ខេត្តកំពង់ចាម ៖ផ្ទៃមេឃខ្មៅងងឹតលាយឡំនឹងផ្លេកបន្ទោរឆ្វាត់ឆ្វែងផង មិនយូរប៉ុន្មានភ្លៀងបានធ្លាក់មកលើភូមិអូរវាយ ឃុំស្ពឺ ស្រុកចំការលើ កាលពីម៉ោង២និង៤០នាទីរសៀល ថ្ងៃទី២៣ សីហា ។ អ្វីដែលគួរឱ្យស្លុតចិត្តនោះ គឺបាតុភូតធម្មជាតិរន្ទះបា.ញ់បានលាន់យ៉ាងកក្រើកនៅផ្ទះលោកង៉ែត សារុន អាយុ៥០ឆ្នាំ បណ្តាលឲ្យត្រូវ
ខេត្តកំពង់ចាម ៖ផ្ទៃមេឃខ្មៅងងឹតលាយឡំនឹងផ្លេកបន្ទោរឆ្វាត់ឆ្វែងផង មិនយូរប៉ុន្មានភ្លៀងបានធ្លាក់មកលើភូមិអូរវាយ ឃុំស្ពឺ ស្រុកចំការលើ កាលពីម៉ោង២និង៤០នាទីរសៀល ថ្ងៃទី២៣ សីហា ។ អ្វីដែលគួរឱ្យស្លុតចិត្តនោះ គឺបាតុភូតធម្មជាតិរន្ទះបាញ់បានលាន់យ៉ាងកក្រើកនៅផ្ទះលោកង៉ែត សារុន អាយុ៥០ឆ្នាំ បណ្តាលឲ្យត្រូវប្រជាពលរដ្ឋចំនួន៨នាក់មានក្មេងចាស់ប្រុសស្រីដែលកំពុងតែជ្រកភ្លៀងនៅខាងក្រោមផ្ទះក្នុងនោះមាន២នាក់បានស្លាប់ភ្លាមនៅនឹងកន្លែង និង៦នាក់ទៀតរងរបួស ត្រូវបានក្រុមសាច់ញាតិយកទៅឆ្អើរភ្លើង និងខ្លះទៀតយកទៅសង្គ្រោះនៅមន្ទីរពេទ្យបង្អែកស្រុកចំការលើ។
លោកអនុសេនីយ៍ឯក អ៊ិត ដារ៉ា អធិការនគរបាលស្រុកចំការលើ បានប្រាប់ឲ្យដឹងថា ចំពោះអ្នកដែលបានស្លាប់ដោយសាររន្ទះបាញ់មាន ១-ឈ្មោះអៀម ប៊ុនធឿន ភេទប្រុស អាយុ២២ឆ្នាំ និង២-ឈ្មោះមាស សារី ភេទស្រី អាយុ៣៧ឆ្នាំ។ ឯអ្នករបួសចំនួន៦នាក់ទៀត ១-ឈ្មោះយ៉ន ឈឿន ភេទប្រុស អាយុ៤០ឆ្នាំ ២-ឈ្មោះហេង ជាតិ ភេទប្រុស អាយុ២២ឆ្នាំ ៣-ឈ្មោះរុន ស្រីមុំ ភេទស្រី អាយុ១៩ឆ្នាំ ៤-ឈ្មោះផល ភាស់ ភេទប្រុស អាយុ៩ឆ្នាំ ៥-ឈ្មោះចន ម៉ី ភេទប្រុស អាយុ៧ឆ្នាំ និង៦-ឈ្មោះមាស គង្គា ភេទប្រុស អាយុ៥ឆ្នាំ ទាំងអស់គ្នារស់នៅក្នុងភូមិកើតហេតុខាងលើ ។
លោកអធិការនគរបាលស្រុកចំការលើប្រាប់បន្តថា មុនពេលកើតហេតុជនរងគ្រោះទាំងអស់បាននាំគ្នាមកលេងផ្ទះរបស់ឈ្មោះសារុន ដោយបានឈរលេងនៅត្រង់កន្លែងស្រះចិញ្ចឹមត្រី។ មួយសន្ទុះក្រោយមកមេឃបានបង្អុរភ្លៀងមកយា៉ងខ្លាំងលាយឡំនឹងផ្លេកបន្ទោរច្រវាត់ ហើយម្នាក់ៗបានរត់មកជ្រកនៅខាងក្រោមផ្ទះឈើ១ខ្នងដែលស្ថិតនៅក្បែរនោះ។ លុះប្រហែលជា៥នាទីក្រោយមកស្រាប់តែរន្ទះបានបាញ់មកចំក្រោមផ្ទះដែលមានក្មេងចាស់ប្រុសស្រីកំពុងអង្គុយនៅលើគ្រែនិងខ្លះទៀតឈរ បណ្តាលឲ្យស្លាប់២នាក់ភ្លាមៗ និង៦នាក់ទៀតរបួសសន្លប់ដេកដួលរដូករណែល។ ក្រោយពេលកើតហេតុជនរងគ្រោះដែលសន្លប់ត្រូវបានសាច់ញាតិនាំគ្នាសែងយកទៅឆ្អើរភ្លើងរហូតបានដឹងខ្លួនជាបន្តបន្ទាប់ និងខ្លះទៀតត្រូវនាំទៅសង្គ្រោះនៅមន្ទីរពេទ្យបង្អែកស្រុកចំការលើ ។
ចំណែកលោកហ៊ាង ម៉េង នាយប៉ុស្តិ៍រដ្ឋបាលឃុំស្ពឺបានប្រាប់ឲ្យដឹងដែរថា ក្នុងពេលដែលមេឃកំពុងបង្អុរភ្លៀងធ្លាក់ចុះមកនោះ ប្រជាពលរដ្ឋប្រុសស្រីជាង១០នាក់ បានជ្រកនៅខាងក្រោមផ្ទះឈ្មោះង៉ែត សារុន ស្រាប់តែត្រូវរន្ទះបាញ់តែម្តង បណ្តាលឲ្យស្លាប់ និងរបួស៨នាក់ ឯបុរសម្ចាស់ផ្ទះមិនរងបួសនោះទេ។ ចំពោះអ្នកស្លាប់២នាក់សាច់ញាតិមិនអស់ចិត្តក៏បានដឹកតាមម៉ូតូមកសង្គ្រោះនៅមន្ទីរពេទ្យចំការលើ តែគ្រូពេទ្យប្រាប់ថាស្លាប់បាត់ទៅហើយ ទើបដឹកយកមកធ្វើបុណ្យនៅតាមផ្ទះរៀងៗខ្លួន ។
នៅព្រឹកថ្ងៃទី២៤ សីហា សាខាកាកបាទក្រហមកម្ពុជាខេត្ត បានចុះទៅចែកអំណោយដល់ក្រុមគ្រួសារអ្នកស្លាប់ ដោយក្នុង១គ្រួសារទទួលបានអង្ក៥០គីឡូក្រាម ត្រីខ ទឹកស៊ីអ៊ីវ ប្រេងឆា ព្រមទាំងថវិកាមួយចំនួនផងដែរ៕
ចែករំលែកព័តមាននេះ