ខេត្តបាត់ដំបង ៖ អ្នកភូមិប្រមាណជាង៥០នាក់ មកពីឃុំចែងមានជ័យ ស្រុកបាណន់ បានមកប្រមូលផ្តុំគ្នានៅខាងមុខសាលាដំបូងខេត្ត កាលពីព្រឹកថ្ងៃទី២៤ សីហា ដោយមានលើកបដាពាក្យស្លោកព្រោងព្រាតផង ដើម្បីប្រឆាំងទៅនឹងស្ថាប័នតុលាការនេះ ដែលបានចេញដីកាបង្គាប់ឱ្យតំណាងពួកគេ១១នាក់ចូលខ្លួនមកបំភ្លឺ ជុំវិញ
ខេត្តបាត់ដំបង ៖ អ្នកភូមិប្រមាណជាង៥០នាក់ មកពីឃុំចែងមានជ័យ ស្រុកបាណន់ បានមកប្រមូលផ្តុំគ្នានៅខាងមុខសាលាដំបូងខេត្តកាលពីព្រឹកថ្ងៃទី២៤ សីហា ដោយមានលើកបដាពាក្យស្លោកព្រោងព្រាតផង ដើម្បីប្រឆាំងទៅនឹងស្ថាប័នតុលាការនេះ ដែលបានចេញដីកាបង្គាប់ឱ្យតំណាងពួកគេ១១នាក់ចូលខ្លួនមកបំភ្លឺជុំវិញការចោទប្រកាន់ដែលកើតចេញពីជម្លោះដីធ្លី ។
ការចេញដីកាកោះ ឬបង្គាប់ឱ្យជនសង្ស័យចូលខ្លួនមកបំភ្លឺលើសំណុំរឿងព្រហ្មទណ្ឌដែលគេដឹងថា កើតចេញពីករណីវិវាទដីធ្លី រួចហើយតុលាការចេញដីកាឃុំខ្លួនក្នុងពន្ធនាគារ គឺជាទម្លាប់មួយដែលស្ថាប័នអនុវត្តច្បាប់មួយនេះ តែងអនុវត្តកន្លងមក ។ ដូច្នេះហើយ ទើបរាល់លើកឱ្យតែមានដីកាកោះតំណាងអ្នកភូមិណាមួយមកបំភ្លឺនៅតុលាការ គេតែងឃើញអ្នកភូមិលើកគ្នាទាំងហ្វូងមកតវ៉ា ឬគាំទ្រតំណាងពួកគេមិនឈប់ឈរក្រែងតុលាការចេញដីកាឃុំខ្លួនដូចមុនៗទៀត ។
គេសង្កេតឃើញផ្ទាំងបដាជិត១០សន្លឹកដែលអ្នកភូមិលើកព្រោងព្រាតយ៉ាងស្ងៀមស្ងាត់នៅខាងមុខសាលាដំបូងខេត្តនាព្រឹកថ្ងៃទី២៤ សីហា នេះ ភាគច្រើនមានខ្លឹមសារប្រឆាំងទៅនឹងលោកគឹម ម៉េង ចៅក្រមស៊ើបសួរ ។ ក្រុមអ្នកភូមិទាំងនោះបាននិយាយប្រាប់អ្នកកាសែត និងសមត្ថកិច្ចថា លោកគឹម ម៉េង ចៅក្រមស៊ើបសួរបានចេញដីកាបង្គាប់ឱ្យតំណាងពួកគេចំនួន១១នាក់ ចូលខ្លួនទៅបំភ្លឺក្នុងតុលាការជាបន្តបន្ទាប់ ចាប់តាំងពីអំឡុងខែកក្កដា រហូតមកដល់ពេលនេះ នៅមិនទាន់ចប់នៅឡើយទេ ក្នុងជម្លោះដីធ្លីដ៏រ៉ាំរ៉ៃមួយកន្លែងនៅតំបន់អណ្តូងកន្តួត ក្នុងឃុំដូនបា ស្រុកគាស់ក្រឡ រវាងប្រជាពលរដ្ឋជាមួយមន្ត្រីយោធា និងពួកឈ្មួញដីធ្លីមួយចំនួន ។
ស្ត្រីឈ្មោះទុំ ខុម អាយុ៦១ឆ្នាំ ដែលកំពុងអង្គុយកាន់បដាមួយផ្ទាំងផងបានប្រាប់កោះសន្តិភាពថា ក្រុមអ្នកភូមិនៅឃុំចែងមានជ័យ ស្រុកបាណន់ ដែលលើកគ្នាមកតវ៉ាដល់តុលាការនេះ គឺស្នើឱ្យលោកចៅក្រមគឹម ម៉េង ដែលកាន់សំណុំរឿងនេះបញ្ឈប់នូវការចេញដីកាកោះហៅតំណាងអ្នកភូមិមកបំភ្លឺ ដោយនិយាយថា លោកចៅក្រមគួរទុកបញ្ហាជម្លោះដីធ្លីជូនទៅគណៈកម្មការខេត្តដោះស្រាយសិនទៅ ព្រោះភាគីដើមបណ្តឹងជាអ្នករំលោភបំពានដីរបស់ពួកគាត់ ដោយពួកគេអាងអំណាចជាយោធា និងអាងអ្នកមានប្រាក់នៅពីក្រោយ ។
