ខេត្តកណ្តាល ៖ រថយន្តម៉ាកឡិចស៊ីស RX 300 មួយគ្រឿង ដឹកឈើគ្រញូងពេញ ដែលបើកបរតាមផ្លូវជាតិលេខ៥ សំដៅចូលរាជធានីភ្នំពេញ ខណៈមកដល់ស្ពានព្រែកក្តាម ភូមិងោក ឃុំពញាឮ ស្រុកពញាឮ បានត្រូវកម្លាំងអធិការដ្ឋានរដ្ឋបាលព្រៃឈើខាងត្បូងបឹងទន្លេ សាប សហការជាមួយសង្កាត់រដ្ឋបាលព្រៃឈើស្រុកអង្គ
ខេត្តកណ្តាល ៖ រថយន្តម៉ាកឡិចស៊ីស RX 300 មួយគ្រឿង ដឹកឈើគ្រញូងពេញ ដែលបើកបរតាមផ្លូវជាតិលេខ៥ សំដៅចូលរាជធានីភ្នំពេញ ខណៈមកដល់ស្ពានព្រែកក្តាម ភូមិងោក ឃុំពញាឮ ស្រុកពញាឮ បានត្រូវកម្លាំងអធិការដ្ឋានរដ្ឋបាលព្រៃឈើខាងត្បូងបឹងទន្លេសាប សហការជាមួយសង្កាត់រដ្ឋបាលព្រៃឈើស្រុកអង្គស្នួល និងកម្លាំងកងរាជអាវុធហត្ថលើផ្ទៃប្រទេស ស្ទាក់ចាប់បានកាលពីវេលាម៉ោង៨និង៤៥នាទីព្រឹកថ្ងៃទី២៤ សីហា ។
នៅក្នុងការបង្ក្រាបរថយន្តដឹកឈើគ្រញូងនេះ សមត្ថកិច្ចបានយករថយន្តបាំងផ្លូវ តែរថយន្តដឹកឈើគ្រញូងមិនព្រមឈប់ ដោយព្យាយាមបើករត់ និងបុករថយន្តរបស់សមត្ថកិច្ច ទៀត ទើបសមត្ថកិច្ចសម្រេចប្រើអាវុធបាញ់ឡើងលើ និងបាញ់បំបែកកង់រថយន្តដឹកឈើគ្រញូងទើបចាប់បាន។ លោកម៉ិញ ចាន់ណា នាយសង្កាត់រដ្ឋបាលព្រៃឈើ ស្រុកអង្គស្នួលបានឱ្យដឹងថា នៅព្រឹកថ្ងៃទី២៤ សីហា សមត្ថកិច្ចជំនាញបានទទួលព័ត៌មានថា មានរថយន្តម៉ាកឡិចស៊ីសមួយគ្រឿងដឹកឈើគ្រញូងពេញ បើកតាមផ្លូវជាតិលេខ៥ សំដៅចូលមករាជធានីភ្នំពេញ ទើបកម្លាំងសង្កាត់រដ្ឋបាលព្រៃឈើស្រុកអង្គស្នួលសហការជាមួយកម្លាំងអធិការដ្ឋានរដ្ឋបាលព្រៃឈើខាងត្បូងបឹងទន្លេសាប និងកម្លាំងកងរាជអាវុធហត្ថលើផ្ទៃប្រទេសធ្វើការតាមដានឃ្លាំមើលរថយន្តតាមភិនភាគដែលរាយការណ៍។
លោកម៉ិញ ចាន់ណា បន្តថា លុះមកដល់ម៉ោងជាង៨ព្រឹកប្រទះឃើញរថយន្តឡិចស៊ីសមានភិនភាគដូចខាងលើ បើកតាមផ្លូវជាតិលេខ៥មកដល់ភូមិងោក ក្នុងឃុំពញាឮ កម្លាំងជំនាញក៏បានស្ទាក់ចាប់ ប៉ុន្តែរថយន្តនោះមិនព្រមឈប់ទេ និងបានបោះពួយបន្ថែមល្បឿនរឹតតែលឿនទៀត។ ពេលនោះសមត្ថកិច្ចបានបើករថយន្តដេញតាមនិងបើកបាំងពីមុខ ហើយរថយន្តឡិចស៊ីសដឹកឈើនេះបានបើកបុករថយន្តរបស់សមត្ថកិច្ចទៀតបណ្តាលឱ្យក្រពឹតហើយព្យាយាមបើករត់បន្តរហូតដល់គល់ស្ពានព្រែកក្តាមក៏បោះពួយបម្រុងឆ្លងស្ពានទៅត្រើយខាងកើត។ ដោយសមត្ថកិច្ចអស់ជម្រើសក្នុងការស្ទាក់ចាប់ ក៏សម្រេចបាញ់កាំភ្លើងឡើងលើតែរថយន្តនោះនៅតែមិនព្រមឈប់ទៀតក៏បាញ់បំបែកកង់ក្រោយត្រូវចំមួយគ្រាប់ ទើបបែកកង់ទៅមុខលែងរួច។ ពេលនោះអ្នកបើកបររថយន្តឡិចស៊ីសដឹកឈើបានរត់គេចខ្លួនបាត់ បន្សល់ទុកបុរសម្នាក់ និងរថយន្ត ហើយកម្លាំងសមត្ថកិច្ចបាននាំមកកាន់ស្នាក់ការរបស់ខ្លួន ដើម្បីធ្វើការសាកសួរ។
លោកនាយសង្កាត់បានឱ្យដឹងទៀតថា រថយន្តឡិចស៊ីស RX 300 ដឹកឈើដែលស្ទាក់ចាប់បាននេះ ពណ៌ខ្មៅ ពាក់ស្លាកលេខ ភ្នំពេញ 2P-8812 ។ នៅក្នុងរថយន្តសមត្ថកិច្ចរឹបអូសបានឈើគ្រញូងចំនួន៨០កំណាត់ ស្មើនឹង៨៥៥គីឡូក្រាម និងឃាត់ខ្លួនបុរសម្នាក់ឈ្មោះកែវ សារិទ្ធ អាយុ៤៤ឆ្នាំ មានទីលំនៅភូមិវត្ត ឃុំស្រែណូយ ស្រុកវ៉ារិន ខេត្តសៀមរាប ។ ក្រោយពីត្រូវឃាត់ចាប់បាន បុរសឈ្មោះកែវ សារិទ្ធ បានឆ្លើយថា ឈើ និងរថយន្តមិនមែនជារបស់ខ្លួនទេ គឺជារបស់ឈ្មោះវ៉េង នៅឃុំស្រែណូយជាមួយគ្នា និងជាមិត្តភក្តិទើបស្គាល់គ្នាពេលថ្មីៗនេះ។ បុរសឈ្មោះកែវ សារិទ្ធ បានឆ្លើយទៀតថា កាលពីយប់ថ្ងៃទី២៣ សីហា ឈ្មោះវ៉េង បានបើករថយន្តឡិចស៊ីសមកបបួលខ្លួនថា ទៅលេងនៅភ្នំេពញ ពេលនោះខ្លួនក៏ឡើងជិះមកជាមួយគ្នា លុះមកដល់ស្រុកពញាឮ ក៏ត្រូវសមត្ថកិច្ចស្ទាក់ចាប់រថយន្តនោះតែម្តង ហើយខ្លួនក៏មិនដឹងថា រថយន្តនោះដឹកឈើដែរ ពេលសមត្ថកិច្ចចាប់បានទើបភ្ញាក់ខ្លួន។
លោកម៉ិញ ចាន់ណា បានឱ្យដឹងទៀតថា ឈើគ្រញូងទាំង៨០កំណាត់ស្មើនឹង៨៥៥ គីឡូក្រាម និងរថយន្តឡិចស៊ីស ត្រូវបានបញ្ជូនទៅប្រគល់ឱ្យផ្នែករដ្ឋបាលព្រៃឈើ ចំណែកបុរសឈ្មោះកែវ សារិទ្ធ កសាងសំណុំរឿងបញ្ជូនទៅកាន់សាលាដំបូងខេត្តដើម្បីចាត់ការតាមផ្លូវច្បាប់៕
ចែករំលែកព័តមាននេះ