ខេត្តកំពត ៖ ទំនប់ស្ទឹងភេ ដែលបានបាក់ធ្លាយទឹកប៉ុន្មានថ្ងៃមកនេះ កំពុងត្រូវបានត្រៀមជួសជុលបិទវាឱ្យបានស្អាតរឹងមាំឡើងវិញ ក្រោមការដឹកនាំរបស់ក្រសួងធនធានទឹក និងឧតុនិយម ដោយមានលោករដ្ឋមន្ត្រីលឹម គានហោ សហការជាមួយអាជ្ញាធរខេត្ត អាជ្ញាធរមូលដ្ឋានដែលបានចុះទៅពិនិត្យស្ថានភាពផ្ទាល់កាលពីថ្ងៃទី
ខេត្តកំពត ៖ ទំនប់ស្ទឹងភេ ដែលបានបាក់ធ្លាយទឹកប៉ុន្មានថ្ងៃមកនេះ កំពុងត្រូវបានត្រៀមជួសជុលបិទវាឱ្យបានស្អាតរឹងមាំឡើងវិញ ក្រោមការដឹកនាំរបស់ក្រសួងធនធានទឹក និងឧតុនិយម ដោយមានលោករដ្ឋមន្ត្រីលឹម គានហោ សហការជាមួយអាជ្ញាធរខេត្ត អាជ្ញាធរមូលដ្ឋានដែលបានចុះទៅពិនិត្យស្ថានភាពផ្ទាល់កាលពីថ្ងៃទី២៧ សីហា ២០១១។
សូមបញ្ជាក់ថា ទំនប់ស្ទឹងភេ ស្ថិតក្នុងភូមិពងទឹក ឃុំស្រែចែង ស្រុកជុំគិរី បានបាក់ធ្លាយទឹកកាលពីព្រលឹមថ្ងៃទី២៧ សីហា ២០១១ បន្ទាប់ពីមានភ្លៀងធ្លាក់យ៉ាងខ្លាំងដូចគេហែកមេឃពេញមួយថ្ងៃទី២៦ សីហា ២០១១ ប៉ុន្តែមិនមែនភ្លៀងមួយមេនោះធ្វើឱ្យទឹកឡើងពេញព្រៀបរួចហើយហៀរបាក់ទំនប់ស្ទឹងភេនោះទេ គឺ៤-៥ថ្ងៃមុននេះ ក៏មានភ្លៀងធ្លាក់ខ្លាំងៗផងដែរ។ ប៉ុន្មានម៉ោងក្រោយបាក់ទំនប់ប៉ុណ្ណោះ លោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម បានដឹកនាំមន្ត្រីជំនាញមួយក្រុមរួមជាមួយលោកខូយ ឃុនហ៊ួរ អភិបាលខេត្តកំពត ព្រមទាំងអ្នកតំណាងរាស្ត្រ និងមន្ត្រីសមត្ថកិច្ចជាច្រើននាក់ចុះទៅពិនិត្យមើលស្ថានភាពទឹកផ្ទាល់ ដើម្បីរិះរកមធ្យោបាយទប់បិទទឹកឡើងវិញ។
ក្រោយពេលទំនប់ស្ទឹងភេបាក់ទឹកស្ទឹងបានបុកទៅវាយប្រហារភូមិឋាន ស្រែ ស្រូវ ប្រជាពលរដ្ឋផងដែរ ប៉ុន្តែមានប្រជាពលរដ្ឋតែប៉ុន្មានផ្ទះប៉ុណ្ណោះដែលទទួលរងការលិចលង់ ហើយត្រូវបានអាជ្ញាធរយកចិត្តទុកដាក់សង្គ្រោះនាំពួកគាត់ទៅកាន់ទីទួលសុវត្ថិភាពមួយរយៈសិន ។ ចំណែកស្រែស្រូវក៏ទទួលរងការលិចលង់ផងដែរ ប៉ុន្តែគេរំពឹងថា វាមិនខូចខាតទេ ព្រោះទឹកជំនន់ស្ទឹងភេ នឹងហូរចាកចេញទៅអស់វិញឆាប់ៗនេះ បន្ទាប់ពីបិទទប់ទំនប់រួចរាល់។ ទោះជាយ៉ាងណា ការបាក់ទំនប់ស្ទឹងភេនេះ មិនបណ្តាលឱ្យអ្នកភូមិណាម្នាក់រងរបួស ឬស្លាប់នោះទេ ដោយគ្រាន់តែជួបការលំបាកខ្លះៗក្នុងការធ្វើបំលាស់ទីប៉ុណ្ណោះ។
