ខេត្តកំពង់ចាម ៖ អភិបាលខេត្តកំពង់ចាម អញ្ជើញដឹកនាំកិច្ចប្រជុំ ដើម្បីពិនិត្យលទ្ធភាពស្តារឡើងវិញ អំពីផលប៉ះពាល់នៃគ្រោះទឹកជំនន់ ។ នេះបើយោងតាមផេកក្រសួងមហាផ្ទៃបានប្រកាសនាថ្ងៃទី០៨ ខែតុលា ឆ្នាំ២០២៥…
ខេត្តកំពង់ចាម ៖ អភិបាលខេត្តកំពង់ចាម អញ្ជើញដឹកនាំកិច្ចប្រជុំ ដើម្បីពិនិត្យលទ្ធភាពស្តារឡើងវិញ អំពីផលប៉ះពាល់នៃគ្រោះទឹកជំនន់ ។ នេះបើយោងតាមផេកក្រសួងមហាផ្ទៃបានប្រកាសនាថ្ងៃទី០៨ ខែតុលា ឆ្នាំ២០២៥ ។
លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម នៅព្រឹកថ្ងៃទី៨ ខែតុលា ឆ្នាំ២០២៥ បានអញ្ជើញដឹកនាំកិច្ចប្រជុំ ដើម្បីត្រួតពិនិត្យស្ថានភាពផលប៉ះពាល់ទឹកជំនន់ទន្លេមេគង្គ នៅសាលប្រជុំធំសាលាខេត្តកំពង់ចាម ដោយមានការចូលរួមពីអភិបាលរងខេត្ត នាយក នាយករងរដ្ឋបាលសាលាខេត្ត កងកម្លាំងទាំងបី មន្ទីរអង្គភាពជំនាញ និងមន្ត្រីពាក់ព័ន្ធជាច្រើនរូប ។
លោក គុន សុភា អភិបាលរងខេត្តកំពង់ចាមបានឡើងរាយការណ៍ផលប៉ះពាល់នៃគ្រោះទឹកជំនន់ទន្លេមេគង្គ និងទឹកភ្លៀងនៅក្នុងភូមិសាស្ត្រខេត្តកំពង់ចាម ដោយគិតចាប់ពីថ្ងៃទី១ រហូតដល់ថ្ងៃទី៧ ខែតុលា ឆ្នាំ២០២៥ មានចំនួន៨ស្រុក ក្នុងនោះមាន ស្រុកកំពង់សៀម ស្រុកស្ទឹងត្រង់ ស្រុកកោះសូទិន ស្រុកកងមាស ស្រុកស្រីសន្ធរ ស្រុកបាធាយ ស្រុកជើងព្រៃ និងស្រុកព្រៃឈរ ស្មើហ្នឹង៤៧ឃុំ និង១៤១ភូមិ ។
លោកបានបន្តថា ករណីទឹកជំនន់នោះបានបណ្ដាលឱ្យរងផលប៉ះពាល់ដល់ប្រជាពលរដ្ឋជាង៤០០០គ្រួសារ នៅផ្ទះជាង៣០០០ខ្នង ក្នុងនោះប្រជាពលរដ្ឋដែលបានជម្លៀសមកទីទួលសុវត្ថិភាពចំនួន៦២គ្រួសារ ។
ជាមួយគ្នានោះ ចំពោះដំណាំស្រូវ រងផលប៉ះពាល់ជាង៥ ០០០ហិកតា ក្នុងនោះមានភាពប្រសើរឡើងវិញជាង២០០ ហិកតា រីឯដំណាំរួមផ្សំ បានរងផលប៉ះពាល់ជាង៦០០ ហិកតា ។
ជាមួយគ្នានោះដែរបានធ្វើឱ្យបាក់ច្រាំងទន្លេ១៧លើក មានប្រវែងជាង៥ ០០០ ម៉ែត្រ និងប៉ះពាល់ដល់ហេដ្ឋារចនាសម្ព័ន្ធ ផ្លូវថ្នល់កៅស៊ូ ផ្លូវបេតុង និងផ្លូវដី សរុបប្រវែង១៣០ ៩៩០ ម៉ែត្រផងដែរ ។
នាឱកាសនោះដែរ ឯកឧត្តម អ៊ុន ចាន់ដា អភិបាលខេត្តកំពង់ចាម បានមានប្រសាសន៍ណែនាំ និងជំរុញដល់មន្ត្រីជំនាញ នៃមន្ទីរអង្គភាពពាក់ព័ន្ធ ក៏ដូចជា អភិបាលស្រុក ដែលរងផលប៉ះពាល់នៃទឹកជំនន់នោះត្រូវរៀបចំឯកសារឱ្យបានច្បាស់លាស់ ត្រឹមត្រូវ និងឆាប់រហ័ស ដើម្បីធ្វើយ៉ាងណា ស្នើសុំទៅគណៈកម្មការគ្រប់គ្រងគ្រោះមហន្តរាយ ដើម្បីធ្វើការស្ដារឡើងវិញអោយបានទាន់ពេលវេលា ៕
ចែករំលែកព័តមាននេះ