រាជធានីភ្នំពេញ ៖ ក្នុងកិច្ចប្រជុំពេញអង្គគណៈរដ្ឋមន្ត្រីកាលពីព្រឹកថ្ងៃទី២៦ សីហា នៅវិមានសន្និភាពក្រោមអធិបតីភាពដ៏ខ្ពង់ខ្ពស់សម្តេចអគ្គមហា សេនាបតីតេជោ ហ៊ុន សែន បានសម្តេចអនុម័ត សេចក្តីព្រានច្បាប់ ស្តីពីការគ្រប់គ្រងអាស៊ីដខ្លាំងដែលជារបៀបវារៈទី១ ក្នុងកិច្ចប្រជុំ ។
រាជធានីភ្នំពេញ ៖ ក្នុងកិច្ចប្រជុំពេញអង្គគណៈរដ្ឋមន្ត្រីកាលពីព្រឹកថ្ងៃទី២៦ សីហា នៅវិមានសន្និភាពក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន បានសម្តេចអនុម័ត សេចក្តីព្រានច្បាប់ ស្តីពីការគ្រប់គ្រងអាស៊ីដខ្លាំងដែលជារបៀបវារៈទី១ ក្នុងកិច្ចប្រជុំ ។
យោងតាមសេចក្តីប្រកាសព័ត៌មានបានថ្លែងថា កន្លងមកការប្រើអាស៊ីដខ្លាំងដើម្បីជះ ឬស្រោចទៅលើមនុស្សបានកើតមានឡើងជាបន្តបន្ទាប់ ហើយដែលបទល្មើសនេះអាចចាត់ទុកថា ជាបទល្មើសមួយក្នុងចំណោមបទល្មើសផ្សេងទៀត ដែលមានចរិតសាហាវ ឃោរឃៅ យង់ឃ្នង អមនុស្សធម៌ ហើយបន្សល់ទុកនូវសោកនាដកម្ម ដោយសារធ្វើឱ្យជនរងគ្រោះមានរបួសស្នាម ខូចសម្ផស្សពីធម្មជាតិ ពិការទាំងផ្លូវកាយ និងផ្លូវចិត្តយ៉ាងធ្ងន់ធ្ងរក្លាយទៅជាជនពិការមួយរយៈ ឬពិការអស់មួយជីវិត ហើយមានករណីខ្លះទៀតបានបណ្តាលឱ្យជនរងគ្រោះបាត់បង់ជីវិតក៏មាន ។
ផលវិបាកនានា ដែលកើតឡើងចំពោះជនរងគ្រោះ ដោយបទល្មើសអាស៊ីដខ្លាំងកន្លងមក បានបង្កឱ្យមានការព្រួយបារម្ភ និងជាក្តីកង្វល់សម្រាប់សង្គមជាតិ ក៏ដូចជារាជរដ្ឋាភិបាល ។
ដោយមានកិច្ចសហការពីក្រសួងឧស្សាហកម្ម រ៉ែ និងថាមពល ក្រសួងយុត្តិធម៌ ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា គណៈមេធាវីនៃព្រះរាជាណាចក្រកម្ពុជា និងមានការផ្តល់យោបល់ពីអង្គការលើកាដូ និងអង្គការជួយជនរងគ្រោះដោយអាស៊ីដខ្លាំងផងដែរ ក្រសួងមហាផ្ទៃបានរៀបចំសេចក្តីព្រាងច្បាប់ស្តីពីការគ្រប់គ្រងអាសីុដខ្លាំង ដែលជាច្បាប់ពិសេសដោយឡែកបន្ថែមពីលើក្រមព្រហ្មទណ្ឌដែលមានជាធរមានស្រាប់ក្នុងគោលដៅ ទប់ស្កាត់បទល្មើសអាស៊ីដខ្លាំងឱ្យមានប្រសិទ្ធភាពខ្ពស់ និងដើម្បីចូលរួមចំណែកការពារសណ្តាប់ធ្នាប់សាធារណៈសន្តិសុខ និងសុវត្ថិភាពសង្គម ក៏ដូចជាលើកកម្ពស់សុខុមាលភាពជូនប្រជាពលរដ្ឋ ។
សេចក្តីព្រាងច្បាប់ស្តីពីការគ្រប់គ្រងអាសីុដខ្លាំងរួមមាន៦ជំពូក ចែកចេញជា២៧មាត្រា មានវិសាលភាពគ្របដណ្តប់លើការផលិត ការកែច្នៃ ការនាំចូល ការនាំចេញ ការវេចខ្ចប់ ការដឹកជញ្ជូន ការយកតាមខ្លួន ការចែកចាយ ការលក់ ការទិញ ការរក្សាទុក និងការប្រើប្រាស់អាស៊ីដខ្លាំងគ្រប់ប្រភេទដែលបណ្តាលឱ្យមានគ្រោះថ្នាក់ដល់សុខភាព និងអាយុជីវិតមនុស្ស នៅក្នុងព្រះរាជាណាចក្រកម្ពុជា ។
