រាជធានីភ្នំពេញ ៖ អ្នកនាំពាក្យសម្តេចតេជោ ហ៊ុន សែន ប្រធានព្រឹទ្ធសភាបានលើកឡើងថា ភាគីថៃកំពុងតែប្រើកលល្បិចអាក្រក់ ដើម្បីព្រួសឈាមមកលើកម្ពុជាជាថ្មីម្តងទៀតហើយ ពាក់ព័ន្ធទៅនឹងល្បែងឧក្រិដ្ឋកម្មអនឡាញ ។…
រាជធានីភ្នំពេញ ៖ អ្នកនាំពាក្យសម្តេចតេជោ ហ៊ុន សែន ប្រធានព្រឹទ្ធសភាបានលើកឡើងថា ភាគីថៃកំពុងតែប្រើកលល្បិចអាក្រក់ ដើម្បីព្រួសឈាមមកលើកម្ពុជាជាថ្មីម្តងទៀតហើយ ពាក់ព័ន្ធទៅនឹងល្បែងឧក្រិដ្ឋកម្មអនឡាញ ។
ការលើកឡើងរបស់ឯកឧត្តម ជា ធីរិទ្ធ អ្នកនាំពាក្យសម្តេចតេជោ បន្ទាប់ពីសារព័ត៌មានរបស់ថៃជាច្រើនស្ថាប័ន នៅថ្ងៃ៨ កក្កដា បានផ្សព្វផ្សាយថា ក្រុមប៉ូលិសថៃបានលបឆ្មក់ចូលឆែកឆេរទីតាំង១៩កន្លែងដែលជាកម្មសិទ្ធិរបស់ឧកញ៉ា កុក អាន ជាមនុស្សជំនិតរបស់សម្តេចតេជោ ដែលមានទីតាំងនៅជិតព្រំដែនកម្ពុជា-ថៃ ស្ថិតនៅក្រុងប៉ោយប៉ែត ខេត្តបន្ទាយមានជ័យ ដោយបានរឹបអូសរថយន្តប្រណីតៗជាច្រើនគ្រឿង គិតជាថវិកាប្រមាណជា២៧លានដុល្លារ ។
ឆ្លើយតបទៅនឹងការវាយលើប្រហារកម្ពុជា និងសម្តេចតេជោពីសំណាក់ភាគីថៃនេះ ឯកឧត្តម ជា ធីរិទ្ធ បានឲ្យដឹងតាមប្រព័ន្ធសង្គមតេឡេក្រាមថា នេះគឺជាព័ត៌មានបំផ្លើសបំភ្លៃខុសពីការពិត ហើយក៏ជាល្បែងសងសឹករបស់ថៃមកលើកម្ពុជា និងប្រទេសជិតខាង ។
ឯកឧត្តមអ្នកនាំពាក្យថា នេះហើយជាទម្លាប់អាក្រក់របស់ថៃ ខណៈថ្មីៗនេះ នាយករដ្ឋមន្ត្រី ផែថងថាន ស៊ីណាវ៉ាត់ត្រា ដែលត្រូវបានព្យួរតំណែងក៏បានដើរព្រួសឈាមមកលើកម្ពុជាដែរ ជុំវិញឧក្រិដ្ឋកម្មឆបោកតាមអនឡាញ ស្របប្រទេសខ្លួនឯងជាមជ្ឈមណ្ឌលចែកចាយឧក្រិដ្ឋកម្មពាសពេញពិភពលោក ជាពិសេស នៅតំបន់អាស៊ី-អាគ្នេយ៍ ។
អ្នកនាំពាក្យរូបនេះបានបញ្ជាក់ថា «ដូច្នេះ នេះគឺជារបៀបដើរព្រួសឈាមដាក់គេដែលជាមាយាទរបស់ប្រទេសមួយនេះដែលជាមាយាទរបស់មេដឹកនាំមួយនេះ មកលើប្រទេសដទៃ ជាពិសេសមកលើកម្ពុជា ក្នុងចេតនាបង្ខូចកិត្តិយសរបស់គេ ស្របពេលប្រទេសខ្លួនឯងដែលប្រឡាក់ដោយលាមក»។
ជាមួយគ្នានោះដែរ អ្នកនាំពាក្យក៏បានបញ្ចឺតបញ្ចើទៅភាគីថៃថា បើចង់ប្រើកលល្បិចអ្វីមកលើកម្ពុជា សូមអញ្ជើញបញ្ចេញឲ្យអស់មក ព្រោះកម្ពុជាមិនខ្លាចញញើតនឹងល្បិចកលអាក្រក់របស់ថៃនោះទេ ដោយសារកម្ពុជាមានសម្តេចតេជោ ហ៊ុន សែន សម្តេចធិបតី ហ៊ុន ម៉ាណែត នាយករដ្ឋមន្ត្រី និងមានមេដឹកនាំដ៏ខ្លាំងជាច្រើនត្រៀមកំដរលេងបានគ្រប់ពេលវេលា ។
អ្នកនាំពាក្យខាងលើនេះ ក៏បានបន្ថែមទៀតថា បើភាគីថៃចិត្តខ្លាំង ត្រូវតែចាប់ខ្លួនលោក ថាក់ ស៊ីន ដាក់ពន្ធគារទៅ ព្រោះលោក ថាក់ ស៊ីន ជាមនុស្សស្និទ្ធជាមួយសម្តេចតេជោ ហើយក៏ត្រូវបានសម្តេចចិញ្ចឹមឲ្យរស់រានមានជីវិត រហូតមានឱកាសមកជាន់លើទឹកថៃម្តងទៀតនេះ ដោយសារសម្តេចតេជោ ជាអ្នកជួយទំនុកបម្រុងសព្វបែបយ៉ាង ៕
ចែករំលែកព័តមាននេះ