លោកចាន់ យុត្ថា នាយកខុទ្ទកាល័យក្រសួងធនធានទឹក និងឧតុនិយម បានឱ្យដឹងថា ទាក់ទិននឹងការជួសជុលទំនប់នេះឡើងវិញ ក្រុមការងារជំនាញរបស់ក្រសួងធនធានទឹកត្រូវបានបញ្ជូនទៅដល់ស្រុកជុំគិរី ហើយ ព្រមជាមួយគ្នានេះដែរ គ្រឿងចក្រធុនធ្ងន់យ៉ាងហោចណាស់៨គ្រឿង ក៏ត្រូវបានបញ្ជូនទៅដល់ទំនប់ស្ទឹងភេរួចរាល់ផងដែរ ដើម្បីរង់ចាំពេលទឹកស្ទឹងស្រកបន្តិចក្រុមការងារនឹងចាប់ផ្តើមជួសជុលបិទទំនប់ភ្លាម។ លោកនាយកខុទ្ទ កាល័យក្រសួងធនធានទឹក និងឧតុនិយម បានមានប្រសាសន៍ថា ដូចអ្វីដែលក្រសួងបានប្រកាសអញ្ចឹងគឺប្រទេសកម្ពុជាទទួលរងប្រព័ន្ធសម្ពាធទាបជាថ្មីទៀតហើយចាប់ផ្តើមពីថ្ងៃទី២៦ សីហា រហូតដល់ថ្ងៃទី៣០ ដំណាច់ខែនេះ ។ ប្រព័ន្ធសម្ពាធទាបចន្លោះមួយសប្តាហ៍នេះបង្កឱ្យបណ្តាខេត្តនានាធ្លាក់ភ្លៀងខ្លាំង ចំណែករាជធានីភ្នំពេញក៏ដូច្នេះដែរ ពោលគឺតំបន់ខ្ពង់រាប និងទំនាបកណ្តាល មេឃភ្លៀងមានទំហំទឹកពី២០ទៅ៣០មីល្លីម៉ែត្រ ប៉ុន្តែតំបន់ជាប់សមុទ្រមានភ្លៀងធ្លាក់គំហុកខ្លាំងជាងនេះ ជាពិសេសតំបន់ជួរភ្នំក្រវាញ ទឹកភ្លៀងមានទំហំលើសពី១០០មីល្លីម៉ែត្រ។
សម្រាប់តំបន់ស្ទឹងភេនេះវិញ ហ៊ុមព័ទ្ធដោយផ្លូវទឹកជ្រោះភ្នំ មេឃចាប់ផ្តើមធ្លាក់ភ្លៀងខ្លាំងមានទំហំរហូតដល់១១៥មីល្លីម៉ែត្រ ចាប់ពី យប់ថ្ងៃទី២៦ ឈានចូលថ្ងៃទី២៧ សីហា ២០១១ ហើយគួបផ្សំជាមួយអាងទឹកនេះ (ទំនប់ស្ទឹងភេ) អាចស្តុកទឹកបានក្នុងទំហំតែ៥,៥លានម៉ែត្រគូបតែប៉ុណ្ណោះ ហើយទំហំទឹកភ្លៀងហូរបុកខ្លាំងមកពីជ្រោះភ្នំ ដែលជាល្បឿនលឿនជាងលំហូរទឹកទន្លេ ស្ទឹង ដូច្នេះហើយទើបធ្វើឱ្យទំនប់ក្នុងស្ទឹងភេទឹកកើនឡើងលឿន ហួសការស្មាន និងហួសទំហំកំណត់ ហើយឈានហៀរបាក់ទំនប់តែម្តង ៕
ចែករំលែកព័តមាននេះ