ខេត្តព្រះវិហារ ៖ សម្ភារសម្រាប់ប្រើប្រាស់ដំណើរការផលិតគ្រឿងសង្ហារឹមជាច្រើនត្រូវបានរក្សាទុកនៅទីស្នាក់ការបរិស្ថាន (អូរកក់) និងនៅថ្នាលបណ្តុះកូនឈើក្រុងព្រះវិហារ ក្រោយការប្រតិបត្តិការលើទីតាំងសិប្បកម្មកែច្នៃឈើខុសច្បាប់ចំនួន៧កន្លែង ស្ថិតក្នុងភូមិសាស្ត្រខេត្តព្រះវិហា ។ នេះបើតាមការអោយដឹងពីសមត្ថកិច្ច នាព្រឹកថ្ងៃទី១០…
ខេត្តព្រះវិហារ ៖ សម្ភារសម្រាប់ប្រើប្រាស់ដំណើរការផលិតគ្រឿងសង្ហារឹមជាច្រើនត្រូវបានរក្សាទុកនៅទីស្នាក់ការបរិស្ថាន (អូរកក់) និងនៅថ្នាលបណ្តុះកូនឈើក្រុងព្រះវិហារ ក្រោយការប្រតិបត្តិការលើទីតាំងសិប្បកម្មកែច្នៃឈើខុសច្បាប់ចំនួន៧កន្លែង ស្ថិតក្នុងភូមិសាស្ត្រខេត្តព្រះវិហា ។ នេះបើតាមការអោយដឹងពីសមត្ថកិច្ច នាព្រឹកថ្ងៃទី១០ កក្កដា២០២៥ ។
ប្រភពពីសមត្ថកិច្ចឲ្យដឹងថា ក្នុងប្រតិបត្តិការចុះបង្ក្រាបទីតាំងសិប្បកម្មកែច្នៃឈើខុសច្បាប់ខាងលើ មានការចូលរួមពីកម្លាំងនៃមន្ទីរបរិស្ថានខេត្ត កម្លាំងដែនជម្រកសត្វព្រៃឆែប-ព្រះរការ កម្លាំងដែនជម្រកសត្វព្រៃគូលែនព្រំទេព កម្លាំងកងរាជអាវុធហត្ថខេត្ត និងកម្លាំងកងរាជអាវុធហត្ថស្រុកត្បែងមានជ័យ មន្ត្រីសហគមន៍ រួមទាំងអាជ្ញាធរមូលដ្ឋាន ក្រោមការដឹកនាំចុះបង្ក្រាបដោយព្រះរាជអាជ្ញារងនៃអយ្យការអមសាលាដំបូងខេត្តព្រះវិហារ លោក ស្រេង វុទ្ធា ចាប់ពីថ្ងៃទី៨ ខែកក្កដា ឆ្នាំ២០២៥ ស្ថិតក្នុងភូមិពោធិ៍ ឃុំពោធិ៍ និងភូមិបុស្សធំ ឃុំប្រមេរុ ស្រុកត្បែងមានជ័យ ខេត្តព្រះវិហារ ។
យោងតាមរបាយការណ៍របស់មន្ទីរបរិស្ថានខេត្តព្រះវិហារបានបង្ហាញឱ្យដឹងថា នៅក្នុងប្រតិបត្តិការចុះបង្ក្រាបបទល្មើសធនធានធម្មជាតិដែលបានបង្កើតសិប្បកម្មកែច្នៃឈើ ដោយគ្មានលិខិតអនុញ្ញាត (ល្មើសច្បាប់) នោះ កម្លាំងសមត្ថកិច្ចចម្រុះ និងអាជ្ញាធរមូលដ្ឋាន បានសហការរួមគ្នារឹបអូសបានវត្ថុតាងបទល្មើសជាច្រើនប្រភេទ រួមទាំងឈើល្មើសច្បាប់ រួមមាន៖ ម៉ាស៊ីនជ្រៀក៤គ្រឿង ម៉ាស៊ីនភ្លើង១៥សេស ១គ្រឿង ម៉ាស៊ីនខ្យល់សម្រាប់បាញ់ថ្នាំ ១គ្រឿង ម៉ូទ័រកាត់៥គ្រឿងម៉ូទ័រសម្លៀង១គ្រឿង ម៉ូទ័រឈួស ២គ្រឿង .ម៉ូទ័រខាត់ ៥គ្រឿង .ម៉ូទ័រស្វាន ៤គ្រឿង.ម៉ូទ័របុក ១គ្រឿង.តាបឈួសឈើ១គ្រឿង .ឈើអារជ្រៀកចម្រុះ៣២ដុំ និងក្តា១០សន្លឹកប្រវែង២ម៉ែត្រ ។
