រដ្ឋាភិបាលអង់គ្លេសមានគម្រោងឲ្យអ្នករស់នៅក្នុងទីក្រុងធ្វើដំណើរបែបផែនផ្សេងខុសពីទម្លាប់របស់ពួកគេសព្វដងអំឡុងការប្រកួតកីឡាអូឡាំពិកឆ្នាំ២០១២ដើម្បីបញ្ចៀសការកកស្ទះចរាចរណ៍។ ប្រព័ន្ធដឹកជញ្ជូនសាធារណៈរបស់ទីក្រុងឡុងដ៍នឹងមានបូកបន្ថែមការធ្វើដំណើរពីមនុស្សប្រមាណ៣លាននាក់នៅថ្ងៃទី៣ខែសីហាឆ្នាំក្រោយ។ នោះគឺជាថ្ងៃប្រកួតទី១របស់ព្រឹត្តិការណ៍អូឡាំពិករដូវក្តៅឆ្នាំ២០១២ ហើយក៏ជាថ្ងៃមួយដែលមានអ្នកធ្វើយ៉ាងច្រើនកុះករទៅមើលការប្រកួតផងដែរ។ វាគឺជាថ្ងៃដែលមានអ្នកធ្វើដំណើរសរុប១២លាននាក់ក្នុង១ថ្ងៃ ។
ដោយមូលហេតុទាំងអស់នេះ រដ្ឋាភិបាលអង់គ្លេសចង់ឲ្យអ្នកធ្វើដំណើរធម្មតាពីផ្ទះទៅកន្លែងធ្វើការផ្លាស់ប្តូរទម្លាប់របស់ពួកគេដើម្បីជួយសម្រួលដល់ការកកស្ទះចរាចរណ៍។
រដ្ឋលេខាធិការផ្នែកដឹកជញ្ជូនលោកណ័រមែន បេកគ័របាននិយាយថា៖«វាជាពេលដែលត្រូវដាក់ប្រេងកង់ឮសូរក្រេតក្រត និងធ្វើអ្វីមួយដើម្បីផលប្រយោជន៍និងមុខមាត់ប្រទេស»។ ទាក់ទិននឹងព័ត៌មានប្រកួតកីឡាអូឡាំពិករដូវក្តៅឆ្នាំ២០២០វិញ កាលពីដើមសប្តាហ៍នេះ គណៈកម្មាធិការអូឡាំពិករបស់អាមេរិកនិងអាហ្វ្រិកខាងត្បូងបាននិយាយថា ពួកគេបានផ្ញើឯកសារដេញថ្លៃធ្វើម្ចាស់ផ្ទះប្រកួតអូឡាំពិកទៅប្រធាននគណៈកម្មាធិការអូឡាំពិកពិភពលោកIOCរួចជាស្រេចហើយ។
សម្រាប់អាហ្វ្រិកខាងត្បូង ព័ត៌មាននៃការចូលដេញថ្លៃរបស់គេលើកនេះគឺជាការផ្លាស់ប្តូរជំហរ១៨០ដឺក្រេដ្បិតកាលពីខែឧសភាកន្លងទៅប្រធានគណៈកម្មាធិការអូឡាំពិករបស់ប្រទេសនេះបានប្រកាសថាប្រទេសរបស់ខ្លួនបានលុបចោលការដេញថ្លៃប្រកួតកីឡាអូឡាំពិករដូវក្តៅឆ្នាំ២០២០ហើយ។ ការបញ្ជាក់នាពេលនោះរបស់គណៈរដ្ឋមន្ត្រីរបស់អាហ្វ្រិកខាងត្បូងបាននិយាយថាខ្លួនបានសម្រេចចិត្តបែបនោះក៏ព្រោះដើម្បីធ្វើឲ្យមានភាពល្អប្រសើរសម្រាប់ប្រទេសទាំងមូលបន្ទាប់ពីបានឆ្លងកាត់ការចំណាយប្រាក់យ៉ាងច្រើនរៀបចំការប្រកួតបាល់ទាត់វើលខាប់កាលពីឆ្នាំ២០១០កន្លងមក។
