ខេត្តស្វាយរៀង ៖ កាលពីព្រឹកថ្ងៃទី២៤ សីហា នៅសាលាខេត្តស្វាយរៀង មានរៀបចំកិច្ចប្រជុំលើកទី១០ ស្តីពីកិច្ចសហប្រតិបត្តិការបង្ការបង្ក្រាបបទល្មើស និងធ្វើផែនការសហប្រតិបត្តិការបង្ការបង្ក្រាបបទល្មើស ការពារសន្តិសុខសណ្តាប់ធ្នាប់ព្រំដែនកម្ពុជា-វៀតណាម រវាងខេត្តស្វាយរៀង-ខេត្តតៃនិញ ។ កិច្ចប្រជុំនេះប្រព្រឹត្ត
ខេត្តស្វាយរៀង ៖ កាលពីព្រឹកថ្ងៃទី២៤ សីហា នៅសាលាខេត្តស្វាយរៀង មានរៀបចំកិច្ចប្រជុំលើកទី១០ ស្តីពីកិច្ចសហប្រតិបត្តិការបង្ការបង្ក្រាបបទល្មើស និងធ្វើផែនការសហប្រតិបត្តិការបង្ការបង្ក្រាបបទល្មើស ការពារសន្តិសុខសណ្តាប់ធ្នាប់ព្រំដែនកម្ពុជា-វៀតណាម រវាងខេត្តស្វាយរៀង-ខេត្តតៃនិញ ។ កិច្ចប្រជុំនេះប្រព្រឹត្តធ្វើក្រោមអធិបតីភាព លោកឧកញ៉ាម៉ែន វិបុល អភិបាលរងខេត្តស្វាយរៀង លោកប្រាជ្ញ រឹម ស្នងការនគរបាលខេត្តស្វាយរៀង លោកង៉ូ ក្វាងឡុង នាយកនគរបាលខេត្តតៃនិញ និងមានការអញ្ជើញចូលរួមពីស្នងការរង អធិការនគរបាលក្រុង-ស្រុក នគរបាលប៉ុសិ៍្តច្រកព្រំដែន ទាំង២ភាគី ។
លោកវរសេនីយ៍ឯកណុប គឹមហេង ស្នងការរងនគរបាលខេត្តស្វាយរៀង បានអានរបាយការណ៍រួមអំពីសន្តិសុខ សណ្តាប់ធ្នាប់នៅតំបន់
ព្រំដែនរវាងខេត្តស្វាយរៀង និងខេត្តតៃនិញ គិតចាប់ពីថ្ងៃទី២៦ មីនា មកដល់ថ្ងៃទី២៤ សីហា ២០១១ ។ ចំពោះលទ្ធផលនៅក្នុងខែកក្កដា ២០១១ កន្លងមក នគរបាលខេត្តសហការជាមួយកម្លាំងអគ្គស្នងការដ្ឋាននគរបាលជាតិបង្ក្រាបករណីបង្កើតមូលដ្ឋានលួចលាក់របស់ឧក្រិដ្ឋជនឆ្លងដែន ជួលសណ្ឋាគារ ក្រុមហ៊ុនកាស៊ីណូនៅក្រុងបាវិត ដោយបំពាក់ឧបករណ៍បច្ចេកវិទ្យាទំនើបៗ ធ្វើសកម្មភាពគំរាមជំរិតទារប្រាក់នៅបណ្តាប្រទេសនានាក្នុងតំបន់អាស៊ី ។ ក្នុងប្រតិបត្តិការនេះកម្លាំងសមត្ថកិច្ចបង្ក្រាបឃាត់ខ្លួនជនសង្ស័យជាជនជាតិចិនដីគោក និងចិនតៃវ៉ាន់ចំនួន៦២នាក់ (ស្រី១៥នាក់) បញ្ជូនទៅនាយកដ្ឋានអន្តោប្រវេសន៍ ។
