក់ស្លាកលេខភ្នំពេញ 2G-0372 បានធ្វើដំណើរលើផ្លូវជាតិឆ្លងកាត់ទឹកដីខេត្តកំពង់ធំដោយប្រើប្រាស់ភ្លើងវិលសុំផ្លូវ ។ ដោយមានការសង្ស័យ កម្លាំងចម្រុះក៏បានស្នើសុំយោបល់ពីលោកឧត្តមសេនីយ៍ត្រី ផាន់ សុផេង ស្នងការនគរបាល ដើម្បីសហការស្ទាក់ចាប់រថយន្តខាងលើព្រោះថា បើរថយន្តសង្គ្រោះក្នុងខេត្តកំពង់ធំគឺគេមិនប្រើប្រាស់ភ្លើងរបៀបនេះទេ ។ ប៉ុន្តែនៅពេលសមត្ថកិច្ចស្ទាក់ផ្លូវរថយន្តនេះ បែរជាបន្ថែមល្បឿនព្យាយាមបើករត់គេច ភ្លាមនោះសមត្ថកិច្ចចម្រុះធ្វើការឡោមព័ទ្ធឃាត់រថយន្តខាងលើនេះបាននៅចំណុចភូមិព្រៃផ្លូ ឃុំុកំពង់ថ្ម ស្រុកសន្ទុក ចំណែកអ្នកបើកបរនិងអ្នករួមដំណើរក្នុងរថយន្តចំនួន៤នាក់ដែលស្លៀកពាក់ឯកសណ្ឋានគ្រូពេទ្យបានរត់ចោលរថយន្តកាត់វាលស្រែទាំងកណ្តាលយប់បាត់ស្រមោល ។
បន្ទាប់ពីស្ទាក់ចាប់បានរថយន្តពេទ្យនោះហើយ សមត្ថកិច្ចចម្រុះបានរកឃើញឈើគ្រញូងជ្រុង និងមូលចំនួន២០ដុំ ដែលឈើគ្រញូង នីមួយៗមានខ្សែកៅឡាក់ (ខ្សែរ៉ក) ហាក់ដូចជាគ្រញូងត្រូវបានគេទម្លាក់ពីលើភ្នំ ។ ដោយឡែកក្នុងរថយន្តក្រៅពីមានបំពង់អុកស៊ីហ្សែនមួយគេបានរកឃើញស្លាកលេខរថយន្ត២បន្ទះ ភ្នំពេញ 1G-1158 ផងដែរ ។
ជាមួយរថយន្តសង្គ្រោះបង្កប់ឈើគ្រញូងនេះ គេនៅមិនទាន់ដឹងថា ជារថយន្តរបស់មន្ទីរពេទ្យឬគ្លីនិកណានោះទេ ហើយគ្រញូងទាំង២០ដុំមិនទាន់ដឹងថាស្មើប៉ុន្មានម៉ែត្រគូបនៅឡើយដែរ។
សូមបញ្ជាក់ថា ក្នុងខែសីហានេះ សមត្ថកិច្ចខេត្តកំពង់ធំបានធ្វើការស្ទាក់ចាប់រថយន្តដឹកគ្រញូងដែលក្រុមជនល្មើសដឹកឆ្លងកាត់ខេត្តបានចំនួនរាប់សិបគ្រឿង និងគ្រញូងរាប់ពាន់ម៉ែត្រគូប។ នេះជាការប្រើល្បិចថ្មីមួយគួរឱ្យភ្ញាក់ផ្អើលដែលធ្លាក់ក្នុងកណ្តាប់ដៃសមត្ថកិច្ចកន្លងមកនេះ កលល្បិចមានគ្រប់រូបភាពរហូតដល់ជនខ្លះប្រើរថយន្តមានសញ្ញាកាកបាទក្រហមដឹកឈើប្រណីតដែលធ្វើឱ្យប៉ះពាល់ដល់ស្ថាប័នមនុស្សធម៌យ៉ាងធ្ងន់ធ្ងរ ដូចជារថយន្តពេទ្យនេះជាដើម ៕
ចែករំលែកព័តមាននេះ