ខេត្តកំពត ៖ ស្ត្រី៣នាក់បានឈ្លោះប្រកែកគ្នាជាពាក្យសម្តីជុំវិញរឿងភាគី ម្ខាងមានកូនឆ្កែ សុំភាគីម្ខាងដូរកូនមាន់។ ហេតុការណ៍នេះ បានកើតឡើងកាលពីល្ងាចថ្ងៃទី២៥ សីហា នៅភូមិកំពង់សំរោង ឃុំកំពង់សំរោង ស្រុកទឹកឈូ ហើយដោយសារជម្លោះនេះក៏បណ្តាលឱ្យរងរបួសចូលពេទ្យ ទាំងអស់គ្នា។
ខេត្តកំពត ៖ ស្ត្រី៣នាក់បានឈ្លោះប្រកែកគ្នាជាពាក្យសម្តីជុំវិញរឿងភាគីម្ខាងមានកូនឆ្កែ សុំភាគីម្ខាងដូរកូនមាន់។ ហេតុការណ៍នេះ បានកើតឡើងកាលពីល្ងាចថ្ងៃទី២៥ សីហា នៅភូមិកំពង់សំរោង ឃុំកំពង់សំរោង ស្រុកទឹកឈូ ហើយដោយសារជម្លោះនេះក៏បណ្តាលឱ្យរងរបួសចូលពេទ្យទាំងអស់គ្នា។
នៅមុនពេលកើតហេតុ ភាគីខាងម្ចាស់ឆ្កែឈ្មោះចាប ស្រី ភេទស្រី អាយុជាង៤០ឆ្នាំ នៅភូមិកំពង់សំរោង ឃុំកំពង់សំរោង បានប្រើកូនស្រីតូចម្នាក់អាយុប្រហែលជាង១០ឆ្នាំ ឱ្យទៅយកមាន់ដែលខ្លួនបានព្រមព្រៀងដូរនឹងកូនឆ្កែ ជាមួយឈ្មោះម៉ាក ម៉េត ភេទស្រី អាយុ៣១ឆ្នាំ កាលពី៥ខែមុន។ ពេលកូនស្រីនោះមកជួបជាមួយម្ចាស់មាន់ឈ្មោះម៉ាក ម៉េត បានប្រាប់ទៅក្មេងស្រីនោះវិញ ពីរឿងកាត់កងថ្លៃជំពាក់ស្រាចំនួន៥លីត្រ និងថ្លៃសាច់ជ្រូកបីខាំថា រួចរាល់អស់ហើយ តែបើម្តាយនាងមិនព្រមចាំគាត់ចាប់មាន់ឱ្យ។ ពេលនោះក្មេងស្រីក៏ត្រឡប់ទៅប្រាប់ម្តាយវិញ ក្រោយមកម្ចាស់ឆ្កែឈ្មោះចាប ស្រី ជាម្តាយ និងឈ្មោះរ័ត្ន អុីម ជាកូនស្រី អាយុ២៦ឆ្នាំ ទាំង២នាក់ម្តាយនិងកូនបានមកផ្ទះឈ្មោះម៉ាក ម៉េត។
ស្ត្រីឈ្មោះម៉ាក ម៉េត ជាម្ចាស់មាន់បានឱ្យសមត្ថកិច្ចដឹងថា ពេលពីរនាក់ម្តាយ និងកូនចូលដល់ក្នុងរបងផ្ទះគឺនៅវេលាម៉ោង៦និង៣០នាទីល្ងាចថ្ងៃទី២៥ សីហា ដោយស្ត្រីជាម្តាយកាន់ដំបងនៅនឹងដៃ រីឯកូនស្រីដៃទទេ។ ពេលនោះម្តាយដែលកាន់ដំបងនៅដៃបានស្ទុះចូលទៅចាប់មាន់ ប៉ះមាន់ដែលអង្គការទើបនឹងចែកឱ្យចិញ្ចឹមផង គាត់ក៏ស្ទុះទៅដណ្តើមមាន់ពីដៃវិញបម្រុងដូរឱ្យមាន់ផ្សេង ប៉ុន្តែពេលស្ទុះទៅដណ្តើមមាន់វិញនោះ ពុំទាន់បាននិយាយគ្នារឿងដូរទេ ក៏កើតការប្រវាយប្រតប់គ្នា។ ភាគីខាងកូនឆ្កែពីរនាក់ម្តាយនិងកូនបានព្រួតគ្នាវាយរូបគាត់ម្ចាស់មាន់ ដោយម្តាយចាប់ក្របួចសក់គាត់ ឱ្យកូនវាយតែក្រោយមកគាត់រើបម្រះរួច ក៏ទាញបានពូថៅនៅក្បែរនោះកាប់កូនស្រីរបស់ម្ចាស់ឆ្កែមួយពូថៅចំក្បាល។
តាមព័ត៌មានឱ្យដឹងថា ក្នុងជម្លោះនោះត្រូវបានអ្នកភូមិនៅជិតខាងមកជួយឃាត់ រួចនាំភាគីទាំងសងខាងទៅរកពេទ្យរៀងខ្លួន ។ ក្នុងយប់កើតហេតុនោះ ភាគីម្ចាស់មាន់ពុំបានទៅប្តឹងប៉ូលិសប៉ុស្តិ៍ទេ ដោយសារមានរបួស ហើយត្រូវបានក្រុមគ្រួសារដឹកទៅរកពេទ្យអង្គការ រីឯស្ត្រីជាកូនស្រីម្ចាស់ឆ្កែ ដែលត្រូវស្ត្រីម្ចាស់មាន់កាប់ត្រូវចំក្បាលមួយពូថៅនោះ បានមកប្តឹងប៉ុស្តិ៍រដ្ឋបាលឃុំទាំងយប់ រួចមកមន្ទីរពេទ្យបង្អែកឱ្យពេទ្យដេររបួសទាំងយប់ដែរ។
ទាក់ទិននឹងករណីបង្ករបួសស្នាមដែលកើតឡើងពីរឿងដូរកូនឆ្កែជាមួយកូនមាន់នេះត្រូវបានសមត្ថកិច្ចប៉ុស្តិ៍នគរបាលឃុំ និងសមត្ថកិច្ចអធិការដ្ឋានស្រុកដែលចុះធ្វើការស្រាវជ្រាវឃើញថា រឿងនេះភាគីទាំងពីរបានដូរគ្នាតាំងពី៥ខែមុនម៉្លេះ រីឯកូនឆ្កែដែលដូរនឹងមាន់នោះក៏ងាប់បាត់ទៅហើយ ។ រឿងនេះមកពីភាគីខាងកូនឆ្កែឆាប់មានកំហឹងមកលើភាគីខាងស្ត្រីម្ចាស់មាន់ ទើបបណ្តាលឱ្យមានរឿងហេតុរហូតដល់ដេកពេទ្យទាំងសងខាង ៕
ចែករំលែកព័តមាននេះ