ខេត្តស្វាយរៀង ៖ ហេតុការណ៍គួរឱ្យភ្ញាក់ផ្អើលមួយបានកើតឡើងនាយប់ថ្ងៃទី២២ សីហា នៅខាងមុខទីបញ្ជាការកងរាជអាវុធហត្ថខេត្ត ដោយស្ត្រីវ័យក្មេង២នាក់ក្នុងចំណោម៣នាក់ត្រូវមន្ត្រីកងរាជអាវុធ ហត្ថចុះកម្មសិក្សា២នាក់ព្រួតវាយបណ្តាលឱ្យមានរបួសយ៉ាងដំណំហើយ ត្រូវបានក្រុមគ្រួសារបញ្ជូនមកព្យាបាលនៅមន្ទីរ
ខេត្តស្វាយរៀង ៖ ហេតុការណ៍គួរឱ្យភ្ញាក់ផ្អើលមួយបានកើតឡើងនាយប់ថ្ងៃទី២២ សីហា នៅខាងមុខទីបញ្ជាការកងរាជអាវុធហត្ថខេត្ត ដោយស្ត្រីវ័យក្មេង២នាក់ក្នុងចំណោម៣នាក់ត្រូវមន្ត្រីកងរាជអាវុធហត្ថចុះកម្មសិក្សា២នាក់ព្រួតវាយបណ្តាលឱ្យមានរបួសយា៉ងដំណំហើយត្រូវបានក្រុមគ្រួសារបញ្ជូនមកព្យាបាលនៅមន្ទីរពេទ្យបង្អែកខេត្តទាំងយប់ ។
ក្មេងស្រីរងគ្រោះទាំងពីរ ម្នាក់ឈ្មោះសៅ ស្រីមុំ អាយុ១៧ឆ្នាំ មានទីលំនៅក្នុងភូមិស្វាយរៀង សង្កាត់ស្វាយរៀង ក្រុងស្វាយរៀង រងរបួសជាំកដៃស្តាំ និងដងខ្លួន និងម្នាក់ទៀតឈ្មោះព្រំ ថានិន អាយុ២២ឆ្នាំ មានទីលំនៅក្នុងភូមិស្រះវង់ សង្កាត់ស្វាយរៀង ក្រុងស្វាយរៀង រងរបួសជាំកំភួនជើងខាងឆ្វេង និងដាច់រលាត់ខ្លួនប្រាណ ។ ចំណែកមន្ត្រីកងរាជអាវុធហត្ថដែលជាប់ចោទថា បានព្រួតវាយនោះម្នាក់ឈ្មោះចាន់ រតនា និងម្នាក់ទៀតឈ្មោះ ម៉ៃ ។
ទាក់ទិននឹងហេតុការណ៍ខាងលើនេះ ត្រូវបាននាងសៅ ស្រីមុំ រៀបរាប់ថា នៅវេលាម៉ោង៧និង៣០នាទីយប់ថ្ងៃទី២២ សីហា នោះ ខណៈរូបនាងកំពុងហូបបាយជាមួយក្រុមគ្រួសារស្រាប់តែឈ្មោះចាន់ រតនា បានទូរស័ព្ទមករូបនាង ហើយជេរតិះដៀលយ៉ាងខ្លាំងមកលើរូបនាង និងឪពុក មិនត្រឹមតែប៉ុណ្ណោះ ឈ្មោះចាន់ រតនា នេះក៏បានហុចទូរស័ព្ទទៅឱ្យមេរបស់គេឈ្មោះម៉ៃ ជួយជេរប្រទេចរូបនាងថែមទៀត ។ ពេលនោះ រូបនាងក៏បានតបតាមទូរស័ព្ទថា «ម៉េចពូឯងជេរខ្ញុំ ខ្ញុំមិនដែលស្គាល់ពូឯងទេ ពូឯងច្រឡំលេខទូរស័ព្ទហើយ» ប៉ុន្តែមន្ត្រីប៉េអឹមទាំងពីរនាក់នៅតែមិនស្តាប់ ហើយបន្តជេររូបនាងទៀតរហូតទ្រាំលែងបានរូបនាងក៏ជេរតបវិញ។ ជាចុងក្រោយ ឈ្មោះចាន់ រតនា ក៏បោះសំដីណាត់ជួបថា បើខ្លាំងមកជួបរូបគេនៅមុខទីបញ្ជាការកងរាជអាវុធហត្ថខេត្តដែលស្ថិតនៅភូមិរោងបន្លែ សង្កាត់ស្វាយរៀង ឥឡូវមក ។
