រាជធានីភ្នំពេញ ៖ យោងតាមសេចក្តីថ្លែងការណ៍ពីអ្នកនាំពាក្យក្រសួងការពារជាតិថ្ងៃ ទី២៣ សីហា បានស្វាគមន៍ និងវាយតម្លៃខ្ពស់ចំពោះព័ត៌មានដែលបានផ្សព្វផ្សាយជាសាធារណៈតាម រយៈសារព័ត៌មានBangkok Post នៅថ្ងៃទី២៣ សីហា ដែលដកស្រង់សំដីរបស់លោករដ្ឋមន្ត្រីក្រសួងការពារជាតិថៃយុទ្ធ សាក់ សាស៊ីប្រា
រាជធានីភ្នំពេញ ៖ យោងតាមសេចក្តីថ្លែងការណ៍ពីអ្នកនាំពាក្យក្រសួងការពារជាតិថ្ងៃទី២៣ សីហា បានស្វាគមន៍ និងវាយតម្លៃខ្ពស់ចំពោះព័ត៌មានដែលបានផ្សព្វផ្សាយជាសាធារណៈតាមរយៈសារព័ត៌មានBangkok Post នៅថ្ងៃទី២៣ សីហា ដែលដកស្រង់សំដីរបស់លោករដ្ឋមន្ត្រីក្រសួងការពារជាតិថៃយុទ្ធសាក់ សាស៊ីប្រាផា ថា អ្នកសង្កេតការណ៍គឺមានសារសំខាន់ណាស់ដ្បិតគេទាំង អស់នោះត្រូវតែ មានវត្តមាននៅទីនោះដើម្បីជាសាក្សីនៅក្នុងការងារអភិវឌ្ឍតំបន់គ្មានកងទ័ព ហើយអ្នកសង្កេតការណ៍ទាំងអស់នោះគឺជាសាក្សីដ៏ពិតប្រាកដ។
អ្នកនាំពាក្យក្រសួងការពារជាតិនៃព្រះរាជាណាចក្រកម្ពុជាក៏បានស្វាគមន៍វាយតម្លៃខ្ពស់ និងលើកទឹកចិត្តបន្ថែមទៀតដល់កងទ័ពភូមិន្ទថៃ ភូមិភាគទី២ដែលបាននិងកំពុងខិតខំរៀបចំទីតាំងឈរជើងរបស់អ្នកសង្កេតការណ៍ឥណ្ឌូណេស៊ីនៅក្នុងតំបន់គ្មានកងទ័ពបណ្តោះអាសន្នដែលបានចែងក្នុងដីកាបង្គាប់របស់តុលាការយុត្តិធម៌អន្តរជាតិថ្ងៃទី១៨ ខែកក្កដា ឆ្នាំ២០១១។ សកម្មភាពទាំងអស់នេះត្រូវបានអ្នកនាំពាក្យក្រសួងការពារជាតិនៃព្រះរាជាណាចក្រកម្ពុជាវាយតម្លៃដោយសុទិដ្ឋិនិយមក្នុងការចូលរួមចំណែក និងសហប្រតិបត្តិការដ៏ជិតស្និទ្ធរវាងកងយោធពលខេមរភូមិន្ទរបស់ខ្លួនជាមួយនឹងកងទ័ពភូមិន្ទថៃក្នុងការបញ្ចប់នូវដានប្រវត្តិសាស្ត្រនៃរាល់យុគសម័យសុបិនអាក្រក់រវាងប្រជាជាតិទាំងពីរ កសាងសករាជថ្មីឡើងវិញដើម្បីសន្តិភាព សហប្រតិបត្តិការ ភាតរភាព មិត្តភាព និងជាផលប្រយោជន៍អាទិភាពនៃប្រជាពលរដ្ឋទាំងសងខាង។ នេះជាទិសដៅនៃការអនុវត្តរបស់កងយោធពលខេមរភូមិន្ទឆ្លើយតបទៅនឹងបំណងដ៏ធំធេង និងគតិបណ្ឌិតរស់រវើករបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
យោងតាមកាសែតថៃមួួយទៀតផ្សាយកាលពីថ្ងៃទី២៣ សីហា ថា នៅឯរដ្ឋសភា លោកឧត្តមសេនីយ៍យុទ្ធសាក់ សាស៊ីប្រាផា រដ្ឋមន្ត្រីក្រសួងការពារជាតិបានថ្លែងពីកិច្ចប្រជុំព្រំដែនថ្នាក់តំបន់រវាងកម្ពុជា-ថៃ (RBC) ថា កិច្ចប្រជុំបានរៀបចំឡើងនៅខេត្តនគររាជសីមា ដោយភាគីថៃមានលោកឧត្តមសេនីយ៍ថាវ៉ាចឆៃ សាមុតសាខន មេទ័ពភូមិភាគ២ ជាប្រតិភូចូលប្រជុំរួមជាមួយភាគីកម្ពុជា ដើម្បីពិភាក្សាទាក់ទងនឹងការត្រៀមប្រជុំគណៈកម្មាធិការព្រំដែនទូទៅ (GBC) ។
