រាជធានីភ្នំពេញ ៖ អង្គការមូលនិធិវីឡាវយូ អន្តរជាតិ (អគ្គនាយិកា Zahng Gil-Jah) ដែលបានធ្វើសកម្មភាពសុខុមាលភាពនៅក្រោមពាក្យស្លោក «សេចក្តីស្រឡាញ់របស់មាតា» បានផ្តល់សេចក្តីស្រឡាញ់របស់មាតាយ៉ាងកក់ក្តៅដល់គ្រួសារក្រីក្រ និងសិស្សានុសិស្សជាង១៣០នាក់ គឺអង្គការនេះបានឧបត្ថម្ភថវិកាសម្រាប់ធ្វើគ្រឿងបរិក្ខារសាលា (សួនផ្កា) និងផ្តល់ជាអាវដល់សិស្សានុសិស្ស ព្រមទាំងបរិច្ចាគជាគ្រឿងឧបភោគបរិភោគដល់គ្រួសារក្រក្រី។
នៅថ្ងៃចន្ទទី២២ សីហា សមាជិកអង្គការវីឡាវយូ អន្តរជាតិបានទៅសាលាបឋមសិក្សាមួយស្ថិតនៅក្នុងសង្កាត់កោះដាច់ ខណ្ឌឫស្សីកែវ រាជធានីភ្នំពេញ ហើយបានឧបត្ថម្ភថវិកាដល់នាយកសាលាចាន់ សុធី ។ សិស្សានុសិស្សទាំងអស់ និងប្រជាពលរដ្ឋបានរង់ចាំ ដើម្បីទទួលស្វាគមន៍ការអញ្ជើញមកដល់របស់សមាជិកអង្គការមូលនិធិវីឡាវយូអន្តរជាតិ។
លោកនាយកសាលាចាន់ សុធី បានប្រមូលសិស្សានុសិស្សនៅអំឡុងពេលវិស្សមកាល ដើម្បីថ្លែងអំណរគុណដល់អង្គការមូលនិធិវីឡាវយូ អន្តរជាតិ ដែលបានជួយសំអាតបរិស្ថាន និងជួយជួសជុលគ្រឿងបរិក្ខារសាលា ។ នៅថ្ងៃនោះអង្គការមូលនិធិវីឡាវយូអន្តរជាតិបានផ្តល់អំណោយជាអាវ និងនំដល់សិស្សានុសិស្ស ហើយសិស្សានុសិស្សដែលពាក់អាវរបស់អង្គការបានថ្លែងអំណរគុណដោយស្រែកថា «អម៉នី ខាំសាហាំនីដា» ដែលមានន័យថា «អរគុណមាតា» ។
លោកនាយកចាន់ សុធី ដែលបានទទួលថវិកាសម្រាប់ធ្វើសួនផ្កា បានមានប្រសាសន៍ថា «អរគុណច្រើន ដែលបានឧបត្ថម្ភថវិកាសម្រាប់ធ្វើសួនផ្កាដាស់អារម្មណ៍ក្មេងៗ ហើយខ្ញុំនឹងធ្វើឱ្យសិស្សានុសិស្សចងចាំសេចក្តីស្រឡាញ់របស់អគ្គនាយិកា» លើសពីនេះទៅទៀត គាត់បានជូនជាប័ណ្ណសរសើរដល់អង្គការ ។
នៅថ្ងៃដដែលនោះ អង្គការមូលនិធិវីឡាវយូ អន្តរជាតិ បានជួយគ្រួសារសិស្សក្រីក្រពីរគ្រួសារ តាមរយៈការណែនាំរបស់ចៅសង្កាត់ និងលោកនាយកសាលា ។ សិស្សម្នាក់ (ណាត ថានិត អាយុ១៤ឆ្នាំ) នៅជាមួយលោកតា លោកយាយ និងមួយទៀតគឺគ្រួសារលោកអ៊ុំ សេង ប៉ុន្តែស្ថានភាពគ្រួសាររបស់ពួកគេមានការលំបាក ដូច្នេះពួកគេត្រូវការជំនួយ ។
អង្គការមូលនិធិវីឡាវយូ អន្តរជាតិ ដែលបានស្គាល់ស្ថានភាពរបស់គ្រួសារទាំងនោះ បានទៅជួបសួរសុខទុក្ខពួកគេ និងបានបរិច្ចាគជាទឹកបរិសុទ្ធ អង្ករ មី ប្រេងឆា ក្រដាសអនាម័យ ព្រមទាំងគ្រឿងឧបភោគបរិភោគផ្សេងៗទៀត ។
លោកយាយបានចាប់ដៃសមាជិកវីឡាវយូ អន្តរជាតិទាំងអស់ និងបានមានប្រសាសន៍ថា អរគុណច្រើន ។ ហើយកូនៗ និងចៅៗ នៅក្នុងគ្រួសារដែលបានទទួលការបរិច្ចាគនោះ ក៏មានភាពសប្បាយរីករាយដែរ ៕
ចែករំលែកព័តមាននេះ