នាងសៅ ស្រីមុំ បានបន្តថា ដោយរូបនាងមិនអស់ចិត្តនឹងរឿងជម្លោះនោះ ក៏បបួលប្អូនស្រីឈ្មោះសៅ គន្ធា អាយុ១៥ឆ្នាំ និងមិត្តភក្តិឈ្មោះព្រំ ថានិន ជិះម៉ូតូឌុបគ្នាទៅរកមន្ត្រីប៉េអឹមទាំងពីរដើម្បីជម្រះឱ្យដឹងស-ខ្មៅ។ ប៉ុន្តែពេលទៅដល់មុខទីបញ្ជាការកងរាជអាវុធហត្ថខេត្តភ្លាម ក៏ផ្ទុះជម្លោះរហូតឈានដល់ការប្រវាយប្រតប់គ្នាតែ ម្តង ដោយឈ្មោះម៉ៃ ប្រវាយប្រតប់ជាមួយរូបនាង រីឯឈ្មោះចាន់ រតនា បានចាប់ព្រំ ថានិន បោកដួលទៅលើថ្នល់ និងប្រតាយគ្នាទៅវិញទៅមកផងដែរ ហើយពេលនោះក៏មានកម្លាំងប៉េអឹមជាច្រើននាក់ទៀតនាំគ្នាឈរឱបដៃមើលដោយពុំព្រមជួយឃាត់នោះទេ ។ ចំណែកឯនាងព្រំ ថានិន បានឱ្យដឹងថា ក្រោយពេលកើតហេតុពួកនាងបាននាំគ្នាជិះម៉ូតូមកប្តឹងប៉ូលិសប៉ុស្តិ៍រដ្ឋបាលសង្កាត់ស្វាយរៀងទាំងយប់អំពីហេតុការណ៍នេះ បន្ទាប់មកទើបនាំគ្នាត្រឡប់ទៅផ្ទះប្រាប់រឿងរា៉វដល់ឪពុកម្តាយ និងនាំគ្នាទៅមន្ទីរពេទ្យព្យាបាល ។
មន្ត្រីប៉ូលិសប៉ុស្តិ៍រដ្ឋបាលសង្កាត់ស្វាយរៀង បានឱ្យដឹងថា មន្ត្រីកងរាជអាវុធហត្ថទាំងពីរនាក់នោះបានចោទក្រុមក្មេងស្រីរងគ្រោះថា ជាអ្នកទៅរករឿងពួកគេដល់បន្ទាយ ទើបកើតមានជម្លោះរហូតដល់មានការប្រវាយប្រតប់គ្នាបែបនេះ ។ ទោះបីជាយ៉ាងណាក៏ដោយ ក្នុងនាមខ្លួនជាកម្លាំងសមត្ថកិច្ចហេតុអ្វីបានជានាំគ្នាធ្វើបែបនេះ ហើយម្យ៉ាងភាគីម្ខាងទៀតសុទ្ធតែជាក្មេងស្រីដែលធ្វើបែបនេះគឺពិតជាមិនត្រឹមត្រូវឡើយ។ ពាក់ព័ន្ធនឹងករណីនេះ ភ្នាក់ងារកោះសន្តិភាពមិនអាចទាក់ទងសុំការបំភ្លឺពីខាងកម្លាំងកងរាជអាវុធហត្ថខេត្តបានទេ មកដល់ល្ងាចថ្ងៃទី២៣ សីហា ។
មានការកត់សម្គាល់ថា កន្លងមករាល់ ហេតុការណ៍ទាំងឡាយដែលកើតឡើងហើយមានការពាក់ព័ន្ធ ឬនៅក្នុងដៃរបស់កម្លាំងកងរាជអាវុធហត្ថខេត្ត ក្រុមអ្នកសារព័ត៌មានមិនអាចសុំការបំភ្លឺពីមន្ត្រីកងរាជអាវុធហត្ថទាំងនោះបានទេ ៕
ចែករំលែកព័តមាននេះ