លោកណុប គឹមហេង បានបន្តទៀតថា ចំពោះបទល្មើសពាក់ព័ន្ធរវាងខេត្តទាំងពីរកើតឡើង២២លើក ក្នុងនោះបទល្មើសបង្ខាំងមនុស្សខុសច្បាប់១៣លើក ជនល្មើស២៦នាក់ (ស្រី៤នាក់) ដែលមានជនជាតិវៀតណាម២១នាក់ (ស្រី៤នាក់) ម៉ាឡេស៊ី១នាក់ ឥណ្ឌូណេស៊ី១នាក់ និងខ្មែរ៣នាក់ ។ មូលហេតុនៃការបង្ខាំងមនុស្សខុសច្បាប់ គឺដើម្បីបង្ខំឱ្យគ្រួសារជនរងគ្រោះយកប្រាក់មកសងបំណុលជំពាក់ក្នុងការខ្ចីលេងល្បែងស៊ីសងក្នុងកាស៊ីណូ ដែលជនរងគ្រោះជាជនជាតិវៀតណាម ។ ចំពោះការចាប់បង្ខាំងមនុស្ស១៣លើកនេះ គឺមាន២ករណីមានលក្ខណៈសាហាវព្រៃផ្សៃ ដោយជនល្មើសបានកាត់ម្រាមដៃរបស់ជនរងគ្រោះផ្ញើទៅគំរាមគ្រួសាររបស់ពួកគាត់ដើម្បីបង្ខំឱ្យយកប្រាក់មកសងពួកគេ តែត្រូវសមត្ថកិច្ចបង្ក្រាបបាន ។
ដោយឡែកករណីឃាតកម្មកើតឡើង៣លើក ប៉ុនប៉ងធ្វើឃាត១លើក និងករណីលួច និងបង្ករបួសស្នាម៤លើកដែលទាក់ទិននឹងប្រជាជនទាំង២ប្រទេស ។
ក្នុងរបាយការណ៍បានបង្ហាញឱ្យឃើញដែរថា ភាគីវៀតណាមបានបញ្ជូនប្រជាជនខ្មែរដែល ឆ្លងដែនចូលវៀតណាមខុសច្បាប់ចំនួន៨លើកមាន៨១១នាក់ (ស្រី៤៦០នាក់) ស្មើនឹង៣៨៥គ្រួសារ ក្នុងនោះកុមារ៥១៧នាក់ មកឱ្យសមត្ថកិច្ចកម្ពុជា ដើម្បីធ្វើការអប់រំ និងដោះស្រាយឱ្យទៅមូលដ្ឋានវិញ ។ ជាមួយនេះ ខាងកម្ពុជាបានបញ្ជូនចេញផុតពីខេត្តស្វាយរៀងនូវប្រជាជនវៀតណាមដែលឆ្លងដែនចូលស្នាក់នៅខុសច្បាប់ចំនួន៤៦នាក់ (ស្រី២៥នាក់) ។
លោកវរសេនីយ៍ឯកង៉ូ ក្វាងឡុង នាយកនគរបាលខេត្តតៃនិញ បានថ្លែងថា យើងត្រូវរឹតចំណងកិច្ចសហការឱ្យកាន់តែប្រសើរថែមទៀត ដើម្បីការពារសន្តិសុខតាមខ្សែបន្ទាត់ព្រំដែន កម្ពុជា-វៀតណាម នៃខេត្តទាំងពីរ ដោយកសាងខ្សែបន្ទាត់ព្រំដែន សន្តិភាព មិត្តភាព ស្ថិរភាព និងអភិវឌ្ឍន៍ឱ្យមានប្រសិទ្ធភាពខ្ពស់ ។
លោកឧកញ៉ាម៉ែន វិបុល អភិបាលរងខេត្តស្វាយរៀងបានមានប្រសាសន៍ថា ដើម្បីការពារសុវត្ថិភាព សន្តិសុខសណ្តាប់ធ្នាប់សង្គមនៃខេត្តទាំងពីរឱ្យមានស្ថិរភាព ប្រសិទ្ធភាពខ្ពស់ នគរបាលខេត្តស្វាយរៀង និងនគរបាលខេត្តតៃនិញ ទាំងបណ្តាការិយាល័យជំនាញពាក់ព័ន្ធថ្នាក់ខេត្តវរសេនាតូចការពារព្រំដែន បណ្តាក្រុង ស្រុក ជាប់ព្រំដែន និងប៉ុសិ៍្តព្រំដែន ត្រូវបន្តបង្កើនការរឹតចំណងសាមគ្គីភាពឱ្យបានរឹងមាំ និងជំរុញកិច្ចសហប្រតិបត្តិការឱ្យបានខ្លាំងក្លាក្នុងការបង្ការបង្ក្រាបបទល្មើស ការពារសន្តិសុខ សណ្តាប់ធ្នាប់ តំបន់ព្រំដែន ឱ្យកាន់តែមានភាពប្រសើរឡើងជាទំនុកចិត្តរបស់រាជរដ្ឋាភិបាល ក៏ដូចជាសេចក្តីសុខជូនប្រជាជនទាំងពីរប្រទេសកម្ពុជា-វៀតណាម ៕
ចែករំលែកព័តមាននេះ