នាយកដ្ឋានបង្ក្រាបបទល្មើសបច្ចេកវិទ្យា បានអោយដឹង កាលពីថ្ងៃទី៨ ខែកក្កដាថា ខ្លួនបានបង្ក្រាប និងឃាត់ខ្លួនមេខ្លោងសកម្មម្នាក់ ជំនាញខាងបង្កើតគណនីហ្វេសប៊ុកក្លែងក្លាយដើរតួជាបុរសសង្ហា មានទ្រព្យសម្បត្តិច្រើន ដើម្បីឆបោកស្ត្រីៗជាច្រើននាក់ ដោយប្រើវិធីសាស្ត្រលួងលោមមនោសញ្ចេតនា…
នាយកដ្ឋានបង្ក្រាបបទល្មើសបច្ចេកវិទ្យា បានអោយដឹង កាលពីថ្ងៃទី៨ ខែកក្កដាថា ខ្លួនបានបង្ក្រាប និងឃាត់ខ្លួនមេខ្លោងសកម្មម្នាក់ ជំនាញខាងបង្កើតគណនីហ្វេសប៊ុកក្លែងក្លាយដើរតួជាបុរសសង្ហា មានទ្រព្យសម្បត្តិច្រើន ដើម្បីឆបោកស្ត្រីៗជាច្រើននាក់ ដោយប្រើវិធីសាស្ត្រលួងលោមមនោសញ្ចេតនា ។
នាយកដ្ឋានប្រឆាំងបទល្មើសបច្ចេកវិទ្យា បានសរសេរលើហ្វេសប៊ុករបស់ខ្លួនថា បានបើកការស្រាវជ្រាវ ករណីឆបោកក្រោមរូបភាពលួងលោមមនោសញ្ចេតនាតាមអនឡាញ និងឈានទៅដល់ការឃាត់ខ្លួនជនសង្ស័យ០១នាក់ ឈ្មោះ ច.ដ ភេទប្រុស អាយុ២៨ឆ្នាំ តាមដីកាបង្គាប់ឲ្យនាំខ្លួន របស់ចៅក្រមស៊ើបសួរ នៃសាលាដំបូងរាជធានីភ្នំពេញ ដើម្បីយកមកចាត់វិធានការតាមផ្លូវច្បាប់។
គូសបញ្ជាក់ផងដែរថា ករណីនេះជនសង្ស័យបានបង្កើតគណនីហ្វេសប៊ុកក្លែងក្លាយ និងបានយករូបភាពពីគណនីអ្នកដទៃមកធ្វើជារូបភាពរបស់ខ្លួន និងតែងតែបង្អួតភាពហ៊ឺហារ ដើម្បីទាក់ទាញអ្នកប្រើប្រាស់តាមបណ្ដាញសង្គម ។
កន្លងមកមាននារីរងគ្រោះជាច្រើន តែងតែចាញ់បោកល្បិចរបស់ជនសង្ស័យរូបនេះ ដោយដំបូងឡើយ ជនសង្ស័យបានបង្ហោះជារូបភាពមានទ្រព្យសម្បត្តិហ៊ឺហារមានមុខរបរជាអ្នកជំនួញ និងពេលខ្លះជាមន្ត្រីរាជការមានឥទ្ធិពល ។
បន្ទាប់ពីទាក់ទងជនរងគ្រោះដល់ដំណាក់កាលជនរងគ្រោះទុកចិត្តហើយ ជនសង្ស័យបានក្លែងធ្វើជាជួបបញ្ហាក្នុងមុខរបររកស៊ីរបស់គេដូចជា គយចាប់ទំនិញ ឬមានបញ្ហានៅកន្លែងធ្វើការ…។ល ។ ដែលជនសង្ស័យត្រូវការជំនួយហិរញ្ញវត្ថុជាបន្ទាន់ ដើម្បីដោះស្រាយ ហើយលួងលោមឲ្យជនរងគ្រោះទាំងនោះផ្ទេរប្រាក់មកខ្លួនជាច្រើនម៉ឺនសែនដុល្លារ ។
នាយកដ្ឋានប្រឆាំងបទល្មើសបច្ចេកវិទ្យា តែងតែក្រើនរំលឹក និងផ្សព្វផ្សាយ ដល់អ្នកប្រើប្រាស់តាមបណ្ដាញទំនាក់ទំនងសង្គមទាំងឡាយ សូមពិនិត្យឱ្យបានច្បាស់លាស់មុននឹងជឿជាក់លើព័ត៌មានបុគ្គលតាមបណ្ដាញសង្គម ព្រោះវាអាចធ្លាក់ចូលក្នុងអន្ទាក់ដែលនាំឲ្យខាត់បង់ផលប្រយោជន៍នានាក្នុងប្រការណាមួយ៕
ចែករំលែកព័តមាននេះ