ខេត្តបន្ទាយមានជ័យ ៖ ពលករប្រុស-ស្រី១៥នាក់ដែលមានបំណងឆ្លងដែនដោយខុសច្បាប់តាមច្រករបៀង ត្រូវបានកម្លាំងប៉េអឹមក្រុងប៉ោយប៉ែតហៅសួរនាំ និងទប់ស្កាត់មិនឱ្យឆ្លងដែនកាលពីវេលាម៉ោង៩ព្រឹកថ្ងៃទី២៣ សីហា ២០១១ នៅចំណុចផ្សាររ៉ា មុខផ្ទះសំណាក់ពានមាស ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។ ពលករទាំង១៥នាក់ ខាងលើមានប្រុស១៤នាក់ និងស្រី១នាក់ ក្នុងនោះ១១នាក់មកពីខេត្តតាកែវ និង៤នាក់ មកពីខេត្តកំពង់ស្ពឺ។
បើតាមការឱ្យដឹងពីលោកវរសេនីយ៍ត្រីហម ម៉ុត មេបញ្ជាការកងរាជអាវុធហត្ថក្រុងបានប្រាប់ថា តាមការសួរនាំពលករទាំងអស់ខាងលើប្រាប់ថា ពួកខ្លួនត្រូវបានមេខ្យល់យកលុយក្នុងម្នាក់អស់៦០ម៉ឺនរៀល ដោយឱ្យជិះរថយន្តពីស្រុកកំណើត មកជួបជុំគ្នានៅភ្នំពេញ ហើយបន្តជិះតាក់ស៊ីមកកាន់ក្រុងប៉ោយប៉ែត ក្នុងគោលបំណងឆ្លងដែនទៅទឹកដីថៃ ដើម្បីរកការងារធ្វើ។
គួរបញ្ជាក់ថា ពលករចំណាកស្រុកនាពេលបច្ចុប្បន្នគឺហាក់មានចំនួនច្រើនបានចូលទៅទឹកដីថៃតាមច្រករបៀងមិនថា នៅស្រុកផ្សេងៗនោះទេ សូម្បីតែច្រករបៀងក្នុងក្រុងប៉ោយប៉ែតក៏មានចំនួនច្រើនដែរ បើទោះជាដឹងថា ថៅកែថៃទាហានថៃ ធ្វើបាបបាញ់ងាប់ ដូចជាសត្វធាតុ យ៉ាងណាក៏ដោយ។ ពួកគេបានយកក្រុងប៉ោយប៉ែតធ្វើជាចំណត ក្រោយចុះពីរថយន្តក៏បានឡើងម៉ូតូឌុបបណ្តោះគ្នាទៅតាមច្រករបៀង ដូច្នេះសមត្ថកិច្ចគួរតែរឹតបន្តឹងបន្ថែមទៀត៕
ចែករំលែកព័តមាននេះ