រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា ក្នុងជំនួបសម្តែងការគួរសម និងពិភាក្សាការងារជាមួយសម្តេចតេជោ នាយករដ្ឋមន្ត្រី ហ៊ុន សែន នាព្រឹកថ្ងៃទី២៣ សីហា នៅភូមិគ្រឹះក្បែរវិមានឯករាជ្យ លោក TAN SRI DATO AJIT SINGH នាយកក្រុមហ៊ុន
រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា ក្នុងជំនួបសម្តែងការគួរសម និងពិភាក្សាការងារជាមួយសម្តេចតេជោ នាយករដ្ឋមន្ត្រី ហ៊ុន សែន នាព្រឹកថ្ងៃទី២៣ សីហា នៅភូមិគ្រឹះក្បែរវិមានឯករាជ្យ លោក TAN SRI DATO AJIT SINGH នាយកក្រុមហ៊ុន ION EXCHANGE ASIA PACIFIC បានជម្រាបសម្តេចថា ក្រុមហ៊ុន ION EXCH-ANGE ASIA PACIFIC មានផលិតផល ដើម្បីចម្រោះទឹកកខ្វក់សម្លាប់មេរោគឱ្យទៅជាទឹកស្អាត និងមានបច្ចេកវិទ្យាដើម្បីចម្រោះទឹកដែលមានជាតិអាសេនិកផងដែរ ។ ក្នុងន័យនេះលោកបានធ្វើទស្សនកិច្ចនៅបឹងត្របែក នៅស្ថានីយបូមទឹកកប់ស្រូវ ហើយមានចំណាប់អារម្មណ៍យ៉ាងខ្លាំងក្នុងការចូលរួមចំណែក ដើម្បីជួយអភិវឌ្ឍន៍កម្ពុជាលើវិស័យចម្រោះទឹកកខ្វក់ និងការផ្គត់ផ្គង់ទឹកស្អាត បំបាត់ទឹកដែលមានជាតិអាសេនិក ។
ជាការឆ្លើយតប សម្តេចតេជោនាយករដ្ឋមន្ត្រីហ៊ុន សែន មានប្រសាសន៍ថា បញ្ហាបង្ហូរទឹកកខ្វក់ចូលទៅក្នុងបឹង ឬទន្លេនោះគឺជាការប្រឈមដ៏ធំរបស់កម្ពុជា ។ នៅពេលនេះសម្តេចស្នើឱ្យលោក TAN SRI DATO AJIT SINGH ពិនិត្យមើល តើគួរចាប់ផ្តើមពីចំណុចណានៅក្នុងបញ្ហាចម្រោះទឹកកខ្វក់ ។ ដំបូងគួរតែធ្វើការសាកល្បងលើបញ្ហាចម្រោះទឹកកខ្វក់នេះនៅរាជធានីភ្នំពេញ ។
ទន្ទឹមនឹងនេះ សម្តេចតេជោនាយករដ្ឋមន្ត្រីបានណែនាំឱ្យលោកនាយកក្រុមហ៊ុនជួបជាមួយលោកអភិបាលរាជធានីភ្នំពេញដើម្បីរៀបចំធ្វើការសាកល្បងចម្រោះទឹកកខ្វក់នេះ ជាពិសេសនៅស្ថានីយបូមទឹកកប់ស្រូវដែលនៅទីនោះមានស្ថានីយបូមទឹករួចជាស្រេច ។
ពាក់ព័ន្ធនឹងបញ្ហាចម្រោះទឹកដែលមានជាតិអាសេនិកនេះ សម្តេចបានមានប្រសាសន៍ណែនាំឱ្យលោក TAN SRI DATO AJIT SINGH សហការជាមួយនឹងលោកសុខ ចិន្តា ដើម្បីធ្វើការសាកល្បងនៅស្រុកស្អាងដែលជាតំបន់មួយសម្បូរទៅដោយជាតិអាសេនិកនៅក្នុងទឹក ៕
ចែករំលែកព័តមាននេះ