សម្រាប់របៀបវារៈទី២ ទាក់ទងទៅនឹងសេចក្តីព្រាងអនុក្រឹត្យស្តីពីការប្រែក្លាយមជ្ឈមណ្ឌលបណ្តុះបណ្តាលវិជ្ជាជីវៈអគ្គិសនីកម្ពុជា ទៅជាវិទ្យាស្ថានវិទ្យាសាស្ត្រអគ្គិសនី ត្រូវបានប្រកាសថា សេចក្តីព្រាងអនុក្រឹត្យស្តីពីការប្រែក្លាយមជ្ឈមណ្ឌលបណ្តុះបណ្តាលវិជ្ជាជីវៈអគ្គិសនីកម្ពុជាទៅជាវិទ្យាស្ថានវិទ្យាសាស្ត្រអគ្គិសនី ដើម្បីបង្កើនលទ្ធភាពនៃការបណ្តុះបណ្តាលធនធានមនុស្សឱ្យមានគុណភាពកម្រិតឧត្តមសិក្សាលើជំនាញបច្ចេកទេសអគ្គិសនី បំពេញឱ្យតម្រូវការពលកម្ម ស្របតាមការរីកចម្រើនលើវិស័យអគ្គិសនី និងដើម្បីបំពេញឱ្យទីផ្សារការងារនៃព្រះរាជាណាចក្រកម្ពុជា ត្រូវបានលើកយកទៅកែ សម្រួលឱ្យកាន់តែមានសុក្រឹតភាពថែមទៀត ដើម្បីប្រកាសដាក់ឱ្យអនុវត្តនាពេលខាងមុខ ។
ជាអធិបតីនៃកិច្ចប្រជុំចំពោះបញ្ហាផ្សេងៗសម្តេចអគ្គមហាសេនាបតីតេជោ ហ៊ុន សែន បានស្វាគមន៍ និងកោតសរសើរចំពោះលទ្ធផលនៃកិច្ចប្រជុំគណៈកម្មការកិច្ចការព្រំដែនទូទៅ ប្រចាំភូមិភាគកម្ពុជា-ថៃដែលបានប្រព្រឹត្តទៅកាលពីថ្ងៃទី២៣ ដល់ថ្ងៃទី២៥ សីហា ឆ្នាំ២០១១ ។ ទន្ទឹមគ្នានោះដែរ សម្តេចតេជោក៏បានក្រើនរំលឹកដល់កងយោធពលខេមរភូមិន្ទឱ្យបន្តពង្រឹងថែមទៀត នូវការបង្កើតបរិយាកាសនៃការជឿទុកចិត្តគ្នាជាមួយភាគីយោធាថៃ ដើម្បីធ្វើឱ្យកាន់តែប្រសើរ និងមានប្រសិទ្ធភាពក្នុងការអនុវត្តកិច្ចសហប្រតិបត្តិការជាមួយគ្នា ។
សម្តេចតេជោនាយករដ្ឋមន្ត្រី បានណែនាំឱ្យក្រសួងកសិកម្ម រុក្ខាប្រមាញ់ និងនេសាទរដ្ឋបាលជលផលអាជ្ញាធរដែនដី សហការរៀបចំបង្កើតច្រកចេញចូលតែមួយ ដើម្បីសម្រួលបែបបទ លិខិតបទដ្ឋាននានា និងស្វែងរកទីផ្សារជូនប្រជាពលរដ្ឋដែលជាអាជីវករចិញ្ចឹមសត្វក្រពើ ដើម្បីធ្វើយ៉ាងណាអាចឱ្យកម្ពុជាក្លាយទៅជាប្រទេសដែលនាំក្រពើចិញ្ចឹមចេញដ៏ល្បីមួយ ។
ដោយបានរំលឹកឡើងអំពីអនុសាសន៍ដែលបានដាក់ចេញនាពេលកន្លងមកនៅទីស្តីការគណៈរដ្ឋមន្ត្រី និងពេលសម្ពោធចម្ការកៅស៊ូទំរីងក្នុងខេត្តកំពង់ធំ ស្តីពីការអនុវត្តយុទ្ធសាស្ត្រស្បែកខ្លាក្នុងការផ្តល់ដីសម្បទានសេដ្ឋកិច្ចសម្តេចអគ្គមហាសេនាបតីតេជោ ហ៊ុន សែន បានណែនាំឱ្យក្រសួងកសិកម្ម រុក្ខាប្រមាញ់ និងនេសាទក្រសួងបរិស្ថាន ក្រសួងរៀបចំដែនដីនគរូបនីយកម្ម និងសំណង់ចុះពិនិត្យ និងដោះស្រាយនៅតាមទីតាំងដីសម្បទានសេដ្ឋកិច្ចនានា ដែលមានទំនាស់ ដើម្បីធ្វើឱ្យមានសុខដុមនីយកម្មរវាងប្រជាពលរដ្ឋ និងវិនិយោគិនលើវិស័យកសិកម្ម ។ សម្តេចតេជោ ក៏បានព្រមានដកហូតដីសម្បទានសេដ្ឋកិច្ចពីវិនិយោគិនណា ដែលមិនអនុវត្តតាមការដោះស្រាយជូនប្រជាពលរដ្ឋដែលមានភូមិដ្ឋានយូរអង្វែងក្នុងទីតាំងរបស់ខ្លួនផងដែរ ។
សម្តេចតេជោនាយករដ្ឋមន្ត្រី បានក្រើនរំលឹកឱ្យក្រសួងការងារ និងបណ្តុះបណ្តាលវិជ្ជាជីវៈ និងស្ថាប័នពាក់ព័ន្ធត្រូវមានស្មារតីភ្ញាក់រលឹកចុះពិនិត្យ និងដោះស្រាយជាបន្ទាន់ ចំពោះរោងចក្រសហគ្រាសណាដែលមានបុគ្គលិកកម្មករជួបឧប្បត្តិហេតុដូចជាករណីរោងចក្រ M&V នៅក្នុងខេត្តកំពង់ឆ្នាំងជាដើម ៕
ចែករំលែកព័តមាននេះ