ខេត្តកំពង់ចាម ៖ ជនសង្ស័យ២នាក់ដែលលួចកាច់បំបាក់ដែកបំពង់ទីបប្រវែងជាង ២ម៉ែត្រ សម្រាប់ការពាររន្ទះ នៅលើបង្គោលព្រំដែនកម្ពុជា-វៀតណាម លេខ៩៧ ស្ថិតនៅខាងត្បូងភូមិធ្លក ឃុំចាន់មូល ស្រុកមេមត់ ត្រូវបានចាប់ខ្លួនបញ្ជូនទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី។ ហេតុការណ៍នេះបានកើតឡើង
ខេត្តកំពង់ចាម ៖ ជនសង្ស័យ២នាក់ដែលលួចកាច់បំបាក់ដែកបំពង់ទីបប្រវែងជាង២ម៉ែត្រ សម្រាប់ការពាររន្ទះ នៅលើបង្គោលព្រំដែនកម្ពុជា-វៀតណាម លេខ៩៧ ស្ថិតនៅខាងត្បូងភូមិធ្លក ឃុំចាន់មូល ស្រុកមេមត់ ត្រូវបានចាប់ខ្លួនបញ្ជូនទៅស្នងការដ្ឋាននគរបាលខេត្ត ដើម្បីចាត់ការតាមនីតិវិធី។ ហេតុការណ៍នេះបានកើតឡើងតាំងពីល្ងាចថ្ងៃទី១៨ សីហា តែរយៈពេល៣ថ្ងៃក្រោយមក ជនដែលបានប្រព្រឹត្តបានត្រូវចាប់ខ្លួន ក្នុងនោះម្នាក់ត្រូវបានចាប់ខ្លួននៅស្រុកមេមត់ និងម្នាក់ទៀតតាមចាប់ដល់ស្រុកស្នួល ខេត្តក្រចេះ។
តាមព័ត៌មានពីលោកវរសេនីយ៍ត្រីឯម កុសល អធិការនគរបាលស្រុកមេមត់ ឱ្យដឹងថា ជនទាំង២នាក់ដែលត្រូវបានចាប់ខ្លួន ម្នាក់ឈ្មោះឈន បុន ភេទប្រុស អាយុ២៦ឆ្នាំ រស់នៅភូមិធ្លក ឃុំចាន់មូល ស្រុកមេមត់ និងម្នាក់ទៀតឈ្មោះចិន ម៉ៅ ភេទប្រុស អាយុ៣២ឆ្នាំ រស់នៅភូមិក្បាលត្រាច ឃុំស្រែចារ ស្រុកស្នួល ខេត្តក្រចេះ ដោយរឹបអូសបានវត្ថុតាងដែកបំពង់ទីប១កំណាត់ដែលមានមុខកាត់ទំហំ០,៦០សង្ទីម៉ែត្រគុណ២,២២ម៉ែត្រ។ លោកអធិការនគរបាលស្រុកមេមត់បន្តថា នៅល្ងាចថ្ងៃកើតហេតុនោះ ពុំបានដឹងថា មានករណីលួចកាច់យកដែកបំពង់ទីបសម្រាប់ការពាររន្ទះនោះទេ រហូតមកដល់ព្រឹកថ្ងៃទី១៩ សីហា ទើបលោកនាយប៉ុស្តិ៍រដ្ឋបាលឃុំចានមូល បានរាយការណ៍មកកាន់រូបលោកថា មានគេលួចកាច់ដែកបំពង់ទីប។
គ្រាន់តែទទួលបាននូវព័ត៌មាននេះភ្លាម រូបលោកបានចាត់ឱ្យកម្លាំងជំនាញរបស់ស្រុកចុះសហការជាមួយប៉ុស្តិ៍រដ្ឋបាលចាន់មូល បើកប្រតិបត្តិការស្រាវជ្រាវជាបន្ទាន់ រហូតបានទទួលពន្លឺដោយកំណត់បានមុខសញ្ញាជនសង្ស័យ២នាក់។ លុះនៅវេលាម៉ោង៣រសៀលថ្ងៃទី២១ សីហា ក៏បានឃាត់ខ្លួនឈ្មោះឈន បុន និងដកហូតវត្ថុតាងដែកបំពង់ទីប១កំណាត់ដែលបានលាក់ទុកនៅក្នុងចំការកៅស៊ូរបស់ឈ្មោះរ៉ុង ភេទប្រុស នៅខាងជើងភូមិធ្លក ឃុំចាន់មូល ត្រូវបាននាំខ្លួនមកកាន់អធិការដ្ឋាននគរបាលស្រុកមេមត់។ ក្រោយពីបានឆ្លើយសារភាពនៅវេលាម៉ោង៩ព្រឹកថ្ងៃទី២២ សីហា ហើយសមត្ថកិច្ចឈានដល់កំណត់មុខសញ្ញាចាប់ខ្លួនបក្សពួកម្នាក់ទៀតជាជនទី២ ដោយមានការសហការជាមួយនឹងនគរបាលស្រុកស្នួល ខេត្តក្រចេះ។
តាមជនសង្ស័យឈ្មោះចិន ម៉ៅ បានឆ្លើយសារភាពថា កាលពីល្ងាចថ្ងៃទី១៨ សីហា រូបគេបានឡើងមកពីស្ទូងស្រែ នៅខាងត្បូងភូមិធ្លក ដោយបានផឹកស្រានៅវាលស្រែជាមួយនឹងឈ្មោះឈន បុន អស់កន្លះលីត្រ ហើយបានទៅកាច់ពោតចំនួន២ទៅ៣ផ្លែមកដុតហូបនៅក្បែរបង្គោលព្រំដែនកម្ពុជា-វៀតណាមលេខ៩៧
នោះ។ បន្ទាប់មក ក៏បាននាំគ្នាឡើងលេងលើបង្គោលដែកបំពង់ទីបមានទំហំប៉ុនកដៃមនុស្សចាស់នោះទៀតផង។ ពេលនោះពួកគេបានកាច់បំបាក់ដែកបំពង់ទីបនោះតែម្តង ព្រមទាំងបានយកទៅលក់ តែមិនមានអ្នកណាហ៊ានទិញទេ ព្រោះគេដឹងថា ជាដែកបង្គោលព្រំដែន។
តាមការសារភាពថា ហេតុតែ មានការភិតភ័យ រូបគេបានយកដែកបំពង់ទីបនោះទៅលាក់ទុកនៅក្នុងចំការកៅស៊ូមួយកន្លែង ហើយរូបគេបានរត់គេចខ្លួនទៅខាងស្រុកស្នួល ខេត្តក្រចេះ លុះនៅព្រឹកថ្ងៃទី២២ សីហា ត្រូវនគរបាលប៉ុស្តិ៍ស្រែចារ មកឃាត់ខ្លួនបញ្ជូនទៅស្រុកមេមត់តែម្តង។
លោកវរសេនីយ៍ត្រីឯម កុសល អធិការនគរបាលស្រុកមេមត់បញ្ជាក់ថា បង្គោលព្រំដែនលេខ៩៧នោះ ស្ថិតនៅឃុំចាន់មូល ត្រូវបានគេធ្វើឡើងជាស្ថាពរ និងបានបំពាក់ដែកបំពង់ទីប១ដើមសម្រាប់ការពាររន្ទះទៀតផង ៕
ចែករំលែកព័តមាននេះ