រាជធានីភ្នំពេញ ៖ ផ្លូវលេខ៣៧១ ឬផ្លូវទំនប់ថ្មីបឹងទំពុនដែលខូចខាតខ្លាំងច្រើនកន្លែងដោយសាររថ យន្តដឹកធ្ងន់ ពេលនេះត្រូវសាលារាជធានីភ្នំពេញចាប់ផ្តើមជួសជុល ហើយសំណូមពរប្រជាពលរដ្ឋយោគយល់ពីបញ្ហាកកស្ទះចរាចរណ៍ ព្រោះផ្លូវតូចចង្អៀត ហើយតម្រូវឱ្យបិទម្តងម្ខាង។
រាជធានីភ្នំពេញ ៖ ផ្លូវលេខ៣៧១ ឬផ្លូវទំនប់ថ្មីបឹងទំពុនដែលខូចខាតខ្លាំងច្រើនកន្លែងដោយសាររថយន្តដឹកធ្ងន់ ពេលនេះត្រូវសាលារាជធានីភ្នំពេញចាប់ផ្តើមជួសជុល ហើយសំណូមពរប្រជាពលរដ្ឋយោគយល់ពីបញ្ហាកកស្ទះចរាចរណ៍ ព្រោះផ្លូវតូចចង្អៀត ហើយតម្រូវឱ្យបិទម្តងម្ខាង។
ដោយមានការអនុញ្ញាតពីសាលារាជធានីភ្នំពេញ មន្ទីរសាធារណការ និងដឹកជញ្ជូនរាជធានីបានដំណើរការជួសជុលផ្លូវនោះចាប់ពីស្ពានដែកភូមិម័លរហូតដល់ផ្លូវ២៧១។ ការងារនេះចាប់អនុវត្តពីថ្ងៃទី២៧ សីហា ២០១១ ទៅ ដោយគ្រោងបញ្ចប់ក្នុងរយៈពេលមួយខែ។ មន្ត្រីជំនាញសាធារណការរាជធានីភ្នំពេញដែលទទួលការងារជួសជុលនេះឱ្យដឹងថា ការងារជួសជុលកំណាត់ផ្លូវនេះមានទំហំ១.៣០០ម៉ែត្រការ៉េដោយជួសជុលដោយកន្លែង។ ការជួសជុលត្រូវកាយផ្លូវចាស់ចេញធ្វើគ្រឹះថ្មី រួចចាក់បេតុងឆ្អឹងដែកទើបជាប់ ព្រោះផ្លូវនេះមានរថយន្តកុងតឺន័រ២៤ម៉ោងលើ២៤ម៉ោង។ ការងារជួសជុលត្រូវប្រើរយៈពេលពី ៣ទៅ៤សប្តាហ៍ទើបចប់ ព្រោះមានការកកស្ទះចរាចរណ៍ខ្លាំងលំបាកក្នុងការជួសជុល។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញឱ្យកោះសន្តិភាពដឹងកាលពីព្រឹកថ្ងៃអាទិត្យទី២៨ សីហា ថា ដោយសារផ្លូវខូចខាតខ្លាំងលំបាកក្នុងការធ្វើដំណើររបស់ប្រជាពលរដ្ឋ លោកកែប ជុតិមា អភិបាលរាជធានីអនុញ្ញាតឱ្យមន្ទីរសាធារណការជួសជុលជាបន្ទាន់ដើម្បីសម្រួលការធ្វើដំណើររបស់ប្រជាពលរដ្ឋ។ ការជួសជុលត្រូវតែចាក់បេតុងទើបអាចទប់ទល់នឹងរថយន្តដឹកធ្ងន់បាន ណាមួយផ្លូវនេះពុំទាន់មានប្រព័ន្ធលូធ្វើឱ្យកន្លែងខ្លះដក់ទឹកទោះជាផ្លូវនៅជាប់បឹងទំពុនក៏ដោយ ព្រោះប្រជាពលរដ្ឋមួយចំនួនសាងសង់ផ្ទះ ឬក៏ចាក់ដីជាប់ផ្លូវតែម្តង។
លោកសាំ ពិសិដ្ឋ សំណូមពរប្រជាពលរដ្ឋយោគយល់ ពេលជួសជុលដែលត្រូវកកស្ទះចរាចរណ៍ ព្រោះផ្លូវតូចចង្អៀតទទឹង៧ម៉ែត្រ ចិញ្ចើម១,៥ម៉ែត្រសងខាង ហើយចរាចរណ៍ច្រើន ម្យ៉ាងពេលជួសជុលត្រូវបិទ មួយចំហៀង។ ប្រសិនបើមិនចាំបាច់សូមប្រជាពលរដ្ឋធ្វើដំណើរវាងដើម្បីសម្រួលដល់ដំណើរការជួសជុលផ្លូវនេះបានលឿន។
ផ្លូវលេខ៣៧១ខូចខាតជាប្រចាំដែលកន្លងមកសាលារាជធានីភ្នំពេញឱ្យក្រុមហ៊ុនឯកជនមួយជួសជុល តែមិនជាប់បានយូរទេ គឺធ្វើខាងមុខខូចខាងក្រោយ ហើយជួសជុលកន្លែងដដែលៗមិនចេះចប់។ សម្រាប់ពេលនេះប្រជាពលរដ្ឋសង្ឃឹមថា មន្ទីរសាធារណការនឹងជួសជុលមានគុណភាពល្អមិនខូចទៅវិញកន្លែងដដែលៗដូចមុនទៀតទេ ៕
ចែករំលែកព័តមាននេះ