កាលពីមុនខែឧសភា គណៈកម្មាធិការអូឡាំពិកអាហ្វ្រិកខាងត្បូងសង្ឃឹមថានឹងចូលដេញថ្លៃ ហើយនាំយកព្រឹត្តិការណ៍អូឡាំពិកមកកាន់ទ្វីបអាហ្វ្រិកជាលើកទី១បន្ទាប់ពីការប្រកួតបាល់ទាត់វើលខាប់បានបញ្ចប់ទៅដោយជោគជ័យ។ តែការសម្រេចរបស់រដ្ឋាភិបាលក្រោយមកគឺផ្ទុយពីការយល់ឃើញរបស់គណៈកម្មាធិការអូឡាំពិក។ រដ្ឋាភិបាលយល់ថាជំនួសឲ្យការចំណាយលុយលើការរៀបចំការប្រកួតកីឡា គេគួរតែចំណាយលុយលើការប្រយុទ្ធប្រឆាំងនឹងភាពក្រីក្រ ការចាយលុយលើផ្នែកសេវាកម្មជាមូលដ្ឋានដូចជាការផ្គត់ផ្គង់ទឹកស្អាតក៏ដូចជាចរន្តអគ្គិសនីដល់បណ្តាប្រជាពលរដ្ឋក្រីក្រ។ ប៉ុន្តែអ្វីដែលជាការភ្ញាក់ផ្អើលពេលនេះអាហ្វ្រិកខាងត្បូងបែរជាថាខ្លួនចូលដេញថ្លៃដែរ។
ដោយឡែកទីក្រុងតូក្យូបានចូលមកជំនួសក្រុងហ៊ីរ៉ូស៊ីម៉ារបស់ជប៉ុនបន្ទាប់ពីទីក្រុងមួយនេះបានបោះបង់ចោលគម្រោងចូលដេញថ្លៃរៀបចំប្រកួតកីឡាអូឡាំពិករដូវក្តៅឆ្នាំ២០២០បន្ទាប់ពីមានការជំទាស់តវ៉ាពីប្រជាជនក្នុងមូលដ្ឋាននិងកង្វះខាតមូលនិធិ។
គណៈកម្មាធិការអូឡាំពិកប្រទេសជាសមាជិកនានាមានពេលវេលាដល់ថ្ងៃទី១ខែកញ្ញាក្នុងការផ្តល់ឈ្មោះទីក្រុងដែលត្រូវចូលដេញថ្លៃឲ្យទៅគណៈកម្មាធិការអូឡាំពិកពិភពលោកIOC។ គណៈកម្មាធិការអូឡាំពិកពិភពលោកកាលពីពាក់កណ្តាលខែឧសភាបានប្រកាសបើកនីតិវិធីកីឡាអូឡាំពិករដូវក្តៅឆ្នាំ២០២០។ នៅក្នុងនោះគណៈកម្មាធិការនេះបានចែកលិខិតជូនដំណឹងទៅគ្រប់សមាជិករបស់ខ្លួនក្នុងពិភពលោកទាំងអស់ឲ្យផ្ញើឈ្មោះទីក្រុងដែលត្រូវដេញថ្លៃមកខ្លួនមិនឲ្យហួសថ្ងៃទី១ខែកញ្ញាឡើយ ។
បន្ទាប់មកទីក្រុងជាបេក្ខភាពទាំងអស់ត្រូវផ្តល់លិខិតពាក់ព័ន្ធនឹងខ្លួនមកIOCត្រឹមថ្ងៃទី១៥ខែកុម្ភៈឆ្នាំ២០១២។ IOCនឹងជ្រើសរើសទីក្រុងដែលត្រូវជាប់ឈ្មោះនៅថ្ងៃទី៧ខែកញ្ញាឆ្នាំ២០១៣នៅទីក្រុងប៊ុយណូស៊ែ ប្រទេសអាហ្សង់ទីន។ ប្រធានគណៈកម្មាធិការអូឡាំពិកពិភពលោកហ្សាក់ រ៉ូសមានបំណងនាំយកកីឡាអូឡាំពិកទៅកាន់អាហ្វ្រិកខាងត្បូងជាយូរមកហើយ ហើយឥឡូវនេះបំណងនោះក៏នៅតែមានក្នុងចិត្តរបស់លោករ៉ូសនៅឡើយ៕
ចែករំលែកព័តមាននេះ