រាជធានីភ្នំពេញ ៖ សាលាដំបូងរាជធានី កាលពីថ្ងៃទី២៣ សីហា បានសម្រេចឃុំខ្លួនខ្មាន់កាំភ្លើងដែលបា.ញ់សម្លាប់មន្ត្រីនគរ បាល២រូប ក្រោមបទចោទប្រកាន់២ គឺទី១-ឃាតកម្ម និងទី២-ប្រើប្រាស់អាវុធដោយគ្មានការអនុញ្ញាត ។ ជនដែលត្រូវចោទឈ្មោះញៀវ ធឿន ហៅម៉ាំង ភេទប្រុស អាយុ៤១ឆ្នាំ អតីតមន្ត្រីកងរាជអាវុធហត្ថ
រាជធានីភ្នំពេញ ៖ សាលាដំបូងរាជធានី កាលពីថ្ងៃទី២៣ សីហា បានសម្រេចឃុំខ្លួនខ្មាន់កាំភ្លើងដែលបាញ់សម្លាប់មន្ត្រីនគរបាល២រូប ក្រោមបទចោទប្រកាន់២ គឺទី១-ឃាតកម្ម និងទី២-ប្រើប្រាស់អាវុធដោយគ្មានការអនុញ្ញាត ។ ជនដែលត្រូវចោទឈ្មោះញៀវ ធឿន ហៅម៉ាំង ភេទប្រុស អាយុ៤១ឆ្នាំ អតីតមន្ត្រីកងរាជអាវុធហត្ថ ស្នាក់នៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ។
សំណុំរឿងព្រហ្មទណ្ឌខាងលើនេះ ស្ថិតនៅក្នុងដៃលោកមាស ច័ន្ទពិសិដ្ឋ ព្រះរាជអាជ្ញារងធ្វើការសាកសួរ និងចោទប្រកាន់ ។ ក្រោយពីលោកមាស ច័ន្ទពិសិដ្ឋ តំណាងអយ្យការចោទប្រកាន់រួចហើយក៏បានដាក់ចូលទៅចៅក្រមស៊ើបអង្កេត គឺលោកឌុច គឹមសន ហើយលោកឌុច គឹមសន បានសម្រេចឃុំខ្លួនជនត្រូវចោទឈ្មោះម៉ាំង ដាក់ពន្ធនាគារជាបណ្តោះអាសន្នរង់ចាំការស៊ើបអង្កេតបន្តដើម្បីឈានទៅបើកសវនាការផ្តន្ទាទោស ។
បទល្មើសដែលតំណាងអយ្យការចោទប្រកាន់ គឺ ១-ឃាតកម្ម ជាបទឧក្រិដ្ឋក្នុងក្រមព្រហ្មទណ្ឌថ្មី មានចែងក្នុងមាត្រា១៩៩ ស្តីពីអំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ។ បទល្មើសនេះច្បាប់តម្រូវផ្តន្ទាទោសឱ្យធ្វើការក្នុងពន្ធនាគាររយៈពេលពី១០ទៅ១៥ឆ្នាំ ។ ២-កាន់កាប់អាវុធដោយគ្មានការអនុញ្ញាត។ តាមច្បាប់ស្តីពីការគ្រប់គ្រងអាវុធជាតិផ្ទុះ និងគ្រាប់រំសេវត្រង់មាត្រា២០ ជនណាដែលបំពាក់ ដាក់តាមខ្លួន កាន់កាប់ប្រើប្រាស់ លក់ ទិញ ឱ្យខ្ចី ផ្ទេរ ចែកចាយ ជួល កែច្នៃ ដំឡើង ជួសជុលនូវអាវុធ គ្រឿងផ្ទុះ និងគ្រាប់រំសេវគ្រប់ប្រភេទ ដោយគ្មានការអនុញ្ញាតត្រូវផ្តន្ទាទោសឱ្យធ្វើការក្នុងពន្ធនាគាររយៈពេលពី៦ខែទៅ២ឆ្នាំ និងពិន័យជាប្រាក់ពី៥០ម៉ឺនទៅ២លានរៀល ដោយមិនទាន់គិតពីបទព្រហ្មទណ្ឌផ្សេងទៀត ។
យោងតាមការចោទប្រកាន់ពីសំណាក់តំណាងអយ្យការទៅលើឈ្មោះញៀវ ធឿន ហៅម៉ាំង នេះ លោកវរសេនីយ៍ទោ ជួន ណារិន្ទ ប្រធានការិយាល័យនគរបាលព្រហ្មទណ្ឌកម្រិតធ្ងន់បានឱ្យដឹងថា ជនត្រូវចោទនៅជាប់ពាក់ព័ន្ធនឹងបទល្មើស២ទៀតដែលសមត្ថកិច្ចរបស់លោកបានធ្វើរបាយការណ៍សំយោគបញ្ជូនទៅគឺ ១-ប្លន់ប្រដាប់អាវុធច្រើនករណី និង២-កាន់កាប់អាវុធខុសច្បាប់ ។ លោកជួន ណារិន្ទ បន្តថា បទល្មើសទាំង២នេះ ខាងសមត្ថកិច្ចមានឯកសារ សាក្សី និងជនរងគ្រោះគ្រប់គ្រាន់សម្រាប់ស្ថាប័នអយ្យការធ្វើការចោទប្រកាន់ហើយ ។ ទោះបីជាយ៉ាងណា មន្ត្រីសាលាដំបូងអះអាងថា ជនដែលត្រូវចោទត្រូវបានសម្រេចឃុំខ្លួនបណ្តោះអាសន្ន ដើម្បីធ្វើការស៊ើបអង្កេតបន្តលើបទល្មើស២ករណីទៀតនេះ៕
ចែករំលែកព័តមាននេះ