បើយោងតាមដីកាបង្គាប់ឱ្យចូលខ្លួនរបស់លោកគឹម ម៉េង ចៅក្រមស៊ើបសួររបស់តុលាការខេត្តដែលចេញជាបន្តបន្ទាប់ត្រូវបានអះអាងថា មានជនត្រូវចោទចំនួន១១នាក់ ១-ឈ្មោះហែម សុខន ភេទស្រី ២-ឈ្មោះជា ចន្ធីដា ភេទស្រី ៣-ឈ្មោះឡូញ លៀប ភេទស្រី ៤-ឈ្មោះហ៊ាម យ៉ុម ភេទស្រី ៥-ឈ្មោះឡូញ វីតា ភេទស្រី ៦-ឈ្មោះប៊ូ សារូ មេភូមិចែង ឃុំចែងមានជ័យ ៧-ឈ្មោះហាក់ តាន់ មេភូមិបុសខ្នុរ ឃុំចែងមានជ័យ ៨-ឈ្មោះនុន ប៉ក់ មេឃុំចែងមានជ័យ ៩-ឈ្មោះអ៊ុង សុភ័ក្រ ភេទប្រុស ១០-ឈ្មោះឡូញ ប៊ុនលី ភេទប្រុស និង១១-ឈ្មោះយូម ឡៃ ភេទប្រុស ។
ក្រុមអ្នកតវ៉ាបាននិយាយថា ឈ្មោះខាងលើនេះមួយចំនួនត្រូវចូលខ្លួនទៅបំភ្លឺនៅតុលាការតាំងពីខែកក្កដា តែមិនបានចូលទេ ព្រោះពួកគេខ្លាចតុលាការចាប់ឃុំខ្លួន រីឯមួយចំនួនទៀតនឹងត្រូវចូលខ្លួននាពេលខាងមុខនេះទៀត ។ អ្នកភូមិបានបញ្ជាក់ថា ជនត្រូវចោទឈ្មោះប៊ូ សារុំ ត្រូវតុលាការឃុំខ្លួនកាលពីថ្ងៃទី២០ កក្កដា ឆ្នាំ២០១១ នៅពេលគាត់ចូលខ្លួនទៅបំភ្លឺតាមដីការបស់លោកគឹម ម៉េង ។ ដូច្នេះហើយទើបជនត្រូវចោទផ្សេងៗទៀតរាងចាលមិនហ៊ានចូលទៅតុលាការ ។
នៅក្នុងដីការបស់លោកគឹម ម៉េង ចៅក្រម ស៊ើបសួរ គេពិនិត្យឃើញមានការចោទប្រកាន់ ចំនួន២ករណីទៅលើតំណាងអ្នកភូមិទាំង១១រូប ខាងលើនេះគឺចោទពីបទ «ប៉ះពាល់កម្មសិទ្ធិឯកជន និងពីបទសមគំនិតក្នុងអំពើឆបោក» ដែលសំណុំរឿងនេះមានដើមបណ្តឹង១-ឈ្មោះអ៊ុន សុភាព ជាមន្ត្រីនគរបាលចរាចរខេត្ត ២-ឈ្មោះញេប ជា ជាមន្ត្រីយោធា និង៣-ឈ្មោះហុង គា ជាជាងថតរូបនៅឯស្រុកថ្មគោល ។ នៅក្នុងដីកាសម្រេចលេខ៤៨៤៥ ចុះថ្ងៃទី២៣ សីហា ឆ្នាំ២០១០ របស់លោកគឹម ម៉េង ចៅក្រមស៊ើបសួរ បានឱ្យដឹងថា ដើមបណ្តឹងទាំង៣នាក់ខាងលើនេះ ជាតំណាងឱ្យប្រជាជនចំនួន១០០គ្រួសារ ។
ដើមបណ្តឹងលោកអ៊ុន សុភាព បាននិយាយថា ដីនោះទំហំ៥៧០ហិកតា បានមកពីការបែងចែករបស់អង្គភាពយោធាកងពលលេខ១៨ អតីតខ្មែរក្រហមដែលធ្វើសមាហរណកម្ម ។ ប៉ុន្តែភាគីប្រជាពលរដ្ឋដែលតវ៉ាបានតបវិញថា ភាគីដើមបណ្តឹងបានដីនេះពីការរំលោភបំពានយកពីប្រជាពលរដ្ឋសុទ្ធសាធដោយការប្រើអំណាច និងទឹកប្រាក់ ។
ទោះជាបែបណា គេមិនទាន់ឃើញមានការឆ្លើយតបពីមន្ត្រីតុលាការភ្លាមៗទេ ។ រីឯក្រុមអ្នកតវ៉ាក៏បានរំសាយនៅពេលរសៀលបន្តិច ប៉ុន្តែពួកគេបានព្រមានថា នឹងលើកគ្នាមកម្តងទៀត បើគ្មានដំណោះស្រាយឱ្យបាត់ការភ័យខ្លាចទេ ៕
ចែករំលែកព័តមាននេះ