ខេត្តព្រះសីហនុ ៖ កាលពីថ្ងៃទី២៥ សីហា ២០១១ លោកប្រាក់ ស៊ីហារ៉ា អភិបាលរងខេត្ត និងជាសមាជិកក្រុមប្រឹក្សាខេត្តព្រះសីហនុ បានដឹកនាំមន្ត្រីរាជការក្រោមឱវាទ មានក្រុមប្រឹក្សាស្រុក អភិបាលរងស្រុក លោកមេឃុំការិយាល័យអង្គភាពជុំវិញសាលាស្រុកព្រៃនប់ ចុះសំណេះសំណាលសួរសុខទុក្ខពលទាហានស្ម័គ្រចិត្ត
ខេត្តព្រះសីហនុ ៖ កាលពីថ្ងៃទី២៥ សីហា ២០១១ លោកប្រាក់ ស៊ីហារ៉ា អភិបាលរងខេត្ត និងជាសមាជិកក្រុមប្រឹក្សាខេត្តព្រះសីហនុ បានដឹកនាំមន្ត្រីរាជការក្រោមឱវាទ មានក្រុមប្រឹក្សាស្រុក អភិបាលរងស្រុក លោកមេឃុំការិយាល័យអង្គភាពជុំវិញសាលាស្រុកព្រៃនប់ ចុះសំណេះសំណាលសួរសុខទុក្ខពលទាហានស្ម័គ្រចិត្ត ដែលជាសិក្ខាកាមកំពុងហ្វឹកហ្វឺននៅមណ្ឌលហ្វឹកហ្វឺនទី៣ ខេត្តព្រះសីហនុ ដែលមានទីតាំងក្នុងភូមិតាន័យ ឃុំជើងគោ ស្រុកព្រៃនប់ ។
ជាកិច្ចចាប់ផ្តើមលោកវរសេនីយ៍ឯក សុកសាកល មេបញ្ជាការរងតំបន់ប្រតិបត្តិការសឹករងខេត្ត និងជាប្រធានវគ្គហ្វឹកហ្វឺន បានឡើងអានរបាយការណ៍ស្វាគមន៍ និងថ្លែងអំណរគុណយ៉ាងជ្រាលជ្រៅដល់លោកអភិបាល អភិបាលរងខេត្ត អភិបាល អភិបាលរងស្រុក និងមន្ត្រីរាជការជុំវិញសាលាស្រុក ទាំងអស់ដែលបានចំណាយទាំងពេលវេលា និងថវិកាជួយឧបត្ថម្ភគាំទ្រ ចាប់តាំងពីដើមរហូតមកដល់ពេលនេះ ដែលធ្វើឱ្យអង្គភាពមណ្ឌលទី៣ ជាពិសេសពលទាហានស្ម័គ្រចិត្តទាំងអស់ដែលកំពុងហ្វឹកហ្វឺនមានកម្លាំងចិត្តក្នុងការហ្វឹកហាត់។
លោកស្រីយ៉ឹង សុឃឿន អភិបាលរងស្រុកឱ្យដឹងផងដែរថា ក្រុមការងារមន្ត្រីរាជការជុំវិញសាលាស្រុក ក្នុងនោះមានលោកមេឃុំគ្រប់ឃុំការិយាល័យអង្គភាពទាំងអស់ រួមសហការគ្នាបានជាអំណោយ មានសាច់គោចំនួន១៨គីឡូក្រាម គ្រែងឈាម បន្លែបង្កា ទឹកត្រី ទឹកស៊ីអ៊ីវ មី តែ ថវិកាជូនពលទាហានស្ម័គ្រចិត្តទាំងអស់ក្នុងម្នាក់ទទួលបាន១ម៉ឺនរៀល ហើយបន្ថែមពីលើនេះទៀត លោកប្រាក់ ស៊ីហារ៉ា អភិបាលរងខេត្ត ក៏បាននាំមកជូននូវមី២កេសធំ ស្រាបៀរចំនួន១០កេស និងប្រាក់មួយចំនួនធំ បន្ថែមពីលើទៀត។
លោកប្រាក់ ស៊ីហារ៉ា ក៏បានឡើងមានមតិសំណេះសំណាលសួរសុខទុក្ខដល់ពលទាហានស្ម័គ្រចិត្តទាំងអស់ ដែលបានលះបង់កម្លាំងកាយចិត្ត ចូលបម្រើក្នុងជួរកងទ័ពក្លាយខ្លួនជាកងយោធពលខេមរភូមិន្ទដ៏អង់អាចក្លាហាន ដើម្បីការពារជាតិ បូរណភាពទឹកដីជូនប្រទេសជាតិ និងប្រជាជន៕
ចែករំលែកព័តមាននេះ