រីឯវត្ថុតាងមួយចំនួនទៀត ត្រូវបានជនប្រព្រឹត្តបទល្មើស ដោះយកទៅលាក់ទុកដោយសុវត្ថិភាព ដែលមន្ត្រីបរិស្ថានមិនអាចរុករកឃើញ ។ ចំពោះវត្ថុតាងបទល្មើសដែលរឹបអូសបានទាំងអស់នាពេលនោះ ត្រូវបានដឹកជញ្ជូនយកមករក្សាទុកនៅទីស្នាក់ការបរិស្ថាន (អូរកក់) និងនៅថ្នាលបណ្តុះកូនឈើក្រុងព្រះវិហារ។
ពាក់ព័ន្ធករណីចុះបង្ក្រាបទីតាំងសិប្បកម្មខាងលើ ម្ចាស់សិប្បកម្ម៤ទីតាំង បានធ្វើកិច្ចសហការជាមួយសមត្ថកិច្ចបានល្អ និងចំនួន២ទីតាំងទៀត មិនបានសហការជាមួយសមត្ថកិច្ចនោះទេ ដោយដោះម៉ាស៊ីន និងវត្ថុតាងប្រព្រឹត្តបទល្មើសយកទៅលាក់ទុក និងជម្លៀសចេញពីទីតាំងប្រព្រឹត្តដោយសុវត្ថភាព និងទីតាំងសិប្បកម្ម ១កន្លែងទៀត ដែលស្ថិតក្នុងភូមិអភិវឌ្ឍន៍ សង្កាត់ប៉ាលហាល ក្រុងព្រះវិហារ ម្ចាស់សិប្បកម្មឈ្មោះទៀក តែម មិនព្រមសហការជាមួយសមត្ថកិច្ចនោះទេ ថែមទាំងបានធ្វើការរារាំងមិនឲ្យសមត្ថកិច្ចដកហូតវត្ថុតាងល្មើសច្បាប់ទាំងនោះបានឡើយ ។
តែបើទោះជាមិនសហការក្តី ក៏កម្លាំងសមត្ថកិច្ចចម្រុះ នៅតែបន្តអនុវត្តច្បាប់ដកហូតយកវត្ថុតាងទាំងអស់ និងបាននាំយកមករក្សាទុកបណ្តោះអាសន្ន នៅស្នាក់ការបរិស្ថានក្រុងព្រះវិហារ (ថ្នាលបណ្តុះកូនឈើ)។
ចំពោះជនប្រព្រឹត្តបទល្មើសរូបនោះ កម្លាំងសមត្ថកិច្ចមិនបានចាប់ឃាត់ខ្លួននោះទេ ដោយបានព្យាយាមពន្យល់ពីការទទួលខុសត្រូវតាមផ្លូវច្បាប់ និងមានទោសទណ្ឌថែមទៀតខណៈនោះម្ចាស់សិប្បកម្ម ក៏បានសម្រួលឥរិយាបថ យល់ព្រមឲ្យសមត្ថកិច្ច ដកហូតយកវត្ថុតាងតាមសម្រួល ។ តែជនល្មើសមិនព្រមផ្តិតមេដៃក្នុងកំណត់ហេតុនោះទេ គ្រាន់តែបានទទួលស្គាល់ថា គាត់ពុំបានសុំច្បាប់អនុញ្ញាតពីស្ថាប័នមានសមត្ថកិច្ចណាទេ។
ក្រោយការបង្ក្រាបទីតាំងបើកសិប្បកម្មកែច្នៃឈើល្មើសច្បាប់ទាំង៧កន្លែងនោះរួចមក មន្ត្រីសមត្ថកិច្ចជំនាញបរិស្ថានខេត្តព្រះវិហារ ក៏បានបន្តបើកការស៊ើអង្កេតលើទីតាំងផ្សេងៗទៀត នៅក្នុងភូមិសាស្ត្រស្រុកត្បែងមានជ័យ ដើម្បីបន្តចំណាត់ការបង្ក្រាបបទល្មើសធនធានធម្មជាតិ និងរក្សាធនធានព្រៃឈើដែលនៅសេសសល់ចុងក្រោយឱ្យនៅគង់វង្ស៕
ចែករំលែកព័តមាននេះ