ខេត្តស្ទឹងត្រែង ៖ កាំភ្លើងអំប្រាស់២ដើម ដែលគេប្រើហើយ ត្រូវបានប្រជាពលរដ្ឋប្រទះឃើញនៅក្រោយអតីតទីស្នាក់ការគណបក្សសម រង្ស៊ី ស្ថិតក្នុងភូមិព្រែក សង្កាត់ស្ទឹងត្រែង ក្រុងស្ទឹងត្រែង។ សេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពប្រចាំខេត្តស្ទឹងត្រែង បានបញ្ជាក់ឱ្យដឹងទៀតថា នៅវេលាម៉ោង៣និង៤០នាទីរសៀល ថ្ងៃទី២៤ សីហា២០១១ ប្រជាពលរដ្ឋមួយក្រុមបានជីកប្រឡាយដើម្បីរៀបចំដាក់លូ ក៏ប្រទះឃើញកាំភ្លើងអំប្រាស់២ដើម កប់ក្នុងដី។
បើតាមសមត្ថកិច្ចបានបញ្ជាក់ឱ្យដឹងថា កាំភ្លើងអំប្រាស់២ដើមនេះត្រូវបានគេប្រើប្រាស់ក្នុងអំឡុងឆ្នាំ១៩៩៤ ។ សូមបញ្ជាក់ថា ឆ្នាំ១៩៩៤ នេះហើយដែលលោកសម រង្ស៊ី បានលាលែងចេញពីតំណែងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុក្នុងអាណត្តិទី១ និងចេញពីសមាជិកគណបក្សហ្វ៊ុនស៊ីនប៉ិច មុនពេលលោកទៅបង្កើតគណបក្សថ្មីដំបូងឈ្មោះថា គណបក្សជាតិខ្មែរ។
សេចក្តីរាយការណ៍បានបញ្ជាក់បន្ថែមថា អតីតទីស្នាក់ការគណបក្សសម រង្ស៊ី ដែលគេប្រទះឃើញកាំភ្លើងនេះ ត្រូវបានគណបក្សសម រង្ស៊ី បោះបង់ចោលយូរឆ្នាំមកហើយ ហើយបច្ចុប្បន្នត្រូវបានម្ចាស់ដីជួលទៅឱ្យប្រជាពលរដ្ឋរស់នៅ។ បច្ចុប្បន្នកាំភ្លើងអំប្រាស់២ដើមដែលគេប្រើហើយនេះត្រូវបានអាជ្ញាធរប្រគល់ទៅឱ្យកងទាហានវិស្វកម្មដើម្បីកម្ទេចចោល ៕
ចែករំលែកព័តមាននេះ