ទាក់ទិននឹងកិច្ចប្រជុំ RBC លោកយុទ្ធសាក់ បានសង្កត់ធ្ងន់ថា ត្រូវបានកំណត់ពិភាក្សាចំនួន១៥ចំណុចដែលគណៈរដ្ឋមន្ត្រីបានអនុម័តកាលពីមុន បន្ទាប់មកក៏មានលក្ខណៈជារបៀបវារៈផ្សេងៗទៀត មានប្រហែល៧ ទៅ៨ករណី ត្រូវពិភាក្សាគ្នាដូចជាការត្រៀមកែសម្រួលកម្លាំងទ័ពការប្រគល់អំណាច និងតួនាទីដល់ក្រុមអ្នកសង្កេតការណ៍ឥណ្ឌូណេស៊ី ត្រូវពិភាក្សារួមគ្នា ដើម្បីឱ្យទទួលបានលក្ខខណ្ឌការចរចា និងឈានឆ្ពោះទៅរកកិច្ចប្រជុំ GBC បន្ត ។
ស្របពេលជាមួយគ្នានេះ ក៏មានការចោទសួរពីអ្នកសារព័ត៌មានថា តើថៃយល់ ព្រមធ្វើតាមការស្នើរបស់តុលាការអន្តរជាតិស្តីពីការដកទ័ពរបស់ភាគីទាំង២ចេញពីតំបន់ជម្លោះ ឬអត់? លោកឧត្តមសេនីយ៍យុទ្ធសាក់ ថ្លែងថា យើងត្រូវធ្វើតាមសំណើរបស់តុលាការអន្តរជាតិទាំង៤ចំណុច និងមានការប្តេជ្ញាចិត្តថា ត្រូវធ្វើឱ្យបញ្ចប់បញ្ហា ហើយថៃក៏គ្មានការចាញ់ប្រៀបដែរ រីឯលទ្ធផលនៃការពិភាក្សាមានលក្ខណៈបែបណា ត្រូវបញ្ជាក់ទៅគណៈរដ្ឋមន្ត្រីឱ្យបានដឹងនិងដំណើរការតាមច្បាប់ ។
រដ្ឋមន្ត្រីក្រសួងការពារជាតិថៃបានបន្តទៀតថា ថៃនឹងមិនឱ្យចាញ់ប្រៀបលើផលប្រយោជន៍ការប្រជុំ GBC ដែលកើតឡើងតាមការស្នើសុំរបស់កម្ពុជា។ យើងសង្ឃឹមលើផលប្រយោជន៍របស់ប្រជាជនភាគីទាំង២ ។
លោកថាក់ស៊ីន ប្រកាសថា គ្មានផែនការត្រឡប់ចូលប្រទេសដរាបណាជនជាតិថៃមានការស្រុះស្រួល និងបង្រួបបង្រួមគ្នាល្អ តាមទីភ្នាក់ងារព័ត៌មានប្ល៊ូមប៊ើក កាលពីថ្ងៃទី២៣ សីហា ផ្សាយថា លោកថាក់ស៊ីន ស៊ីណាវ៉ាត្រា បានផ្តល់បទសម្ភាសន៍ប្រាប់ទីភ្នាក់ងារព័ត៌មានជប៉ុនក្នុងពេលធ្វើទស្សនកិច្ចនៅជប៉ុនកាលពីថ្ងៃអង្គារ ទី២៣ សីហា ថា លោកគ្មានផែនការត្រឡប់ទៅប្រទេសថៃក្នុងពេលបច្ចុប្បន្នទេរហូតដល់ថៃមានការស្រុះស្រួលលើបញ្ហាផ្សេងៗនៅក្នុងប្រទេសបានល្អ ។ លោកអំពាវនាវដល់ជនជាតិថៃ សំដៅទៅលើការស្រុះស្រួលគ្នាបន្តទៀត ព្រោះវាជាកូនសោដ៏សំខាន់សម្រាប់ស្ថិរភាព និងការរីកចម្រើនរបស់ប្រទេស ហើយថៃគួរសហការគ្នាបំបាត់ចោលការមានទំនាស់ ។
លោកថាក់ស៊ីន បានថ្លែងថា លោកមិនជ្រៀតជ្រែកក្នុងរដ្ឋាភិបាលរបស់លោកស្រី យីងឡាក់ ហើយលោកផ្តល់ការពិភាក្សានៅពេលដែលគណបក្សត្រូវការ ប៉ុន្តែបើគណបក្សមិនត្រូវការលោកគ្មានការពាក់ព័ន្ធទេ ។
លោកថាក់ស៊ីន បន្តទៀតថា ការធ្វើដំណើរទៅប្រទេសជប៉ុន ជាសិទ្ធិរបស់លោកដោយផ្ទាល់ ចំណែកនាយករដ្ឋមន្ត្រីយីងឡាក់ ត្រូវជាប្អូនស្រីគ្មានការពាក់ព័ន្ធ ហើយរដ្ឋាភិបាលថៃមិនអាចបញ្ជាឱ្យរដ្ឋាភិបាលជប៉ុនចេញទិដ្ឋាការដល់អ្នកណាបានទេ ។
ទីភ្នាក់ងារព័ត៌មានប៊្លូមប៊ើក វិភាគថា ការបង្ហាញខ្លួននៅបរទេសរបស់លោកថាក់ស៊ីន ផ្តល់ឱកាសឱ្យភាគីប្រឆាំងវាយប្រហារលើរដ្ឋាភិបាលលោកស្រីយីងឡាក់ ស៊ីណាវ៉ាត្រា ថា គណបក្សភឿថៃត្រូវគ្រប់គ្រងដោយលោកថាក់ស៊ីន និងថា វត្តមានលោកថាក់ស៊ីន នៅបរទេសដើម្បីពិភាក្សាជាមួយមន្ត្រីជាន់ខ្ពស់កាន់តែច្រើនក្នុងពេលអនាគត ៕
ចែករំលែកព័តមាននេះ